Біртуар әнші, ақын әрі композитор Сегіз серінің «Гауһартас», «Назқоңыр», «Сәулем-ай» атты ғажайып әндері мен басқа да туындылары «Астана опера» сахнасында қайта жанданып, көрермендерді музыка халықтың жанына айналған дәуірге жетелейді.
20 сәуір күні К.Байсейітова атындағы Камералық залда өтетін вокалдық музыка кешінде «Астана операның» жетекші солисі, Қазақстанның еңбек сіңірген әртісі Жаннат Бақтай терең үндестігі мен сан алуан сезімдерімен танымал осынау ғажайып әлемді қайта жаңғыртады.
– Әр ағашқа тамыры қалай маңызды болса, әрбір адамға оның шыққан жері мен тегі, Отаны мен тарихы, туған әндері солай маңызды. Дәл осы халық әндері композиторларға опера мен балет жауһарларын жасау үшін шабыт көзі болған. Бала күнімнен құлағыма сіңіріп, естіп өскен қазақ халық әндері – шығармашылығымның алтын діңгегі. Бұл – мені тарихыммен, еліммен, музыкалық отбасыммен және ата-бабаммен байланыстыратын арқау. Айтулы концертте мен түп-тамырымызға, оның ішінде кең байтақ Сарыарқа даласының перзенті, халқымыздың мақтанышы, менің арғы атам, өз заманының айтулы азаматы, кадет корпусын бітірген офицер, өз елінің патриоты – композитор Сегіз серінің шығармашылығына ден қойып, әндерінің қыр-сырына бойлайтын боламын. Ол жауынгер ретінде Махамбет Өтемісұлының азаттық қозғалысына қатысқан, «Қыз Жібек», «Қозы Көрпеш – Баян сұлу» және тағы басқа поэмалардың алғашқы нұсқасының қолжазбасын жасаған. Ең бастысы, әйгілі «Гауhартас», «Алқоңыр», «Ақбақай» сынды айтулы әндерді шығарды, бұл әндерді жалпылама түрде жай ғана халық әндері деп атау орынсыз. Керемет жүргізуші, тарих ғылымдарының кандидаты, профессор Жұмамұрат Шәмші концертте осы және басқа да жайттар туралы әңгімелей отырып, Сегіз серінің өмірінен әсерлі де қызықты хикаяларын баян етеді, – деп Жаннат Бақтай шығармашылық кешінің ерекшелігі туралы айтып берді.
Концерт өз елінің мәдени кодын тануға және сақтауға ұмтылған барлық жандар үшін мерекеге айналады деп баса айтты әнші. Сегіз серінің туындыларынан бөлек, бағдарламада халық әндері, сондай-ақ Қазақстанның заманауи композиторларының шығармалары да қоса шырқалады. Осылайша, музыкалық дәстүрлер жалғастығы қайта жанданып, ән өнерінің көкжиегін кеңіте түспек.
– Менің концертім – проза, поэзия мен музыка бір-бірін бірқалыпты толықтырып, үйлесімді шырқалатын музыкалық-әдеби кеш. Ұлттық өнерді, халық музыкасын насихаттау қай уақытта да келер ұрпақ үшін өзекті. Музыканы тыңдау ғана емес, сондай-ақ туындының жазылу тарихы, оның авторлары, қызықты деректер мен болған оқиғалар туралы айту маңызды. Өйткені өзінің дәстүрлерін, әдет-ғұрыптарын, тілін, ділін, тарихын білетін, яғни өзінің мәдениетін танитын адам – шын мәніндегі зиялы адам. Ал өзіне өзі сенімді, жүрегі жомарт, ниеті түзу әрі адамгершілігі мол адамның түйсігі мен жан дүниесі басқа мәдениеттерді қабылдауға және құрметтеуге ашық. Бұл концерттегі мақсатым – тыңдармандарға рухани ләззат сыйлау ғана емес, сонымен қатар концертке ағартушылық сипат үстеу. Халық әндері мен Сегіз сері шығармашылығы арасындағы заманауи үйлесімділікті айшықтап көрсету. Аталған кеште тыңдарман қауым тамаша композитор-мультиаспапшы Әділжан Толықпаевтың өнеріне тәнті болып, «Астана операның» талантты солистері Нарұл Тойкенов пен Расул Жармағамбетовтің ғажайып дауыстарын тыңдай алады. Концерт көрермендеріміздің көңілінен шығады деген сенімдемін, – деп әнші сөзін қорытындылады.
Концерт ұйымдастырушыларының айтуынша, қазақ халқының мұрасына айналған музыканы жаңғырту – елордалық театрдың негізгі мақсаттарының бірі. «Ұлы дала сазы» топтамасынан ұсынылып отырған «Гауhартас» вокалдық музыка кеші көрермендерге халық өнерінің әсемдігі мен ұлылығына бойлауға мүмкіндік береді. Бұл мәдени мұраны сақтаудың және оны келер ұрпаққа жеткізудің маңызды қадамы екендігі сөзсіз.