Ғылымға жастарды тарту ұрпақтар сабақтастығын бекемдейді

Ақыл-ойға сүйенбей қарабай­­ыр тірлікке бой алдырған елдің ертеңі күңгірт, жүрер жолы бұ­лыңғыр болатынын уақыт  көр­сетіп отыр. Ғылым мен техника дамыған ХХІ ғасырда оның жа­лына жабысқандар ой еңбегі мен дене еңбегін таразы табағында теңдеп, пайдалысы мен зиянын, яғни тарыны қылпығынан ажы­ратқандардың келешегі кемел, болашағы зор екенін көріп те, біліп те отыр. Осындай ой арқауын отандық ғылым күніне орай Білім және ғылым министрлігі өткізген алқалы басқосуда Аста­на­ның зиялы қауым өкілдері та­ратып айтты. Кездесуді министр Бақытжан Жұмағұлов ашып, білім және ғы­лым саласы қызметкерлерінің Ел­басы сайлауында белсенділік та­нытқанын атап өтіп, ғылым ме­рекесін алдағы уақытта мемлекеттік деңгейде өткізу қажет­ті­гін қоз­ғады. Сонымен қатар ол 2009 жылдың қыркүйек айында Президент Нұрсұлтан Назарбаев ғы­лымның жаңа моделін белгілеп бергенін, соның аясында дәуір дамуына сай «Ғылым туралы» жаңа Заң қабылданғанын тілге тиек ете отырып, осы құнды құ­жатты қабылдауға септігін тигізген барлық азаматтарға алғыс айтты. Бірден айтайық, біздің Отанымызда жан-жақты дамы­ған ғылым да, ғылыми мектеп те, оған ұйытқы болып отырған әлемдік деңгейдегі ғалымдар да бар. Олардың кейбір ізденістері өз мемлекетімізде ғана емес, төрткүл дүниеге де танылды. Ендігі мақсат – сол үрдісті жастармен жалғастыру қажеттігіне тоқ­талған министр, сондай-ақ ғы­лым­ға Елбасының тікелей назар аударып отырғанын, қаржы да бөлініп жатқанын, оқымыстыла­ры­мыздың жұмыс істеуіне мүм­кіндіктің бар екенін, үздік жо­ба­ларға гранттар тағайында­латы­нын назарға салды. Ғылымды дамытуға жоғарыдан да, төмен­нен де үлес қосу әрқайсы­мыз­дың парызымыз. Мен бүгін Ас­та­на­дағы ғалымдармен дидарла­сып, ой бөліссем, алдағы уа­қытта мұн­­дай жүздесу Алматыда да өте­тін болады, деп министр жоғары оқу орындарындағы білім мен ғы­лым туралы өз байламдарын да ортаға салды. Бүгінгі ғылыми зерттеу университеттері мен инс­титуттардың рөлі арта бастады. Ал­дағы уақытта 20 университетке инновациялық дәреже беру көз­делуде деген ол келешекте жоға­ры оқу орындарының дай­ын­ды­ғы мен базасына, білім беру са­па­сына орай жұмыстар жүр­гі­зі­летінін, Қазақ еліне  50 универ­си­­тет жететінін, академия мен инс­титуттар да осы деңгейде бо­ла­тынын алға тартып, бір топ ға­лымдарға атап айтқанда К.Са­ға­диев пен Ғ.Есімге, Р.Омаров, А.Әбдіровке және тағы басқа­ла­рына «Қазақстан Республикасы­ның ғы­лымын дамытуға сіңірген еңбе­гі үшін» төсбелгісін табыс етті. Ғалымдар атынан сөз алған көр­некті ғалым, Мәжіліс депу­таты Кенжеғали Сағадиев ғылым күнін атап өту үрдісін орнық­тыру жөніндегі пікірге өзінің қосылатынын, әсіресе, жастарды ғылымға тарту мәселесі қолға алынып жатқанына ризалығын білдіріп, ғылымды дамыту заман талабынан туындап отырған жағ­дай, оған керек құжат қабыл­данды, бағыт-бағдарымыз ай­қын­­дал­ды дей келіп, әлі де болса ғалымдардың жалақысы аз екеніне тоқталды. Сонымен қатар, оны көтеру жолдарын ұсынып, алдағы уақытта ғалымдардың әлеу­меттік мәртебесін көтеру қа­жеттігі күн тәртібінде тұрға­нын атап өтті. Жалпы, ғылым күніне арнал­ған бұл дидарласу кезінде отан­дық ғылымның бүгіні мен бо­лашағы туралы толымды ойлар талқыға түсіп, тартымды пікірлер айтылып, жастарды ғылымға тарту арқылы ұрпақтар сабақтас­ты­ғын өрістету мәселесі сөз болды. Сүлеймен МӘМЕТ.