Кеңес дәуірінде жоғары оқу орны санаулы мамандықтар бойынша білім беретін. Тәрбие жұмысы негізінен факультет деканаттарына жүктелетін. Оқу ісін атқару кафедралар еншісіне тиген. Казір де осы үрдіс сақталып келеді.
Сонымен, бұрын факультет мамандықтар саны бойынша барынша ықшам еді. Демек, студенттер құрамы біркелкі болатын. Бұл белгілі дәрежеде тәрбие жұмысының бірыңғайлығына мүмкіндік беретін.
Бүгінгі жағдай заманға қарай өзгерді. Бір факультеттің өзінде оннан аса әртүрлі мамандықтар бар. Осыған байланысты студенттер құрамы да сан алуан. Мұның бәрі тәрбие жұмысына ауырлық етуде. Казір осы жұмысты факультет деканаттары тиімді де сапалы атқарып жатыр деп айту қиын. Бірақ, бұрыннан қалыптасқан жүйеге сәйкес жоғары мектепте ол әлі сол күйінде қалып отыр.
Тәрбие жөніндегі жүйеде кафедра меңгерушісі жоқ. Бір есептен бұл оның оқу ісімен кеңінен айналысуына жағдай жасау үшін ойластырылған шығар деп те топшылауға болады. Әрине, бұл жүйеде кафедра жетекшісі шығармашылық жұмыс атқаруға жоғары мүмкіншілікке ие. Әрине, білім мен тәрбие ұштас дейміз. Ендеше, осының дұрысы мен бұрысын, оңы мен терісін талдап көрелік.
Жоғары мектепте бес жыл кафедра басқардым. Кейін он үш жыл үзіліссіз факультет деканы, сосын бес жыл оқу ісі жөніндегі проректоры қызметтерін атқардым. Бұл маған осы мәселенің ішіне үңіліп, оны әр қырынан зерделеуге мүмкіндік берді деп ойлаймын. Ұзақ мерзімде жинақтаған тәжірибемді саралай келе, студентті тәрбиелеу мен оған сапалы білім беруді бір қолға, бір құрылымға өткізу қажеттігін түсіндім. Ол құрылым – білім мен тәрбиені қатар алып жүретін кафедра болуы керек секілді.
Біз бұл жерде факультет деканын студенттерден қашықтатудан аулақпыз. Керісінше, студентке кафедра меңгерушісін барынша жақындату мақсатындамыз. Өйткені, бүгін кафедра студенттен біршама алшақ тұр. Яғни, талапкерге берер тәрбие әлеуеті толығынан пайдаланылмай отыр. Шынтуайтында, жоғары мектепте кафедра меңгерушісі – студентке барлығынан жақын тұрған басшы. Солай бола тұра, өкінішке орай, жастар тәрбиесіне ол өз мүмкіншілігін сарқа беріп, молынан сіңіре алмай келеді.
Жасыратыны жоқ, факультет басшысы жұмысбасты. Бұрын да солай болған. Өйткені, оқу орны деңгейінде, тіпті, жалпы қоғамда болып жататын жиындар мен іс-шараларға ол міндетті түрде атсалысады, қатысады. Сондықтан, факультет деканы тәрбие жұмыстарын негізінен өзінің орынбасарына жүктейді. Ал, бұл жұмыста жүргендер көп жағдайда барып кел, алып келге ыңғайлы жас оқытушылар. Бұл куә болып жүргеніміздей, тәрбие жұмысының сапасына кері әсерін тигізбей жатқан жоқ.
Кафедра меңгерушілері болса, әдетте тәжірибесі бар білікті ұстаздар. Сондықтан, олар студентпен сөйлесу жолдарын жетік біледі, оны іскерлікпен жүзеге асыра алады. Және оқушылардың мұң-мұқтажын да терең түсінеді. Сонымен қатар, тәлімгер оқытушылар осы кафедрада болғандықтан, олар әркез бөлім жетекшісі маңынан табылады. Демек, студенттер де, олардың ұстаздары да бір кафедра аумағында. Көзін тауып, жолын ұтымды таңдай білсе, бұл жағдай, сөз жоқ, тәрбие жұмысын жақсартуға мүмкіншілік береді. Өйткені, кафедра меңгерушісінен артық ешкім де мамандық ерекшеліктері мен студент тәрбиесін ұтымды үйлестіре алмайды. Кафедра меңгерушісі тәрбие жұмыстарына тәлімгерлермен қатар, өзге оқытушыларды да жоғары дәрежеде жұмылдыру жолдарын біледі.
