Ықпалдастық сипатындағы сапарлар

Кеше Сыртқы істер министрлігінде аталған ведомствоның баспасөз хатшысы  Ілияс Омаровтың қатысуымен брифинг өтті. Онда жақын күндерге жоспарланған мәселелер айтылды. Мәселен, 27-28 қазанда ҚР Пре­зиденті Н.Назарбаевтың Фран­цуз Республикасына ресми сапары өтеді. Сапар барысында Елбасының Франция Президенті Н.Саркозимен және Премьер-ми­нистрі Ф.Фийон­мен кездесулері көзделуде. Сапар шең­берінде “Н.На­зарбаев-Н.Сар­кози” Қазақ­стан-француз прези­дент­тік ко­миссиясының алғашқы оты­ры­сын, Қазақстанның Фран­ция­дағы экономикалық күндерін, Қа­зақ­стан-француз бизнес-фо­ру­мын ұйымдастыру жоспарланып отыр. Оған қоса, біздің еліміздің ЕҚЫҰ-ға төрағалығының баста­ма­ларын іске асыру мақсатында Париж Хартиясының 20 жыл­ды­ғы­на ар­налған дөңгелек үстел өтпек. “ҚР Президенті Н.Назарбаев­тың Парижге сапары аясында бір­қатар үкіметаралық және ведом­ствоаралық келісімдермен бірге коммерциялық келісім-шарттарға қол қою жоспарлануда” деді баспасөз хатшысы. Ал Қазақстан Республикасы Парламенті Мәжілісінің Төрағасы О.Мұхамеджанов бастаған парла­мент­тік делегация үстіміздегі жыл­дың 26-29 қаза­ны аралы­ғын­да Санкт-Петербург қаласында өтетін Тәуелсіз Мемлекеттер Дос­тастығы (ТМД), Еуразиялық эко­но­микалық қоғамдас­тығы (ЕурАзЭҚ) және Ұжым­дық қауіп­сіз­дік шарты ұйымы (ҰҚШҰ) Парламентаралық Ассам­блея­ларының іс-шараларына қатыс­пақ. Алдымен Қазақстан парла­мент­шілері өз жұмыстарын қазан­ның 26-сы, яғни сейсенбі күні Нева жа­ға­лауындағы қалада Жам­был Жа­­баев­тың ескерткішіне гүл шоқ­та­рын қою­дан бастайды. Осы күні ҰҚШҰ ПА Кеңесі жанын­дағы са­рап­та­ма­лық-консуль­та­тив­тік кеңес­тің, ТМД ПАА-ның жұ­мыс тобы­ның оты­рыстары өтеді. Сондай-ақ ҰҚШҰ ПА-ның тұ­рақты комис­сия­сының отырыста­ры жоспар­ланған. Соның ішінде ҰҚШҰ ПА-ның қорғаныс және қауіпсіздік жөніндегі тұрақты ко­миссиясының отырысына Мәжі­ліс депутаты Уәлихан Қоңырбаев қатысады. Қазанның 27-сі күні ТМД ПАА-ның тұрақты комиссия­лары­ның саяси мәселелер мен ха­лықаралық ынтымақтастық, аг­рар­лық саясат, табиғат ресурс­та­ры және экология тақырыптарын қамтитын отырыс­тары өтпек. Осы күні ТМД ПАА-ның жұмыс тобының отырысы болады. ТМД-ға мүше мемлекеттер үшін Ин­новациялық кодекстің үлгісін дайындау мәселесі қаралады. Сол күнгі бағдарламада сон­дай-ақ ЕурАзЭҚ Парламент­ара­лық Ассам­блеясының Бюросы және ҰҚШҰ ПА Кеңесінің оты­ры­сы және осы ұйымның төр­тінші жалпы жиналысы өтетіні қарастырылған. Бұл шаралар ҚР Парламенті Мә­жі­лісінің Төрағасы Орал Мұхамед­жа­новтың және Мәжіліс депутаты Әм­зебек Жол­шыбековтің қатысуымен өтеді. Қазанның 28-інде Қазақстан парламентшілері ТМД-ға мүше мемлекеттердің Парламентаралық Ассамблеясының 35-інші жалпы оты­рысының жұмысына қаты­сады. Сонымен қатар, аталған шара­лар аясында Санкт-Петербург қа­ла­сында Қазақстанның ЕҚЫҰ-ға төрағалығына арналған “ЕҚЫҰ және ТМД: жаңа мүмкіндіктер мен перспективалар” тақыры­бын­да халықаралық парламенттік конференция мен фотокөрме өткізу жоспарланып отыр. Ал 28-30 қазан аралығында Сауд Арабиясы Корольдігі Сырт­қы істер министрінің орынбасары Ханзада Халед бен Сауд бен Ха­лед Аль Сауд Астанаға жұмыс сапарымен келеді деп жоспар­ла­ну­да. Ол Ханзада Халедтің Орта­лық Азия елдеріне сапары шең­бе­рінде жүзеге аспақ. “Сапар барысында саудиялық делегация басшысының ҚР Сыртқы істер министрінің орын­басары Қ.Сарыбаймен келіссөз­дері жоспар­ланып отыр. Тараптар екі ел ынты­мақ­тастығының саяси, сауда-эко­номикалық және мә­де­ни-гумани­тар­лық салалардағы өзекті мәсе­ле­лерін, сондай-ақ ха­лықаралық және аймақтық ұйым­дар аясындағы өзара іс-қимыл­дың болашақтарын талқыламақ”, деді І. Омаров. “Егемен-ақпарат”.