Қазақстандықтар Отанымыздың баянды болашағы, бақытты өмірі үшін бір кісідей дауыс берді
*Алматы Қабанбай батыр көшесінде жайласқан Ыбырай Алтынсарин атындағы №159 мектеп-гимназияның ауласына бас сұғып келіп жатқан дауыс берушілердің арасынан ең алдымен көзімізге түскені Тәуелсіз Қазақстан Үкіметінің алғашқы басшыларының бірі Сергей Терещенко еді. Алматының құрметті азаматы. Экс-премьер-министр сайлау учаскесінде көп аялдаған жоқ. Бұл кезде №372 сайлау учаскесінде халықтың қарасы көбейе бастаған. Мына ақсақал – Сұлтан Сүлейменұлы Жиенбаев. Жас ұрпақтың көбісі Сұлтан ағамыздың Ұлы Отан соғысының ардагері, еліміздің партия және мемлекет қайраткері екенін біле бермеуі де мүмкін. Дәл осындай құрмет пен ілтипат Медеу ауданының №371 сайлау учаскесінде де қайталанды. Бір қауым жұрт сайлау учаскесінің есігінен асықпай енген әлемге танымал ақын Олжас Сүлейменовті келбетінен бірден таныды. Өз миссиясын тез арада орындаған Олжас ағаны журналистер қауымы бірден ортаға алды. Ақыл-ойдың таусылмас кені – ғажайып ақын журналистердің барлық сұрағына ықыласпен жауап қайтарып жатты. «Жаңадан жасақталатын Парламентіміз өзімізге ежелден етене жақын байырғы «бірлік, ынтымақтастық, республиканың қарқынды дамуы», деген ұстанымда болады деген сенімдемін» деді Олжас Сүлейменов. Қазақтың бұлбұлы Бибігүл Төлегенова да осы учаскеден – Достық даңғылының бойына орналасқан №35 лингвистикалық гимназияда дауыс берді... Күннің көзі көктен жадырап, жер-дүние жаймашуақ күйге енгенде Алматы қаласы сайлаушыларының 30 пайызы дауыс беріп үлгерген. Кеш жатып, ерте тұратын Алматы жастарының алғашқы легі бұл кезде аттың басын сайлау учаскелеріне бұрған. Астанадағы Орталық сайлау комиссиясы кешкі 18.00-де Қазақстан халқының 75,16 пайызы сайлауға дауыс беріп үлгерді деген мәлімет таратты. Бұл кезде Алматыдағы сайлау учаскелеріне бас сұғып дауыс берушілердің саны да әлі де үзілмеген Байқаушылардың дені қым-қуыт қызметтің ешбір қиындықсыз аяқталып келе жатқанын байқағандай, жеңдерін сілкіп, сағаттарына қарай бастады... Талғат СҮЙІНБАЙ, «Егемен Қазақстан». Суретті түсірген Юрий БЕККЕР. *Ақтау Еліміздің Парламент Мәжілісі мен түрлі деңгейдегі мәслихаттарға депутаттарды сайлау Маңғыстау облысында жергілікті уақытпен таңертеңгі сағат 7.00-де басталды. Өңірде 199 сайлау учаскесі ашылған болса, ол бұрынғы сайлаулардан 22 учаскеге артық және биыл аталмыш учаскелерге 300 мыңнан астам сайлаушы тіркелген, сондай-ақ, барлық деңгейдегі мәслихаттарға 281 кандидат тіркелген. Наурыз мерекесімен тұспа-тұс келген сайлауды Маңғыстау облысында арасында 13 халықаралық байқаушы бар 300 байқаушы қадағалауда. Ақтау қаласындағы 29 шағын аудандағы орта мектеп ғимаратына бірнеше сайлау учаскесі шоғырланған. Патриоттық әндер шырқалып, кең аулада жәрмеңке ұйымдастырылған. – Біздің учаскеге 2436 сайлаушы тіркелген. Сағат таңертеңгі 9.00-ге дейін 300-ден астамы дауыс берді. Ешқандай құқықбұзушылық орын алған жоқ. Арасында сайлауды байқау жөніндегі республикалық қоғамдық комиссия мүшесі де бар байқаушылар келді. Ең қарт сайлаушымыз – Екінші дүниежүзілік соғыстың ардагері, 1920 жылы туған, яғни 96 жастағы Айберген Жүзбаев ақсақал, – дейді №23 сайлау учаскесінің төрайымы Рима Бекназарова. Р.Аяшқызының айтуынша, учаскеге алдыңғы лекте мүгедек ұлын ертіп келген қарт анаға арнайы сый-сияпат ұсынылыпты. Учаскеде М.