«Катонқарағайда әуежай салынады» деген жаңалықты ресми жиындарда естіп келе жатқанымызға он жылдан асты. Кейінгі жылдары ел бұл ақпаратқа назар аударуды да қойған. Күні кеше Президент Қасым-Жомарт Тоқаев Катонқарағай мен Зайсан аудандарында туризмнің әлеуетін дұрыс пайдалану қажет екендігін айта келіп, қос ауданға әуежай салынады дегенді естіген ел, шын қуанды. Себебі Мемлекет басшысының аузынан шыққан сөздің орындаларына көздері жеткен.
«Катонқарағай, Зайсан және Кендірлі өңірлерінің де туристік әлеуетін дұрыс пайдалану қажет. Осындай демалыс аймақтарында сапасы жоғары жол инфрақұрылымы бар әуе бекеттері мен әуежайлар салу керек», деді Президент Қасым-Жомарт Тоқаев. Бұл сөзді естіген Катонқарағай, Зайсан, Тарбағатай тұрғындары бір-бірінен сүйінші сұрасып, құтты болсын айтысып кеткен. Мынау қарбаласқан заманда аудандарға ұшақтың ұшуы көпшіліктің қолын едәуір ұзартады. Ең бастысы, табиғаты әсем өңірлерге баратын туристердің саны еселенеді. Берел қорық-музейінің директоры Алмас Сарбасовтың айтуынша, енді лек-легімен келетін туристерді қабылдап, сапалы қызмет көрсетілуге тиіс.
– Біздің музейге маусымында 11 мыңдай турист келіп, тамашалайтын. Енді әуежай салынып, үлкен әуе кемелері қатынайтын болса, бұл сан еселенеді. Сондықтан музейлер мен туристік орталықтар қызмет көрсетуді жетілдіруі керек. Туристік операторлар да жауапкершілікті сезінеді. Туристер ұшақпен келгендіктен, оларға мұнда қатынап тұруы үшін көлік қажет. Демек жергілікті жұрт оларға қызмет көрсетеді. Қарапайым тілмен айтсақ, тіршілік қайнай түседі, – дейді Берел қорық-музейінің басшысы Алмас Сарбасов.
Иә, әуежай ашылып, жолдар жөнделсе, туризм мен кәсіпкерлік сөзсіз дамиды. Жергілікті тұрғындарға тек ерінбей еңбек ету керек. Оларға мемлекет тарапынан берілетін түрлі жеңілдіктердің бары да рас. Дер кезінде пайдалана білсе, болғаны.
– Әуежай салынады дегенді Президент аузынан естіп, қуанышымыз әуелеп кетті. Ол деген ауданымыздың дамуына үлкен серпін береді. Аудан ашылғанда қалай қуансақ, бүгін солай қуанып жатырмыз, – дейді Катонқарағайдың тұрғыны, ардагер спортшы Қабдол Мәмиев.
Дәл осылай Тарбағатай тұрғындары да алақайлап жүр. Зайсан ауданында ашылатын әуежайға олар неге малақайларын аспанға атты дейміз ғой. Сөйтсек, көршілес ауданның әуежайына Тарбағатай ауданының орталығы Ақжардан 30-40 минутта жетіп баруға болады екен.
– Мемлекет басшысының Жолдауын тыңдап отырып, Зайсан ауданында әуежайдың бой көтеретінін айтқанда, төбеміз көкке жеткендей болды. Себебі бізге жақын. Мына тұрған жер. Қалалық жерде де әуежайға жарты сағат, кейде бір сағат жүріп барады. Ал бізге жарты-ақ сағаттық жерге ұшақ қонады. Бұл жаңалықты бұған дейін естісек те, арғы жағымызда күмән болған. Президент айтқан соң анық көзіміз жетті. Сенім білдіріп отырғанымыз, Қасым-Жомарт Тоқаев Күршімге көпір салынсын деді ме, әне, желтоқсанда ашылады. Елдің елу жылдан бері шешілмей келе жатқан мәселесін бір-ақ сәтте шешкен Мемлекет басшысына мың алғыс, – дейді Тарбағатай ауданының тұрғыны Гүлнұр Болатова.
Әлеуметтің әуелгі арманы – әуежай Жолдауда айтылды. Халық қуанды. Ендігі мәселе – құрылысы қашан басталады? Бұл сұрақты Жолаушылар көлігі және автомобиль жолдары басқармасының басшысы Нұржан Жұмаділовке қойдық.
– Екі әуежай бойынша нақты тапсырма берілді. Жұмыстар 2025 жылдың көктеміне қарай басталады. Ұшу алаңдарының ұзындығы 2100 метр болады. Жобалау жұмыстары басталмас бұрын топографиялық аэротүсірілім жасалады. Айта кетейін, зерттеу нәтижесінде Катонқарағай аулының өзінде ұшақтардың ұшып-қонуы қолайсыз болса, Солдатов аулының тұсындағы жазықты қарастырамыз. Ал Зайсан ауданы бойынша Сәтбай аулындағы ескі әскери әуежайдың орнын қарастырдық. Ол Тарбағатай ауданы тұрғындарына да жақын болмақ. Марқакөл ауданына да тиімді. Сонымен қатар әуежайдың жұмыс істеу кестесі, мамандарды жұмысқа тарту мәселесі де құзырлы органдардың назарында болады, – дейді Н.Жұмаділов.
Айтқандай, Омбы – Майқапшағай тасжолының құрылысы аяқталуға жақын. Демек шекарадан шыққан жүкті тікелей ұшақпен басқа қалаларға тура әрі жедел жеткізуге болады. Иә, бұл – жекелеген аудандарға ғана емес, жалпы Шығыс Қазақстанға қатынаудың оңтайлы жолы.
Шығыс Қазақстан облысы