Кеше Мемлекет басшысы Нұрсұлтан Назарбаев VII Қысқы Азия ойындары қарсаңында Астанадағы бірқатар спорттық нысандарда болып, олардың дайындығымен танысты. Сондай-ақ жаңадан құрылысы аяқталып, пайдалануға берілген республикалық велотрек ғимаратында «Астана» велокомандасы мен ҚР Велоспорт федерациясының басшыларымен кездесті.
Республикалық велотрек ғимараты велошабандоздың бас киімі пішінінде салыныпты. Әлемдегі ең бір озық үлгіде салынғандардың қатарынан табылады. Аталған велотрек велосипедшілердің UCI аудитінен өтіп, сарапшылар бұл кешенге тиісті бағасын беріп те үлгеріпті. Осы ретте спорт ғимаратында 25 метрлік бассейн бар екендігін айта кету керек. Сондай-ақ мұнда спорттың барлық түрлері үшін әмбебап зал, фитнес-клуб, 100 адамға лайықталып жасалған қонақ үй және мейрамхана орын теуіпті. Қонақ үй бөлмелері спортшыларға арнап шағын әрі ыңғайлы етіп жасақталыпты. Бұдан басқа, велотрек жобасына 2009 жылы мұз айдыны да қосылған. Аталған мұз айдынында Азия ойындары кезінде мәнерлеп сырғанаудан жарыстар өткізіледі деп күтілуде. Құрылысқа 20 миллиард теңге жұмсалыпты. Жаңа спорт кешені әр түрлі жарыстар өткізумен қатар, концерттер ұйымдастыруға да қолайлы саналады. Өйткені, мұнда қажетті акустикалық құрылғылар орнатылған.
Міне, осы ғимараттың үшінші қабатында сәл салқындау болса да Елбасын велокоманда мүшелері мен бұқаралық ақпарат құралдарының өкілдері күтіп тұрды. Спортшылардың өте көтеріңкі көңіл-күйде болғандығын айта кету керек. Мемлекет басшысы келді-ау деген мезетте күтіп алушылар үстеріндегі қалың киімдерін шешісіп, күтіп алу қамына кірісті. Өйткені, Елбасының өзі де ғимарат ішінің салқындығына қарамастан, костюмшең аралап жүрген болатын. Осы орайда велошабандоздармен кездесу емен-жарқын рәуіште өткендігін айта кету керек. Елордаға «Астана» командасының негізгі құрамының 17 спортшысы және бүкіл спорттық менеджмент арнайы келіпті.
Велоспорт федерациясының басшысы Қайрат Келімбетов, спортшылар және команданың менеджменті сөз орайы келгенде Нұрсұлтан Әбішұлына 2011 жылға арналған жоспарларын және команданың жаңа сипаты туралы жан-жақты айтып берді. Велокоманданың бас құрылтайшысы – «Самұрық-Қазына» қоры болғандықтан, оның басшысы ретінде Қайрат Нематұлы қордың әлеуметтік жобалары туралы, Азиаданы қолдау барысы жөнінде егжей-тегжейлі әңгімеледі. Велошабандоздар өз кезегінде велокоманданы үнемі қолдап келе жатқан Елбасына ризашылықтарын білдіру мақсатында спорттық велосипед және жеңімпаздың жейдесін сыйға тартты. Артынан «Астана» велокомандасының мүшелері Н.Назарбаевпен естелік суретке түсіп, жылы лебіздерін білдірді.
Бізге белгілі болғаны, «Астана» велокомандасы 2011 жылғы маусымға жаңарған топпен шығатындығы. Команда сапына 10 жаңа спортшы келсе, соның бірі қазақстандық спортшы Александр Винокуровпен бірге команда капитаны болатын чех спортшысы Роман Кройцигер. Маусым басталар алдында велокоманданың ішкі құрылымын өзгерту қолға алынып, ребрендинг орын алады деп күтілуде. Жаңа логотиптегі көрініс күн шұғыласындағы қыранның суреті және «Astana Pro Team» жазуы болады. Қараша айында «Астана» велокомандасы Велосипедшілердің халықаралық одағы – UCI-дің протур жарысына қатысу үшін жаңа үшжылдық лицензиясын алғаны белгілі. Команданың бас демеушісі «Самұрық-Қазына» ҰӘҚ болса, қор велокоманданы қаржыландырудан өзге, үстіміздегі жылы отандық спортты қолдау мақсатында 100 миллион доллар бөлген. Сонымен қатар, Қысқы Азия ойындарын өткізуге 3 миллиард теңгеден астам қаржыны тағы бөліп отыр.
Астаналық велокоманда капитаны Александр Винокуровті елордада бой көтерген республикалық велотрек туралы сұрау мақсатында әңгімеге тартқан едік. Ол әлемде жақсы велотрек жеткілікті болғанымен, кейде ғимараты келіспей жатады немесе керісінше, дей келіп, Астанадағы велотрек екеуі де жарасымын тапқан озық үлгі дегенді баса айтты. Президент спортты дамытуға ерекше ден қойып келе жатса, ендігі мәселе – жақын 2-3 жылда чемпиондарды осы велотректе тәрбиелеп шығару. Велошабандоздың пікірінше, елордалық велотрек азиялық емес, әлемдік сайыстарды да өткізуге әбден лайық. Жалпы құрылысы төрт жыл бойы жүргізілген аталған кешен Қысқы Азия ойындарын өткізудің орталығы және Қазақстанның велотрек құрамасының аренасы да болады. Жарыстардың бір бөлігі осы велотректе өтетінін де айта кеткен орынды.
Мемлекет басшысы сондай-ақ «Қазақстан» спорт сарайына іргелес тұрғызылған әрі жаңадан пайдалануға берілген «Ақбота» мұз айдынында да болды. Бұл нысанда шайбалы хоккейден клубтар арасындағы кездесулер басталар алдында, дәлірек айтқанда, хоккейшілер үлкен мұз айдынына шығар алдында дене қыздырып, бой жазады. Сонымен қатар, аталған мұз айдынында жасөспірім хоккейшілер де жаттығып, жарыстар өткізеді. Онда ойындарды тамашалауға келгендер үшін 1 мың орындық орнатылған. Бұдан бөлек спортшыларға қажетті басқа да жағдайлар жасалған.
Асқар ТҰРАПБАЙҰЛЫ, Суреттерді түсіргендер С.БОНДАРЕНКО, Б.ОТАРБАЕВ.