Өскенбаев атындағы Маңғыстау облыстық филармониясының өнерпаздары келушілерді ән-жырмен қарсы алып жатты. Гүлайым ШЫНТЕМІРҚЫЗЫ, «Егемен Қазақстан». *Ақтөбе Қазақстан Парламенті Мәжілісі және барлық деңгейдегі мәслихаттар сайлауы күні болатын таңда аспаннан жауған ақ ұлпа қар түс ауа ғана ашылды. Мұның өзі сайлау науқанына деген ақтөбеліктердің ақ ниетіндей әсерге бөледі. Сайлаушылар облыс орталығындағы №61сайлау учаскесіне өздерінің азаматтық парызын өтеуге тым ерте жиналды десе де болғандай. Сайлау учаскесі ашылмай тұрып-ақ мұнда жиналған адам қарасы көп көрінді. Учаскелік сайлау комиссиясының мүшелері ерте қамданған сайлаушыларға ыстық шай ұсынып, өзара әңгіме-дүкен құруларына жағдай жасады. Сайлау учаскесі ашылысымен сексеннің сеңгіріне қадам басқан Юрий Малышкин бастаған қарттар бюллетеньдерін алып, азаматтық парыздарын өтеді. №61 сайлау учаскесінің төрайымы Роза Аманбаева қашаннан қалыптасқан ұстанымдарынан айнымаған қарттарға өзіндік сый-сияпатын жасады. Қарт сайлаушылардың мұндай ықыласқа көңілдері көтеріліп, мәз-мейрам болды. Олардың қай-қайсысының да айтары елдегі тыныштық пен бірлік, бақуатты тұрмыс жайы, сол үшін Елбасына деген ризашылығы дер едік. Бұл сайлау учаскесінде 1620 сайлаушы дауыс беруі тиіс екен. Отыз тоғыз сайлаушының үйлеріне барып, дауыс бергізудің шарасы алынған. Учаскеде сайлаушылар тізімі көрнекі жерге ілінген. Учаскелік сайлау комиссиясының мүшелері келген сайлаушыларды тізімнен тез тауып берді. Бірінше рет сайлауға қатысып отырған Камал Ерғазиев бұл күн өз өміріндегі ең бақытты сәт екенін жеткізді. Ал, ұзақ жыл мұғалім болған Аруза Үргенішбаева апайды жердің тайғақтығынан сақтанып, ұлы Азат ертіп келіпті. №61 учаскелік сайлау комиссиясының төрайымы Роза Аманбаева сайлаушылдардың тізімі нақытыланып, оларға шақыру қағаздары ертерек жеткізілгенінің нәтижесінде сайлаушылардың белсенділігі жақсы екенін айтты. Осы учаскеде 17.30 сағатқа дейін 1920 сайлаушының 1790-ы дауыс беріп үлгерді. «Қазақстан Республикасында сайлауды байқау жөніндегі республикалық қоғамдық комиссия» республикалық қоғамдық бірлестігі облыстық орталығының жетекшісі Халел Құсайыновтың айтуынша, жалпы облыста тіркелген 475447 сайлаушының 16.00 сағатқа дейін 72 пайызы дауыс берген. Сатыбалды СӘУІРБАЙ, «Егемен Қазақстан». *Атырау Атырау облыстық аумақтық сайлау комиссиясының төрағасы Асау Ибрашевтың мәлім етуінше, өңірде бұған дейін 9 аумақтық сайлау комиссиясы жұмысына кіріскен еді. Сонымен бірге, 134 округтік сайлау комиссиясы мен 234 учаскелік сайлау комиссиясының құрамы да жасақталыпты. Сайлау басталғанға дейін мұнайлы өңірде тұратын 302 186 сайлаушының дауыс беретіндігі белгілі болды. Дегенмен, Атырауға өзге өңірлерден вахталық ауысыммен жұмыс жасауға келетін мұнайшылардың бар екендігі ескерілді. Олардың саны – 3000-нан астам адам. Мәселен: «Туған жерімнен жырақта жүрсем де сайлауда өз таңдауымды білдіруге мүмкіндік алғаныма қуаныштымын. Мен еліміздің болашағы үшін дауыс бердім. Бұл – әр азаматтың парызы» деген Данагүл Елеуова Атырау қаласының іргесіндегі Талғайраң ауылдық округіндегі №77 сайлау учаскесінде дауыс беруге келді. Онымен бірге Атырау қаласынан 30 шақырымнан астам қашықтықтағы «Болашақ» мұнай мен газды кешенді дайындау қондырғысында бірге еңбек ететін 2300 адам арнайы автобустармен сайлау учаскесіне жеткізілді. Сол секілді Атырауға өзге өңірлерден келгендер «Қашаған» кенішінде де жұмыс жасайды. Мұнда ауысымдық жұмысқа тартылған 700-ден аса отандастарымыздың өз таңдауын жасауы үшін сайлау бюллетеньдері арнайы тікұшақпен жеткізілді. Осы кезеңде Атырауда судан маржан сүзетін балықшылардың көктемгі балық аулау науқаны да бастау