Ілгері басудың ілкімді жолдары

Кеше Премьер-Министр Кәрім Мәсімовтің төрағалығымен селекторлық кеңес, артынша Үкімет отырысы болып өтті. Селекторлық кеңесте Елбасы­ның құқық қорғау қызметі мен сот жүйесінің тиімділігін арттыру ту­ралы Жарлығын жүзеге асыру жөніндегі Үкімет әзірлеген тиісті қаулының жобасы қаралды. Бұл жөнінде баяндама жасаған Қаржы министрі Болат Жәмішевтің айту­ынша құқық қорғау қызметін жү­зеге асыратын мемлекеттік органдар құрылымына бірқатар өзгерістер енгізілмек. Соның ішінде Ішкі істер министрлігінің аясында көші-қон полициясы комитеті құры­латын болады. Осыған байланысты Еңбек және халықты әлеуметтік қорғау министрлігінің аталған мә­селеге қатысты бірқатар функция­лары Ішкі істер министрлігіне беріледі. Сонымен қатар Ішкі істер министрлігінің көліктегі депар­таменттері біріктіріле отырып, қайта ұйымдастырылатын болады. Ендігі кезекте медициналық айық­тыру қызметі Денсаулық сақтау министрлігіне, ал кәмелетке тол­мағандарды уақытша оқшаулау, бейімдеу және оңалту орталық­тарының қызметтері Білім және ғылым министрлігіне тапсыры­лады. Ерекше қорғалатын маңызды стратегиялық нысандарды қорғау функцияларын қоспағанда басқа күзет қызметтерінің функциялары бәсекелестік ортаға берілмек. Қабылданған қаулыға байла­нысты Үкімет басшысы бірқатар тапсырмалар берді. Атап айтқанда, Ішкі істер министрлігі қара­мағында көші-қон полициясының құрылуына орай Ішкі істер ми­нистрлігі мен Төтенше жағдайлар министрлігі бірлесе отырып нақты жоспарлар әзірлеп ұсынуы қа­жеттігін айтты. Көші-қонның кейде жоспарлы, кейде жоспардан тыс жүргізілетіндігін еске сала келе аталған мәселеде нақты бағыттарды айқындап, тиісті шараларды әзірлеуді тапсырды. Осының алдында Үкімет елі­міздің аумағында, орманды-дала алқаптарында өрт қауіпсіздігін қамтамасыз ету мәселесін қараған болатын. “Жұт жеті ағайынды” деп халқымыз айтқандай, түрлі табиғи апаттар өрт қаупімен ғана шектел­мейтіндігі белгілі. Мұны биыл жазда болған бірқатар оқиғалар айқындап берді. Еліміздің оңтүстік-шығысындағы су тасқынына бай­ланысты бірқатар елді мекендер зар­дапқа ұшырап, мемлекеттің эко­номикалық қуатының арқасында олар жедел қалпына келтірілуде. Сондықтан Үкімет селекторлық кеңесте осындай оқиғалардың ал­дын алу, қауіпсіздігін қамтамасыз ету мәселелерін кешенді түрде қарастыруға мүмкіндік беретін азаматтық қорғаныс саласын ны­ғайтуға бағытталған шараларды белгіледі. Оқиға орын ала қалған жағдайда халыққа хабарландыру қызметін нығайту, өрт сөндіру құралдарын жаңарту, су қойма­ла­рын бекіту жұмыстарын күшейту, апаттан құтқару қызметінде ерікті жасақтар құру, жер сілкінісі орын ала қалған жағдайда одан аз шы­ғынмен шығу үшін түрлі ғимарат­тардың беріктігін арттыру, осыған қатысты нормативтерге өзгерістер енгізу, құрылыс жұмыстарының сапасына бақылауды күшейту секілді шараларды кешенді түрде қарастыру жөнінде ұйғарым жасалынды. Селекторлық кеңес аяқта­лы­сымен Үкімет отырысы жалғасты. Онда елімізде химия өндірісін және мәшине жасау саласын дамыту жөніндегі бағдарла­ма­лардың жобалары қаралды. Бұл екі мәселе жөнінде де Индустрия және жаңа технологиялар минис­трінің орынбасары Альберт Рау баяндама жасады. Химия өндірісін дамыту бағ­дарламасы 2010-2014 жылдар ара­лығын қамтиды. Ол – бағдар­ламаны жүзеге асыру үшін негізгі ресурстарды әзірлеу, яғни салаға қатысты табиғи байлықтарды бар­лау, іздестіру жұмыстарын ны­ғай­ту, саланы табиғи газбен, электр қуа­тымен қамту, химия өнімде­рінің экспортына қолдау жасау, осыған дейінгі әзірленген норма­тивті базаларды ретке келтіру, өнім әзірлеуде Еуроодақ стандарттарын енгізу, саланы білікті кадрлармен қамту секілді бірнеше бағыттан тұрады. Ал мәшине жасау саласын дамыту бағдарламасы негізінен осы сектордағы қазақстандық үлесті арттыру мәселесін қарастырады. Альберт Раудың айтуынша қазіргі күні мәшине жасау саласы өнім­дерінде елімізде экспорттың көлемі импорттың көлемінен 6 есе төмен болып отыр. Қазақстан жылына 15 миллиард доллардың мәшинелері мен оған қажетті бұйымдарды импорттайды екен. Ендігі кезекте осы олқылықтың орнын толтырып, қолдан келетін өнімдерді өз іші­мізде жасауымыз қажет. Мұның жақсы мысалдарын “Қазақстан темір жолы” АҚ-тың импорт ал­мастыру бағдарламасының жүзеге асуынан аңғаруға болады. Енді ос­ындай белсенді әрекеттерді елі­міз­дің мұнай-газ, ауыл шаруашылығы мәшинелерін жасау өндірістеріне де тереңірек енгізуіміз қажет. Аталған мәселеге байланысты бірқатар Үкімет мүшелері мен сарап­шылар сөз алып, әзірленіп отырған бағдарлама жобаларының мақсаты, орындау тетіктері айқын екендігін айтып, оларға қолдау біл­дірді. Екі бағдарлама да қабылданды. Сұңғат ӘЛІПБАЙ.

* * *

Қызметтестік  қырлары  қаралды

Кеше Премьер-Министр Кәрім Мәсімов Тә­жікстан Республикасының Сыртқы істер министрі Хамрохон Зарифимен кездесті, деп хабарлады Премьер-Министрдің баспасөз қызметі. Кездесуде екіжақты сауда-эко­номикалық қыз­меттестікті дамыту, соның ішінде бірлескен жобаларды жүзеге асыру үшін Қазақстан-Тәжікстан тікелей инвестициялар қорын құру мәселелері талқыланды.