Кеше Орталық коммуникациялар қызметінде «Қазақстандағы Парламент сайлауы-2016: нәтижелері мен бағыттары» тақырыбында дөңгелек үстел өтті. Оған Президент жанындағы Қазақстанның стратегиялық зерттеу институтының директоры Ерлан Қарин және ақылы орталықтардың сарапшылары мен БАҚ өкілдері қатысты.
Жиында Ерлан Қарин алдымен қазақстандықтарды Наурыз мерекесімен құттықтады. Мұнан соң ол сайлау науқанының жоғарғы деңгейде ұйымдастырылғанын тілге тиек етті.
– Өткен сайлау елдегі жаңа саяси дамудың, жаңа өзгерістердің бастауы деуге болады. Біз сайлауалды науқаннан бастап сайлау кезіндегі барлық үдеріске мониторинг жүргізіп отырдық. Алдын ала мәлімет бойынша, әрине, Парламентке бұрынғы шақырылымдағы партиялар ғана өткен. Алайда, сараптамаға сенер болсақ, Мәжілісте біраз жаңа тұлғалар, біраз жаңа есімдер пайда болады, – деді Ерлан Қарин.
Сондай-ақ, дөңгелек үстелде тәуелсіз сарапшылар да сөз алып, саяси доданың ұйымдастырылу барысы мен сайлаушылардың белсенділігі жайында пікірлерін білдірді. Әсіресе, мамандар саяси партиялардың сайлауалды үгіт-насихат жұмыстары кезінде әлеуметтік желілерді қолдану барысын сөз етті. Саясаттанушы Жарқын Түсіпбекұлы сайлау науқаны кезінде әлеуметтік желілердің рөлі ерекше болғанын атап өтті.
– Жастар арасында, әлеуметтік желілерде дауыс беру процесінен түсірілген фотолар сәнге айналды. Бұл міндетті түрде саяси тұрғыда самарқау азаматтарға ықпал етеді. 2012 жылы АҚШ-тағы президент сайлауы кезінде халықтың 30 пайызы әлеуметтік желілерде посттарды оқығаннан кейін сайлауға барғандарын мойындаған. Ал тағы 20 пайызы әлеуметтік желілерді пайдаланып, өзгелерді сайлауға үгіттеген. Осы үрдіс бізге келгенін биыл саяси партиялар түсінді деп ойлаймын, – деді Ж.Түсіпбекұлы.
Айта кетейік, шарада сарапшы мамандар өткен сайлау науқанындағы қазақстандықтардың белсенділігін, жастардың өз таңдауын жасауда құқықтарын сақтағанын жарыса сөз етті. Ең бастысы – әлемнің назары ауған саяси доданың әділ өткені Қазақстанның мәртебесін асқақтата түсті, деді олар.
Талғат РАЙЫМБЕК,
«Егемен Қазақстан».