Шіркін ақша! Жолда жатса...

«Ой­ын бизнесі туралы» Қазақ­стан Республикасының заңына сәй­кес казинолар мен ойын авто­мат­тары залдарын Алматы облы­сын­­дағы Қап­шағай су қоймасы жа­ға­­лау­ларында және Ақмола облы­сы­­ның Щучье каласында орна­лас­тыру қарал­ған болатын. Алайда, «Алтын көр­се, періште жолдан таяды» дегендей, жасырын ойын мекемелерін бас­қа жерлерде орна­лас­тыруға заң­мен тыйым салынға­ны­на қарамас­тан, мұндай талапты белден басу­шы­лар қатары сирер емес. Ақтөбе облысы бойынша эко­номикалық қылмысқа және сы­бай­лас жемқор­лық­қа қарсы күрес департаменті өткен жылы об­лыс орталығында осындай жасы­рын ой­ын бизнесін ұйымдастырып, ақша табудың же­ңіл жолын кәсіп еткен алты «кәсіп­кер­сы­мақ­тың» жо­лын кескен. Олар­дың үс­тері­нен қозғал­ған қылмыс­тық іс аяқ­талып, ақша десе, заңды да, ар­ды да ұмы­тып кететін мұндай аш­көз­дер тиісті жазаларын алды. Е.Тен деген азаматша ешқан­дай ли­цен­зия­сы болмаса да, 2010 жылғы мау­сым-қа­ра­ша айларының аралы­ғын­да Ақтөбе қаласында ғимаратты жал­ға алып, ойын бизнесін ұйым­дастыруға бай­ланысты заңсыз кә­сіп­керлікпен ай­на­лысқан. Заңсыз табысқа құнық­қан ол Алма­тыдан жеткізілген бес ойын аппара­тын іске қосып, «Шіркін ақша, жолда жатса» деп әрекет еткен. Ол №2 Ақтөбе қалалық со­ты­ның үкімімен Қылмыстық ко­декстің 190-бабы­ның 1-бөліміне сәй­кес қылмысқа кінәлі деп табылып, заңыз ойын бизнесін ұйымдас­ты­ру­дан түскен 836 мың теңге табысын, заттай айғақ ретінде алынған 461 мың теңгені мемлекетке кірістей оты­рып, үш айда тапқан еңбек­ақы­сы 90 мың теңге кө­ле­мін­де айып төлеуге мәжбүр болды. Мұндай жазадан «Тринти» ка­фесінің ғимаратында он үш ойын автоматын орнатып, сонау Алма­тыдан арнайы келіп, күреп ақша тауып жатқан жерінен тұтылған А. Маминова да құтыла алмады. «Жал­ғандық жарға жығады» деген осы. Сот шешімімен ол заңсыз ой­ын бизнесінен тапқан 840 мың тең­ге табысы мен заттай айғақ ретінде алынған 131 мың теңгесін мемлекетке кірістеп, 400 айлық есептік көрсеткіш көле­мін­де 589 мың теңге айып төле­п құтылды. Бәрінен де Е.Цой деген азамат құлашын кеңге сермеп үлгеріпті. Ли­цензиясы болмаса да, қонақ үй­дің бірінші қабатын жалға алған алаяқ онда екі рулеткалы ойын, 9 покер үс­телін, 2 электронды рулетка және 30 ойын аппаратын ор­на­тып, ақтө­белік аңқауларды айға қа­ратып келген. №2 Ақтөбе қала­лық сотының үкі­мімен ойын бизнесінен түскен  1 млн. 765 мың теңге мен заттай айғақ ретінде алынған 6 млн. 747 мың теңге және 11,5 мың АҚШ доллары мемлекетке кірістеліп, оған 400 айлық есептік көрсет­кіш көлемінде 589 мың теңге айып са­лын­ды. Сөйтіп, жасырын жол­мен пай­да таппақ болған ойы жүзеге аспай, тапқан-таянғанын түгел құсуына тура келді. Сатыбалды СӘУІРБАЙ. Ақтөбе облысы.