Мекеме инженері Михаил Чарлин бетон өндірудің барлық үдерісі автоматтандырылғанын айтады. Өнім дайындау әзірлемелері компьютер жадына құйылған. Қазіргі заманғы технологияларды пайдалану арқылы арнайы қалдықтарды басқаруға да болады екен. Соның нәтижесінде қайта пайдалануға болатын техникалық су мен құм-қиыршық тас қосындысы алынады. Қазір бетон зауыты алғашқы тапсырыстарын қабылдай бастады.
«Бұл зауыт «Теңіз» кен орнын кеңейту жұмыстары үшін салынды. Құрылыс жұмыстарына 500 адам қатысты. Зауытта 30 инженер қызмет істейді. Алдағы уақытта жұмысшылар саны көбейеді» - дейді «Нефтестройсервис ЛТД» ЖШС-нің менеджері Әмина Ақдрашева. Компания зауыттан бөлек екі су резервуарын, бетон сапасы мен құрамын тексеретін зертхана және жұмысшыларға арналған асхана мен кеңсе ғимаратын салуды жоспарлап отыр.
Кеніштегі жаңа зауыттың ашылу салтанатына қатысқан «Теңізшевройл» ЖШС келешек кеңею жобасының бас менеджері Джим Де Майо серіктестік жұмысына табыс тіледі.
Бақытгүл БАБАШ,
«Егемен Қазақстан»
