Ресей ғарышкері «Достық» орденімен марапатталды
Кеше Қарағанды облысындағы Жезқазған қаласынан 147 шақырым жерге «Союз ТМА-18М» ғарыш кемесінің ұшқыш басқаратын аппараты қонды. Халықаралық ғарыш стансасында жылдық экспедициясын тәмамдаған ерекше экипаж – орбитада жарты жылға жуық жұмыс істеген ресейлік ғарышкер Сергей Волков, сондай-ақ жылдық ғарыштық миссиясын толығымен орындаған ресейлік ғарышкер Михаил Корниенко мен америкалық астронавт Скотт Келли Жер-Ананың құшағына аман-есен оралды. Айта кетер бір жайт, М.Корниенко мен С.Келли жерге түскеннен кейін, Марсқа қонған сияқты қалыппен қону аппаратынан өз күштерімен шықты.
Ғарышкерлерді Орталық әскери округтің әскери және көлік авиациясы қарсы алды. Іздестіру-құтқару шараларына 200 әскери қызметкер, бортында арнайы құрал-жабдығы бар 12 Ми-8 тікұшағы, АН-12, АН-26 маркалы төрт ұшақ және жүрімділігі жоғары 18 бірлік автотехника жұмылдырылды.
Қазақстан тарапынан қарсы алушы делегацияның ішінде Халық Қаһарманы, Ресей Батыры, Қазақстан Республикасы Президентінің кеңесшісі, ұшқыш-ғарышкер Талғат Мұсабаев пен Халық Қаһарманы, ұшқыш-ғарышкер Айдын Айымбетов, Қарағанды облысы әкімінің орынбасары Андрей Ляпунов және басқалар болды. Жезқазған қаласының әуежайында көктен жаңа ғана түскен ғарышкерлермен болған кездесу барысында Қазақстан Республикасы Президентінің кеңесшісі Талғат Мұсабаев құттықтау сөз сөйледі. Қазақстан халқының атынан ғарышкерлердің иығына шапан жауып, сый-құрмет көрсетті. Бұдан кейін ол Мемлекет басшысы Нұрсұлтан Назарбаевтың тапсырмасы бойынша Қазақстан мен Ресей халықтары арасындағы достық пен ынтымақтастықты нығайтуға қосқан елеулі үлесі үшін Ресейдің ғарышкері Сергей Волковты Қазақстан Республикасының Мемлекеттік наградасы – 2-ші дәрежелі «Достық» орденімен марапаттады. Ерекше құрмет, жоғары наградаға тәнті болған ресейлік ғарышкер Елбасы Нұрсұлтан Назарбаев пен Қазақстан халқына деген шын жүректен шыққан алғыс сезімін жеткізді.
Еске салар болсақ, Сергей Волков 2015 жылдың 2 қыркүйегінде құрамында Еуропа ғарыш агенттігінің астронавты, даниялық Андреас Могенсен және қазақстандық ғарышкер Айдын Айымбетов бар экипаждың командирі ретінде «Союз ТМА-18М» ғарыш кемесімен жер төңірегіндегі орбитаға ұшқан еді. Халықаралық ғарыш стансасында бірнеше күн болғаннан кейін Айымбетов пен Могенсен 12 қыркүйекте жерге оралды да, экипаж командирі Сергей Волков болса өз міндетін әрі қарай атқару үшін ғарышта қалған болатын.
Жалпы, Ресейдің ұшқыш-ғарышкері Сергей Волков осымен үшінші рет ғарышты бағындырды. Алғаш рет ол ғарышқа 2008 жылы «Союз ТМА-12» кемесімен ұшты. Сол сапарында ғарышкер ашық ғарышқа екі рет шығып, кеңістікте 6 сағат 18 минут және 6 сағат 54 минут болған еді. Ғарышта көрсеткен ерлігі үшін С.Волков 2009 жылы Ресей президентінің жарлығымен «Ресей Батыры» атағымен марапатталған. Бұдан кейін Сергей Волков 2011 жылы ұзақ мерзімді МКС-28 және МКС-29 экипаждарының құрамында жер маңындағы орбитада өзіне жүктелген міндеттерді абыроймен орындаған болатын.
Қайрат ӘБІЛДИНОВ,
«Егемен Қазақстан».
Қарағанды облысы,
Жезқазған қаласы.