алды. Дегенмен, олар да өздерінің таңдауын білдіруіне мүмкіндік алып, Дамбы ауылындағы №83 сайлау учаскесіне ұйымшылдықпен келді. Бұл күні Атыраудағы тағы бір сайлау учаскесі – №83 сайлау учаскесінде Нұртай Өтеғұловтың мұнайшылар әулеті дауыс берді. Оның өзі отыз жылдан бері мұнай-газ өнеркәсібі саласында абыройлы еңбек етіп келеді. «Біз сайлауда дауыс беру арқылы еліміздің дамуына, өсіп-өркендеуіне атсалысамыз», дейді өз ісінің білгір маманы Нұртай Жанарұлы. Сайлау учаскелеріндегі сайлау үдерісін халықаралық 12 байқаушы бақылады. Оның ішінде ЕҚЫҰ-дан – 10, ТМД байқаушылар тобынан 2 байқаушы бар. Жолдасбек ШӨПЕҒҰЛ. «Егемен Қазақстан». Суретті түсірген Рахым ҚОЙЛЫБАЕВ. *Көкшетау Сайлау белгіленген 20 наурыз күні тура таңғы сағат алтыда Көкшетаудағы №1 мектепте орналасқан №6 сайлау учаскесінің есігі айқара ашылды. Қазақстан Республикасының Әнұраны орындалған соң алғашқы дауыс беру құрметі 88 жастағы еңбек ардагері Айдархан Темірбаевқа берілді. Одан кейінгі кезек сервистік-техникалық лицейдің оқушысы Батырхан Жылқайдаровқа тиді. Ол еліміз үшін аса маңызды саяси науқанға тұңғыш рет қатысып отыр. Қос ұрпақтың өкілі «Мәңгілік Ел» мұраттарына сапар бастаған Тәуелсіз Қазақстанымыздың жарқын болашағы үшін дауыс бергендерін айтты. Бұл екі азаматқа арнайы сыйлықтар тапсырылды. Аталған учаскелік сайлау комиссиясының төрайымы Ирина Головченконың айтуынша, сайлау учаскесінде 3907 сайлаушы тіркелген. Алғашқы екі сағатта олардың 17 пайызы азаматтық парызын өтеуі жоғары белсенділікті айқындайды. Мұнда бүгін 19 қыз-жігіт бірінші рет дауыс берсе, 30 адамның үйіне жылжымалы жәшік жеткізіледі. Облыстық сайлау комиссиясының төрағасы Әділхан Шаяхметов бізбен әңгімесінде өңірдегі 785 учаскеде сайлау белсенділікпен өтіп жатқанын мәлімдеді. Мұнда сайлауды өткізуге қатысты жағдайлардың бәрі жасалып, дауыс берудің заңдық талаптары қамтамасыз етілген. Жалпы, осынау айтулы күні 470 мыңнан астам адам дауыс берсе, олардың 18-інің жасы 100-ден, ал Көкшетау қаласының 600 тұрғыны 90 жастан асқан қариялар екен. Сондай-ақ, 3 мыңнан астам жас бірінші рет сайлау учаскелеріне келіп отыр. Сайлаудың әділ де таза өтуіне 6 мыңнан астам байқаушы септік жасайтын болады. Олардың қатарында Франция мен Финляндиядан келген екі ұзақ мерзімді байқаушы және ТМД Парламентаралық Ассамблеясының 3 мүшесі бар. Бақберген АМАЛБЕК, «Егемен Қазақстан». *Қарағанды Қарағанды қаласындағы Нұркен Әбдіров атындағы спорт сарайында орналасқан №58 сайлау учаскесінде «Шахтер» футбол клубының ойыншылары Евгений Горячий мен Сергей Ветров өз таңдауларын жасап, дауыс берді. – Мен бүгін дауысымды өзім таңдаған партия мен үміткерге бердім. Жалпы, демократиялық бағыт ұстанған қоғамда өмір сүріп отырғандықтан, сайлау учаскесіне барып, дауыс беру әрбір қазақстандықтың азаматтық борышы деп білем. Ендігі тілегім мен дауыс берген үміткер сайлауда жеңіп шығып, елімізде саламатты өмір салтын қалыптастыру ісін ілгері жылжытуға өз үлесін қосса деймін, – деді «Шахтердің» қорғаушысы Евгений Горячий. Дауыс берген футболшыларды қолдап, сайлау учаскесіне «Шахтердің» ойыншылары, команда капитаны Андрей Финонченко мен Қазақстан құрама командасының мүшесі Мақсат Байжанов келді. Аталған сайлау учаскесінде болған байқаушылармен тілдескенімізде, олардың бәрі де бұл жерде ешқандай заң бұзушылықтың болмағанын, сайлаудың демократиялық талаптарға сай өткенін айтты. «№58 сайлау учаскесі таңғы 7.00-ден бастап жұмыс істеді. Таңдаушылардың белсенділігі түске дейін де, түстен кейін де бір сәт