Мемлекет басшысы «Әділетті Қазақстан: Заң мен тәртіп, экономикалық өсім, қоғамдық оптимизм» атты Жолдауында халқымыз қашанда кең пейілімен, толеранттылығымен ерекшеленгенін, еліміздің ынтымағы ең алдымен осы қасиеттер арқылы сақталып отырғанын айтты.
18 қазан – Рухани келісім күні. Бұл күн елімізде дүниежүзілік деңгейдегі теңдессіз оқиға – рухани келісімнің алғашқы әлемдік конгресі өткен 1992 жылдан бастау алады.
Қазақ халқы бейбітсүйгіш қасиетімен, ұлттық бірегейлігімен еліміздегі татулық пен келісімнің кепілі болып келеді. Себебі 20,1 млн тұрғынның 71%-ы – қазақтар. Үлкен жүкті көтеру жауапкершілігі – барлығымызға артылған зор міндет. Оны атқару үшін өзімізді-өзіміз танып-білуіміз керек. Біз кімбіз, қайдан шықтық, мемлекеттігіміз, жеріміз жөніндегі мағлұмат әрқайсымыздың жадымызда сайрап тұрғаны ләзім.
Біріншіден, түп-тамыр тарихымызды білмей, өлкемізді танымай ел болу қиын екенін алға тартқан Президент Қасым-Жомарт Тоқаев қазақ елінің көне заман, өткен дәуірлерден басталған тарихын зерттеп, 7 томдық кітап дайындауды ғалымдарға тапсырды. Ол мәселе оң шешімін тауып жатыр, сондай-ақ барша халық тарапынан қолдау тапты.
Қазақ елінің батыс қақпасындағы Құрманғазы ауданының тұрғындары да дүбірлі өзгерістерден кенже қалмай, өлкеміздің өткені мен бүгінінен сыр шертер 3 томдық кітапты жарыққа шығарды. Ауданымызды жан-жақты толық тану жолында округтердің шежіресін тиянақты дайындау – алдағы қомақты ісіміз. Ол еңбекте қоян-қолтық өмір сүріп жүрген барлық этнос өкілі қамтылуға тиіс. Көпұлтты мемлекет ретінде, әсіресе орыс халқымен талайлы тағдыр жазуында төрт ғасырға жуық уақыттан бері тарих жүгін бірге көтеріп келеміз. Бұқара жұрт бір-бірін жатсынбай, сыйласып өмір сүргені – шындық.
Екіншіден, Мемлекет басшысы енгізген «адалдық», «әділдік», «халық үніне құлақ асатын мемлекет» идеяларын жүзеге асыру керек. Түркістан қаласында өткен Ұлттық құрылтайдың екінші отырысында «Жаңа Қазақстанды Адал адамдар құрайды» дегені – іс басындағы басшыларға, мемлекеттік қызметкерлерге әр кезеңде де адал болуды тапсырғаны.
Мемлекет қаржысын сақтау – сол қаржыны бөлетін, жұмсайтын басшылардың ғана қолында. Сондықтан зор сенімге ие болған жоғары лауазымдағы адамдардың тазалығы бүкіл ұлтқа әсер ететінін сезінгенде, халқымызда да саналы түрде өзгеріс орын алады.
Атырау қаласында өткен Ұлттық құрылтайдың үшінші отырысында әділдікке баса назар аударылды. Әділдік барлық халыққа ортақ болса да, оны жүзеге асыратын – билік басындағы адамдар. Кадрларды тәрбиелеу, сайлауды әділ өткізу сол кісілердің оң ниетіне, тазалығына тікелей байланысты. Қолы таза, пиғылы ақ басшы – еліміздегі адалдық пен келісімнің кепілі, яғни алға өрлеудің негізгі шарттары.
Үшіншіден, дініміз – діңгегіміз. Асыл дініміздің пәктігін сақтай алмайтын кездеріміз жоқ емес. Бұл тұрғыда ел тұрғындарының діни сауатының аздығы салдарынан жат ағымдардың тайраңдауына жол беріп аламыз. Имамдардың жамағаттың діни сауатын ашар уағыздары тапшы. Әсіресе мүрдені жөнелтудегі айтары 4 парыздан аспайды. Жаназа алдында 2-3 минут дініміздің артықшылығын жеткізіп, ой салар сөздер айтуға болмас па еді? Оның да бір септігі тиері анық.
Төртіншіден, мемлекеттік тіл – басты байлығымыз. «Мен қазақпын» деген әрбір адам үшін тәңір сыйлаған осы байлықты шұбарламай келер ұрпаққа жеткізу – парыз. Өнер мен мәдениетте ұлттық нақыш айқындалып тұруы, салт-дәстүрді сақтау – өз болмысымызды биіктетіп, ел алдындағы қарызымызды өтеуге бастар жол.
Қазақ халқы осы айтылған ұлттық құндылықтарын тұғырына қондырса, әлемдегі дамыған ұлттардың қатарынан табылады. Республикадағы өзге ұлттарды татулық пен келісім жолында жан-жағына ұйыстырып, жетекшілік ететін жаңа деңгейге шығады. Қазақ елі жерімізге қоныстаған барлық этнос өкілінің тең дәрежеде өмір сүріп, салт-дәстүрін, өнерін дамытып, хал-ахуалын түзеуіне толық жағдай жасады. Өз кезегінде олар да қазақ халқының тілін, дінін, ділін дамытуға, жақсылыққа жақсылықпен жауап беріп, қомақты үлес қосуға міндетті. Сонда ғана этностар арасындағы келісім гүлдейді.
Өмірзақ ҚАЖЫМҒАЛИҰЛЫ,
Халықаралық «Алаш» сыйлығының лауреаты