Өткен оқу жылдарында жүргізген тәжірибеміз осы айтқандарды толығынан дәлелдеді. Енді сол нәтижелерден мысал келтірейік. Біздің кафедра «Мелиорация, жерді баптау және қорғау» деп аталады. «Су ресурстары және суды қолдану» мамандықтары бойынша білім алушы 96 студентке дәріс береді. Қыркүйек айында осы студенттердің оқу тәртібі ойдағыдай болған жоқ. Қазан айының басынан біз оларды өз ықпалымызға алдық. Әрбір топ көлемінде білім алушылармен пікірлестік. Олардың жартысына жуығымен жеке сөйлестік те. Алдымен білім алушыларға мамандық ерекшеліктерін, өңір үшін бұл мамандықтың басты рөл атқаратынын жете түсіндірдік. Сонымен қатар, ата-аналар мақсаты мен арманы да өз алдына үлкен әңгіме болып жатты. Осының барлығы студенттердің азаматтық борышы мен сезімін жетілдіріп, ұштауға себеп болды деп ойлаймыз. Бұл әңгімелерде студенттердің жеке жауапкершілігін көтеру басты мақсат болғанын айтқанымыз жөн. Біздің көздегеніміз олардың оқуын, тәртібін жақсарту еді. Нәтижесінде студенттердің сабаққа келуі қыркүйекпен салыстырғанда, қазан айында 16, қарашада 20, желтоқсанда 16 пайызға жоғары болды.
Бұдан тәрбие жұмысын әр білім алушымен тиянақты атқарса, дәрісті себепсіз жіберуді жоюға болатынын байқадық. Біз өз жұмысымызда студенттердің ата-аналарын шақырып, не хабарласып, ығыр еткен жоқпыз. Бар салмақты студенттің өз сана-сезіміне, оның жеке жауапкершілігіне аударғанды жөн көрдік. Бұл біздің ойымызша, студенттердің адами, азаматтық болмысын шынықтырып қана қоймай, олардың өзінше шешім қабылдауына, алдағы қызығы мен қиындығы мол үлкен өмірге әжептәуір дайындықпен келуіне шамалы болса да ықпал етті.
«Аздың ашпын, көптің тоқпын» дегеніне сенбе дейді халық даналығы. Осы ұғым біз әңгімелеп жатқан мәселеге байланысты айтылғандай. Өйткені, факультет деканының қарамағында студенттер «көп», ал кафедра жетекшісі жанында олар «аз». Сол себепті бұрынғыға қарағанда, мына ізденіс кезінде студент кафедра меңгерушісінен, оқытушылардан тәрбие тағылымдарын барынша молынан алады. Кейде кафедра меңгерушісінің атқаратын тәрбие жұмысы факультет деканына қарағанда үш-бес есе жоғары болып кетуі де мүмкін. Бұл, әрине, арифметикалық есептеуге жүгінгенде. Жоғарыда айтылған басқа артықшылықтарды ескерсек, бұл нәтиже еселенуі де ғажап емес.
«Малды тапқанға баққыз» – дейді атамыз қазақ. Осы қағиданың басты мағынасы – әр іске жаны ашитын азаматтарға сеніп тапсыру. Болашақ студентпен алғашқы байланыс кафедрада болады. Кафедра мүшелері оқуға түсушілермен алдын-ала кәсіби бағдар жұмыстарын атқарды.
Біз ұсынып жатқан жүйе қолдауға ие болса, кафедра жоғары мектептегі өзінің бұрыннан күткен биік орнын табады. Ол кезде кафедра меңгерушісі ұжымда негізгі тұлға дәрежесіне көтеріледі. Жүктелетін міндеттердің салмағы артады.