саябырсымады. Тұрғындар сайлауға көтеріңкі көңіл-күймен, көбісі бала-шағасымен келді. Сайлау үлкен ұйымшылдықпен, демократиялық талаптардың бәрі орындалып, өте дұрыс өтті. Техникалық тұрғыдан ұйымдастырылуы да өте жақсы болды. Сайлау барысында Қазақстан заңдары мен нормаларының барлық талаптары орындалды. Бұл орайда біздің ешқандай ескертуіміз болған жоқ», – деген пікір білдірді тәуелсіз байқаушы Мұрат Сембаев. Қайрат ӘБІЛДИНОВ, «Егемен Қазақстан». *Қостанай Кеше Қостанайда таң атқаннан жапалақтап жауған наурыздың ақша қары кешке дейін тыйылған жоқ. Сайлаудың жауапкершілігін аса сезінген қостанайлықтар өліараның мінезін елер емес. Әдетте, демалыс күні таңертең көшеде кісі қарасы аз болатын. Ал сайлау күні борап тұрған қарға қарамай, жасы да, кәрісі де сайлау учаскелеріне ағылды. Қостанай қаласындағы №62 сайлау учаскесі орналасқан облыстық «Мирас» мәдениет үйінің алды сағат 10.00-ден кейін халықтық мерекеге айналғандай болды. Қаладағы «Ақ дариға» әжелер ансамблі әнді бастап жіберген екен. Дауыс беріп шыққан сайлаушылар жапалақтап жауған ақша қардың астында әжелер әніне дөңгелене вальс билей жөнелді. «Еліміз аман болсын, жұртымыз аман болсын! Еліміздің ертеңі үшін дауыс бердік», дейді олар. Барлық сайлау учаскелеріне сайлаушылар таңертеңгі 8.00-ден келе бастады. Әсіресе, сағат 10.00-ға қарай дауыс беретіндер кезекке тұрды. – Сайлаушылар белсенділігі өте жоғары, түске дейін олар бірнеше рет кезекке тұрды. Бұрын әдетте, таңертеңгі мезгілде негізінен құсұйқы аға ұрпақ өкілдері келуші еді, бұл жолы жастардың белсенділігі риза етті, – дейді №62 сайлау учаскесінің төрайымы Ольга Малых. Республикалық орталық сайлау комиссиясының мәліметінше, сайлаушылардың дауыс беруі жөнінен күндізгі сағат 10.00-де Қостанай облысы топ бастады. Облыс әкімі Архимед Мұхамбетов №21 сайлау учаскесіне келіп дауыс берді. – Облыстың жергілікті атқару органдары сайлау алдында үлкен ұйымдастыру жұмысын жүргізді. 357 ірі сайлау учаскелерінде сайлаушылардың мекенжай мәліметін алатын бекеттер құрылды. Барлық аудандар мен қалаларда колл-орталықтар сайлаушыларға қолайлылық туғызды. Бүгін барлық сайлау учаскелерінде тұрғындардың дауыс беруі үшін коммуналдық және жол қызметі үзіліссіз жұмыс істейді, – деді Архимед Бегежанұлы. Қостанайлықтардың дауыс беру белсенділігі қалалармен қатар, аудандарда, шалғай ауылдарда жоғары болды. Сайлау күні 818 сайлау учаскесі облыстағы 550 мың сайлаушыларына есігін айқара ашты. Облыстық сайлау комиссиясы түстен кейін, сағат 16.00 шамасында облыс бойынша сайлаушылардың 68 пайызы өз таңдауын жасағанын айтты. Нәзира ЖӘРІМБЕТОВА, «Егемен Қазақстан». *Қызылорда Сыр еліндегі сайлау қарқынды өтті. Облыстық, қалалық, аудандық мәслихат депутаттығына ұсынылған 362 кандидат белгіленген 147 орыннан үміткер. Былай айтқанда, депутаттық 1 мандатқа 2,5 кандидаттан бәсекелес келіп тұр. Мәслихат депутаттығына тіркелген кандидаттардың орташа жасына тоқтала кетейік. Облыстық мәслихатта – 49 жас, аудандық мәслихаттарда – 45 жас, ал қалалық мәслихатта 41 жас айырмасымен тұр. Сондай-ақ, 30 жасқа толмаған азаматтардың саны 16 пайызды құраса, 30-60 жас арасындағы кандидаттар 80 пайызды, 60-тан асқан кандидаттар қалған 4 пайызды құрайды. Үміткерлер ішінде ер адамдар саны – 295, нәзік жандылардың 67-сі депутаттық орынға үмітті. Кандидаттардың басым бөлігі жоғары білімді, олардың ішінде мұғалім, инженер, экономист, заңгер, дәрігер, ауыл шаруашылығы саласының мамандары мен өзге саланың өкілдері бар. Қалған үміткерлер де арнаулы орта және кәсіптік орта біліммен қаруланған. Барлық тіркелген кандидаттардың 217-і өзін өзі ұсыну жолымен, 143-і «Нұр Отан» партиясымен, 1-і «Ауыл» ХДПП, 1-і – «Ақжол» ҚДП-дан ұсынылған. 