5 қазанда Ресей Федерациясының Сочи қаласында қауіпсіздік мәселелерін жүргізетін жоғары өкілдердің екі күндік халықаралық кездесуі басталды. Оған елуден астам елдердің өкілдері – қауіпсіздік кеңестерінің хатшылары, президенттердің ұлттық қауіпсіздік жөніндегі көмекшілері, соның ішінде Ресей Федерациясынан, АҚШ-тан, Қытайдан, Үндістаннан, Франциядан, Италиядан, Түркиядан, Канададан, Пәкстаннан, Ауғанстаннан, Кореядан, ТМД елдерінен, Африка мен Оңтүстік Американың бірқатар мемлекеттерінен қауіпсіздік мәселелері бойынша үйлестірушілер қатысуда.
Мұндай тұрғыдағы халықаралық конференция алғаш рет жаһандық деңгейде өткізіліп отыр.
Кездесу барысында қауіпсіздікті үш өлшемде: табиғи және техногендік сипаттағы төтенше жағдайлардың алдын алу және олардың салдарын жою, трансшекаралық қылмысқа және атап айтқанда оның лаңкестік, есірткі мен қару-жарақтың заңсыз айналымы, жасырын көші-қон және сол сияқты қауіпті көріністеріне қарсы тұру, сондай-ақ ақпараттық қауіпсіздік секілді өлшемдерде қамтамасыз ету жөніндегі ұлттық және өңірлік көзқарастар талқыланды.
Табиғи және техногендік апаттар мәселелері бойынша пленарлық отырыста Қазақстан Республикасы Президентінің көмекшісі – Қауіпсіздік Кеңесінің хатшысы Марат Тәжин баяндама жасады.
“Егемен-ақпарат”.