Кейбір кафедра меңгерушісі білім беру сапасын мен ұйымдастырайын, ал факультет деканы тәрбие ісімен өзі айналыса берсін деуі мүмкін. Бұл тәрбие жұмысының маңыздылығын түбегейлі сезінбеуден, оған жөнді мән бермеуден, тәрбиені оқу ісінен бөлек қарауға мүмкін еместігін жете түсінбегендіктен болады. Мұны мен қолдай алмаймын. Мұндай жағдайда тәрбие мен оқытудың туа бітті бірлігі алшақтап кетеді. Оны әр күні байқап та жүрміз.
Кейде оқытушылар нашар оқитын студентке: «Сен оқысаң да өзің үшін, оқымасаң да өзің үшін» – деп кейіс білдіріп, осыным дұрыс дейтініміз бар. Шынына келгенде, студент алдымен елдің ертеңгі тұтқа ұстары ретінде белгілі бір мамандыққа даярланады. Ол отан келешегіне лайықты үлес қосуға міндетті. Мұны ой-санасына құйып ұғындыру міндетіне жатады.
Біз осыны мойындайық-мойындамайық, бәрібір жоғары мектепте білім мен тәрбиеде кафедрадан өзге ықпал ететін құрылым жоқ. Сондықтан кафедра дәрежесін, әлеуетін, оның оқу орнында алатын орнын, мәртебесін өсіріп, ерекшелеуіміз қажет. Осы құрылымның тиімді қызмет атқаруына барлық жағдайлар жасалуы керек.
Бүгінгі күні жоғары мектеп атына айтылатын қолайсыз әңгіменің бары белгілі. Ол – студент пен оқытушы арасындағы жағымсыз қарым-қатынасқа келіп тіреледі. Біздің ойымызша, осының түп-түбірі кейбір студенттердің сабаққа жөнді қатыспай, соның салдарынан білімдерінің нашар болуында жатыр. Дәріске уақтылы келмеу – жалқаулықтан. Ал осы жалқаулықтан құлан- таза айығу жолы мен емі кафедра меңгерушісінің жұмысына байланысты екенін жоғарыда айттық.
Иә, кафедра ықпалды болса, студенттің барлығы сабаққа түгел қатысады. Нәтижесі – білімнің жоғары деңгейі. Жеткілікті білімі бар студент оқытушыға баға сұрап бармайды. Бұған қоса студенттің сабақтан қалмай, барын салып, білімге ұмтылып жүргенін байқаған оқытушы атына кір келтіретін іске бармайды.
Қазір оқытушы оқушысын бақылап, оның қабілетін анықтап, соған байланысты оқу-тәрбие жұмысын жүргізу ерекшеліктерін белгілейді. Есесіне студенттер де оқытушыларын сынап отыр. Сондағысы ұстазының ойын, білім дәрежесін, пиғылын, ниетін білу. Осыны ол оқытушының сөйлеген әрбір сөзінен, іс-қимылынан, жүріс-тұрысынан, түр-тұрпатынан байқайды. Егер оқытушы ойының таза екеніне, ұстазының білім беру ісіне барша күш-жігерін, білімі мен ықыласын сарқа пайдаланып жатқанына көзі жетсе, оқушы жүрегінде оған деген сенім орнайды. Сонда ғана ол өз тағдырын оқытушы қолына тапсырады. Осыдан соң студент үгітті қажет етпейді. Сабаққа белсенді қатысады. Өнеге мен білім көшіне мол құлшыныспен ілеседі.
Бүгін айтылып жүрген оқу-тәрбие жұмысы деген ұғым, біздіңше, аса маңызды үдеріске түбегейлі сипат бере алмай тұрғандай. Өйткені, оқыту мен тәрбие ұштастырылмаған. Бізге жүктелген міндет студенттерге тәлімді тәрбие беру және соған сай білім үйрету. Тәрбиесі нашарға білім жөнді қонбайды. Мұндай жағдайда кафедраны студенттер тәрбиесіне тарту керек. Сонда білім биікке көтеріліп, тәрбие тағылымды болады деп санаймыз.
Серікбай ҚОШҚАРОВ, Қорқыт Ата атындағы Қызылорда мемлекеттік университетінің кафедра меңгерушісі, техника ғылымдарының докторы, профессор.