144 үміткер «Нұр Отан» партиясының мүшесі, 2-еуі «Ауыл» ХДПП, 1-еуі «Ақжол» ҚДП мүшесі болса, қалған 222 кандидат партиялар қатарында жоқ. Қызылорда облысында сайлау барысын 19 халықаралық байқаушы қадағалады. Олардың 10-ы Еуропадағы қауіпсіздік және ынтымақтастық ұйымынан болса, 7-еуі Түркітілдес елдер ынтымақтастық кеңесінің және 2-еуі ТМД мемлекеттерінен келген халықаралық байқаушылар. Сонымен қатар, саяси партиялар өкілдері, кандидаттардың сенім білдірген адамдары мен қоғамдық ұйымдардың 5000-ға жуық байқаушылары жұмыс жасады. Облыстық сайлау комиссиясына сайлау заңнамаларының бұзылуы жөнінде арыз-шағым түскен жоқ. Халық Мәжілістің кезектен тыс, жергілікті мәслихаттардың кезекті сайлауына белсенді қатысты. Ержан БАЙТІЛЕС, «Егемен Қазақстан». *Орал Наурыз айы туғалы тұнжырап тұрған Ақжайық аспаны кешегі Парламент Мәжілісі мен барлық деңгейдегі мәслихаттар депутаттары сайлауы күні жадырап сала берді. Шәйдай ашық күн. Көгілдір көктемнің саф ауасы сайлаушылар белсенділігін одан әрі көтере түскендей әсер қалдырды. Облыста құрылған 520 сайлау учаскесінің бәрінде де қызу қарбалас байқалды. Таңертеңгі және түске дейінгі уақытта пайда болған сайлаушылар кезегі мыңдаған батысқазақстандықтардың өз дауыстарын ертерек беріп үлгеруге асыққандарын айқын аңғартқандай. Батыс Қазақстан облыстық сайлау комиссиясының төрағасы Ғайса Қапақов, өңірде түрлі деңгейдегі мәслихаттар депутаттығына 580 үміткер тіркелгенін мәлімдеді. Бұл дерек бір орынға үш үміткер бақ сынағанын, сайлаудың мейлінше тартымды да тартысты болғанын көрсетеді. Өңірге Еуропадағы қауіпсізік және ынтымақтастық ұйымы мен ТМД-дан келген байқаушылар облыстағы сайлау үдерістері халықаралық нормалармен бекітілген тәртіпке сай өткенін айтып берді. Солардың бірі Ресей Федерациясы Саратов облыстық сайлау комиссиясы төрағасының орынбасары Юрий Бризгалин Қазақстандағы Парламент Мәжілісі мен барлық деңгейдегі мәслихаттар депутаттары сайлауын өткізу мен ұйымдастыру ісінде үйренуге тұратындай жайттар бар екеніне тоқталды. Сонымен бірге, ол өңірдегі жас сайлаушылардың белсенділігіне көңілі толғанын жеткізді. Бұл фактор Қазақстанда жастардың өз мемлекетінің болашағына салғырт, немқұрайлы қарай алмайтынын көрсетеді, деді байқаушы одан әрі. Біз кеше Орал қаласының алтыншы шағын ауданындағы №502 сайлау учаскесінен дауыс беріп шығып келе жатқан жас сайлаушының бірін әңгімеге тартқан едік. Ол өзін Диана Әбуова деп таныстырды. Облыс орталығында орналасқан «КазТрубПром» ЖШС-да техника қауіпсіздігі жөніндегі инженер болып қызмет жасайды екен. Биылғы Парламент сайлауына алты бірдей саяси партияның қатысуы еліміздің демократиялық тұрпаттағы бет-бейнесін тереңдете түседі. Партиялар бәсекелестігі елдің дамуының бір тұтқасы бола алады деген ойдамын. Сондықтан да, мен бағдарламасы айқын, іс-қимылы нақты партияның біріне дауыс беріп шығып келемін, деді ол газет тілшісіне. Ал «Егемен Қазақстанның» Орал қаласындағы тілші қосынына шалғайдағы Жаңақала ауданынан телефон шалған Ұлы Отан соғысының ардагері, жасы 93-ке келген қарт майдангер Мәжит Жаданов бұған дейін қалыптасқан әдетінше сайлау учаскесіне ерте келгенін хабарлап, сайлаудың уақытынан бұрын өткізілгені дағдарысты еңсерудің таптырмас бір тетігі бола алғанын айтып берді. Орал өңіріндегі сайлау серпілісі жөніндегі кейбір