Республикалық «Жас тілшілер» форумын өткізуді дәстүрлі іс-шараға айналдырған Әл-Фараби атындағы Қазақ ұлттық университетіне биыл да еліміздің түпкір-түпкірінен 60-тан астам талапкер жиналды.
Болашақ журналистердің шығармашылығын шыңдап, жолдама беретін «Жас тілшілер» форумының шежіресі тереңде жатыр. Алғаш республикалық «Жас тілшілер» слеті 1975 жылы мамыр айында өткен. Оның бастауында О.Сүлейменов, Ф.Оңғарсынова, Д.Стамбеков, Ш.Смаханұлы сынды танымал ақын-жазушылар тұрғаны белгілі.
Кейінгі жиырма жылда жаңа форматта, заманауи үлгіде өтіп жүрген форум биыл да болашақ журналистер үшін жаңа бағдарламаларымен ерекшеленді. Форумның ашылуында журналистика факультеті Баспасөз және электронды БАҚ кафедрасының меңгерушісі, профессор Гүлмира Сұлтанбаева мен аға оқытушы Серік Жұмабекұлы қоғамдағы журналистің рөліне тоқталды.
«Жас тілшілер» форумы барысында газет тілшісінің жұмысы туралы белгілі қаламгер-журналист Жүсіпбек Қорғасбек, телевизиядағы қыр-сырына Жаңылхан Асылбекова, журналистика негіздері бойынша Берікбол Төлеген шеберлік сыныптарын өткізді.
Форум соңында ең үздік шығармашылық жұмыстар марапатталды. «Ең үздік жас тілші-2024» байқауының қорытындысы бойынша бас жүлдеге «Ұлан» газетінің жас тілшісі, Семей қаласындағы №11 мектептің оқушысы Диана Ағзамованың жұмысы лайық деп танылды. Форум соңында Әл-Фараби атындағы ҚазҰУ журналистика факультеті жеңімпаздарға сыйлықтар тапсырып, дипломдармен марапаттады.
АЛМАТЫ