ой-үзіктері осындай. Темір ҚҰСАЙЫН, «Егемен Қазақстан». Суретті түсірген Рафхат ХАЛЕЛОВ. *Өскемен Шығыс өңірі Мәжіліс пен мәслихат сайлауларына бір кісідей белсене қатысты. Сағат 7.00-де өңірдегі 1075 сайлау учаскесі дауыс берушілерге есігін айқара ашты. Барлық учаскеде концерттік бағдарлама мен жәрмеңке ұйымдастырылып, жергілікті өнерпаздар саяси маңызы зор шараны шат-шадыман мерекеге айналдырды. Облыс орталығында соңғы жылдары бой көтерген №19 шағын ауданның тұрғындары таңмен таласа тұрып, биыл пайдалануға берілген №46 мектепте орналасқан №95 сайлау учаскесіне дауыс беруге ағылғанының куәсі болдық. Сондай-ақ, Назарбаев зияткерлік мектебінде орын тепкен №2 және №1136 сайлау учаскелеріндегі ұзын-сонар кезек те шығысқазақстандықтардың саяси белсенділігінің айғағындай әсер қалдырды. Сәуір Дәнебаев есімді ақсақалды сөзге тартқанымызда, зерлі шапан киген қазақы қалыптағы қария Ұлыстың ұлы күнімен қатар келген сайлаудың халықтық мерекеге айналғанын айтты. Таңдау жасауға отбасымен келушілер қатарының көбеюі де шығысқазақстандықтардың шынайы ықыласы іспетті. Мәселен, ата-әжесі, немерелерімен бірге келген өскемендік Кенешбаевтар отбасы №18 сайлау учаскесінде дауыс берді. «Бізден 4 жасар Исмаил есімді немереміз де қалған жоқ. Олар осы кезден бастап, өздерінің саяси құқығы туралы білгені абзал», деді әулеттің әжесі Париха Байдурахманқызы. Өңірдің барлық қалалары мен аудандарында да сайлауға қатысушылар деңгейі жоғары. Мәселен, Курчатов қаласында 7664 сайлаушы болса, олардың 42 пайызы таңғы сағат 11.00-ге дейін өз таңдауларын жасап үлгерді. Сайлау күнінде өңір жастары әлеуметтік желі арқылы халықты дауыс беруге шақырған ерекше эстафетаны бастады. Ағылшынның «follow me», яғни, «соңымнан ер» мағынасын беретін сөзімен сайлау учаскелерінен күрделі селфи жасап, фотосуреттерін әлеуметтік желіге орналастырған шығысқазақстандық жастардың бастамасын басқа аймақтар да қолдап, жалғастырды. Думан АНАШ, «Егемен Қазақстан». *Павлодар Облыс орталығындағы №59 сайлау учаскесі Суворов көшесі 3, №1 мектепте орналасқан. Өз елінің болашағы үшін таңдауын жасауға келген әрбір тұрғын кезегі келгенде кабинаға қарай өтіп, дауыс берді. Осы учаскеде алғашқылардың бірі болып дауыс берген зейнеткер Валентина Соколова деген қарт сайлаушы осындай қарттық жасымда дауыс беремін деп ойлаған да жоқпын. Жақсы өмір адамға ұзақ ғұмыр сыйлайды екен. Дауыс беру – қазақстандықтар үшін маңызды күн. Болашақ қазақстандықтар – немерелеріміз жақсы уақытта тыныштықта өмір сүрсін. Сол үшін дауыс беріп таңдау жасадым, – дейді әжей. Ал біз бұдан әрі қарай барып көрген №28 сайлау учаскесінде Лермонтов, Кутузов және Павлов көшелері бойында тұратын тұрғындар дауыс берді. №28 аумаққа тиесілі тұрғындардың жалпы саны 1816 адам. Ертеңгілік алғашқы болып дауыс беруге зейнеткер Дәуіт ата мен апамыз, яғни Рақымғалиевтер отбасы келді. Сайлау учаскесінің төрайымы Тілеулес Қалиеваның айтуынша, ашылған уақыттан бастап алғашқы сағатта 50-ден аса сайлаушы келіп дауыс берді. Жақсы белсенділік көрсетті дейді. Сайлау бөлімшесінде 7 байқаушы жұмыс жасады. Облыстық мәслихаттың №14 аумақ бойынша сенімді өкілі Сәуле Иксатованың айтуынша, байқаушылардың негізгі міндеті сайлаушылар құқықтарының сақталуын және сайлаудың ашық өтуін қадағалау. Осы бөлімшеге тіркеулі 1816 тұрғынның 32-сі денсаулықтарына байланысты өз үйлерінде дауыс берді. Олардың мекен-жайына комиссия мүшелері сағат 12-ден бастап бюллетеньдерді жеткізді. Сондай-ақ, кәмелет жасына толып, алғаш рет дауыс беретін 11 жас тіркелді. Облыста 569 сайлау учаскесі жұмыс жасады. Облыстық сайлау комиссиясының төрайымы Әлия Сабырханованың айтуынша, жалпы, облысқа ТМД-дан 16 байқаушы келген. ЕҚЫҰ-дан келген бақылаушылар қатарында АҚШ, Австрия, Ирландия, Германия, Польша елдерінің өкілдері Ақсу, Екібастұз, Қашыр, Баянауыл аудандарында өздерінің байқаушылық міндеттерін атқарды. Фарида БЫҚАЙ, «Егемен Қазақстан». *Петропавл Облыстық сайлау комиссиясы берген мәлімет бойынша 390 мыңнан астам сайлаушы тіркеуге алынып, басым бөлігі өз таңдауларын жасады. Таңғы сағат тілі 7-ні көрсетісімен облыс орталығынан шеткері орналасқан Борки кентіндегі №693 сайлау учаскесі өз есігін айқара ашты. Учаске табалдырығын бірінші болып Астанадағы медициналық университетте оқитын студент қыз аттады. Сұрастыра келе аты-жөні Фатима Әлжанова екенін, ата-анасы тұрып жатқан қалаға келгенін білдік. Оқу озаты алғаш рет дауыс бергенін мақтанышпен жеткізді. Осындағы сайлау учаскесінің төрайымы Жанна Бережная 1436 сайлаушының тіркелгенін, екі байқаушының қадағалауымен айналысып отырғанын мәлімдеді. №692 сайлау учаскесіне келгенімізде адам қарасының молдығын аңғардық. 1652 сайлаушы үшін 6 кабина жұмыс істейді. Мұнда да партиялар мен жергілікті мәслихат депутаттығына үміткерлердің сенімді өкілдері өз істеріне қарқынды қимылмен кіріскен. Аймақ басшысы Ерік Сұлтанов облыстық балалар мен жасөспірімдер шығармашылық орталығында орналасқан №644 сайлау учаскесінде өз таңдауын жасағаннан кейін БАҚ өкілдеріне сұхбат берді. Ол өз сөзінде сайлаудың маңыздылығын, Мемлекет басшысы елдің тұрақты дамуы үшін ауқымды міндеттер қойғанын атап өтті. Сағат 10-да Сайлау барысын білу мақсатымен облыстық сайлау комиссиясымен хабарласқанымызда өңір тұрғындарының 23,85 пайызы бюллетень алғанын, Ғ.Мүсірепов, Уәлиханов, Есіл аудандарында саяси белсенділік бұдан да жоғары екенін білдік. Осы кезде бұрыннан көзтаныс Амангелді деген азамат телефон соғып, №640 сайлау учаскесінде тұрғанын, тізімнен аты-жөнін таппағандықтан, таңдау жасай алмай отырғанын ренішті үнмен айтты. Мұндай оқиғаны біз №635 сайлау учаскесінде де кезіктірдік. Алайда, кінә кейуананың өзінен екенін сайлау учаскесінің төрайымы Галина Митрофанова байыппен түсіндіріп, мәселені тез-ақ шешіп берді. Арагідік кездескен мұндай кем-кетіктер сайлауға көлеңке түсіре алмасы анық. Сағат тілі 12-ні нұсқағанда солтүстікқазақстандықтардың – 48,1, сағат 14.00-де 61,2, сағат 18.00-де 76,48 пайызы өз таңдауларын жасағандары белгілі болды. Өмір ЕСҚАЛИ, «Егемен Қазақстан». *Тараз Жамбыл облысының сайлаушылары өткен науқанда асқан белсенділік танытты. Облыстық сайлау комиссиясының берген мәліметіне қарағанда, түс ауғанша-ақ жамбылдық сайлаушылардың жартысынан астамы, нақтырақ айтсақ, 400767 дауыс беруші өз таңдауларын жасап үлгерді. Бұл жалпы сайлаушылардың 76,3 пайызын құрайды. Учаскелерде сайлаушыларға барлық жағдай жасалған. Аулада әсем ән қалықтап, жас өрендер келушілерге өз өнерлерін паш етуде. Тараз қаласындағы №50 сайлау округіне дауыс беруге алғаш болып келген 18 жастағы Қуаныш Алтынбек пен Ботагөз Әлібаеваның қуаныштан жүздері бал-бұл жанады. Екі жас ел тағдыры шешілетін жауапты сәтке бей-жай қарай алмайтындарын айтады. «Бұл сайлау учаскесі орналасқан №53 орта мектеп менің білім алған шаңырағым. Сондықтан, бұл ғимарат мен үшін өте ыстық. Таңертең ерте тұрып, сайлау учаскесіне жеткенше асық болдым, бұл мен үшін үлкен жауапкершілік. Біз елдің ынтымағы, татулығы, тұрақтылығы үшін дауыс бердік. Себебі, ел келешегі – бұл біздің де келешегіміз. Оны жақсы түсінеміз. Біз бейбітшілік пен келісімде, тұрақтылықта өмір сүргіміз келеді. Ол үшін келешек ұрпағымыздың жарқын болашағы үшін сенімді болуымыз керек», дейді Қуаныш Алтынбек ағынан жарылып. Әрине, әр сайлау елді бірлікке шақырып, жұртты еңбекке ұйытуы қажет. Бұл күні өз таңдауларын жасауға асыққан көп жұрттың шат-шадыман көңіл-күйлерін байқап, ынтымағы мен бірлігі жарасқан ел екеніміздің тағы да бір нышанын көргендей қуанып қалдық. Оралхан ДӘУІТ, «Егемен Қазақстан». Суретті түсірген Ақәділ РЫСМАХАН. *Талдықорған Бұл күні Жетісу жерінде күн шайдай ашық болды. Жадырай әрі әдемі киімдерін жарастыра киінген ауылдар мен қалалардың тұрғындары сайлау учаскелеріне қарай ағылды. Әр учаскеге кірер есікте сыпайы ғана сәлем бере жол нұсқаған жандарға алғыстарын ағытқан қариялар мен әжелер жеке куәліктерін көрсетіп, тиісті бюллетеньдерін алған соң, перде ішіне еніп өз таңдауларын жасап, шығып жатты. Бейбіт өмір мен жарасты тірлікке тәубе еткен қариялардың бірі – 111 жастағы Қанияхан Тұқаева Талғар ауданы, Тұздыбастау ауылындағы №931 сайлау учаскесінде конституциялық құқығына сай азаматтық міндетін әрі парызын өтесе, ең жас сайлаушы Маржан Сейтқожа Райымбек ауданы № 627 сайлау учаскесінде дауыс берді. Негізі Алматы облысы бойынша 990021 сайлаушы дауыс беруі керек болса, бұл күні сағат 16.00-ге дейін 889877 сайлаушы, яғни 89,88 пайызы өз таңдауларын жасап үлгерді. Тағы ерекше айта кетер жайт Жетісу жерінде 103 этнос өкілдерінің бірде-бірі саяси науқаннан шет қалмады. Адамдардың жадыраған жүзі, асықпай-аптықпай сайлау учаскелеріне келіп-кетулері де елдегі тыныштықтың берік орын алғандығын айқын көрсетеді. Бұл көріністерге Талдықорғанға қысқа мерзімге байқаушы болып Германиядан келген Бриджет Дайбер және Ресейлік Александр Шалах куә болғанын да айта кеткен дұрыс. Бір кісідей азаматтық парызын өтеушілер қатарында Алматы облысының әкімі Амандық Баталовта Талдықорғандағы №866 сайлау учаскесінде өз таңдауын жасады. Сөйтіп, ел бірлігінде өзіндік орын алатын бұл сайлау да ашықтық пен жариялылықты айқын көрсетті. Нұрбол ӘЛДІБАЕВ, «Егемен Қазақстан». *Шымкент Сайлауда дұрыс таңдау жасау елдің ертеңін еңселі етеді. Жасы жүзден асса да, екі ғасырдың дәмін татса да тәтті өмірге құлшынысын жоғалтпаған, болашақ үшін алаңдайтын қазығұрттық кейуана Жазира апайды сайлау учаскесіне жетелеген осы күш. Бірінші болып таңдауын жасап, саяси науқанның дұрыс өтіп, азаматтардың ел пайдасына жұмыс жасауына батасын берді. Күндізгі сағат 14.00-ге дейін облыстағы сайлаушылардың 68,70 пайызы өз таңдауларын жасап қойды. Ал қай аудандар белсенді десек, осы мезгілге дейін Шардара ауданының сайлаушылары 72,20 пайыз дауыс берді. Одан кейін Сайрам және Отырар аудандары келеді. Он сегізінші наурызға дейінгі мәлімет бойынша, 812 үміткер тіркелген болатын. Оны жіктер болсақ, облыстық мәслихатқа 127 азамат, аудандық мәслихатқа 488 азамат, қалалық мәслихатқа 197 азамат сайлауға түсті. Бір орынға 2,6 үміткер бағын сынауда. Сайлаудың дұрыс өтіп жатқанына өзіміз де көз жеткіздік. Өз учаскемізде отбасымызбен таңдау жасадық. Байқаушылар қай-қайсында да көп. Тәртіп сақшылары, жедел жәрдем машинасы сияқты керектің бәрі бар. Шетелден арнайы келген сайлауды байқаушылар да кезек-кезегімен сайлау учаскелерінде жүр. Күндізгі сағат 16:00-ге дейін оңтүстікте 80,92 пайыз сайлаушы өз таңдауларын жасап үлгерді. Бақтияр ТАЙЖАН, «Егемен Қазақстан».
•
21 Наурыз, 2016
Өзіміз үшін маңызды, еліміз үшін маңызды!
1238 рет
көрсетілді