Мысалы, XVII ғасырдағы Құран, XVIIІ ғасырдағы неміс музыкалық аспабы, XІХ ғасырдағы самаурындар жинағы айрықша назар аудартады. Тай ауылы маңындағы «Өлеңті жазбалары» туралы мәліметтер де көпшілікті бейжай қалдырмайды. Сонымен қатар, тас ежелгі Екібастұздың Шідерті даласы, көне тас ғасырындағы Ангренсор, Майсор тұрақтары, қола дәуірінің Ақбидайық қонысы, темір дәуіріндегі Тасмола мәдениетінің Майкөбе обасы жайында, сондай-ақ көшпенділер тарихына қатысты өңіріміздің археологиялық қазба экспонаттары жинақталған.
Көне жәдігерлермен қатар музейдің үлкен залында Екібастұз тас көмір орнын ашқан Қосым Пішембаевқа ерекше бір бөлім арналыпты. Келесі бір залда бағалы тастар, тау жыныстары, Екібастұздағы көмір қазбаларының үлгілері қойылыпты. Бұл сонау 1900 жылы Екібастұзға Петербургтен келген тау-кен институтының профессоры Е. Федоровтың кезінен сақталған екен. Ғалым сол кезде Баянауыл тау жоталарында, Екібастұзда геологиялық зерттеу жұмыстарын жүргізіп, тау-кен музейін құрыпты. Қазір музейде 10 зал бар екен.
Тағы бір назар аударатын бөлім саяси-қуғын сүргінге ұшырап Екібастұзда түрмеде отырған саяси тұтқындардың тағдырларына арналған. Осы жерден сыртында «Ц-952» деген жазуы бар белгісіз саяси тұтқынның күнделігін көресіз. Атышулы орыс жазушысы А.Солженицынның да осы Екібастұздағы ерекше түрмеде отырғаны белгілі. Кейін бір кітабында «мен қазақ халқын құрмет тұтамын, бізге қазақ әйелдері нан әкеліп беретін» деп жазғаны бар.
– Жыл сайын музейде келушілерге арналған әртүрлі тақырыптағы көрмелер, түрлі шаралар өтіп тұрады. Музейге жылына 10 мыңнан аса адам келеді. Биыл «Музей түні» қаланың мерейтойына арналып «60 жылдың 60 сәті» тақырыбымен театрландырылған экскурсия ұйымдастырылды.
Екібастұздың тарихи-өлкетану музейін қалыптастыруда Ертіс Ахметов, Хорлан Үсенова, Галина Шерстюк, Жұмаш Сыздықова, Зубайра Ибраева, Нағима Смаилова сияқты мамандар көп тер төгіпті. Музей қорын төрт мыңнан аса бірегей жәдігерлермен толықтырған Дариға Тоқаеваның еңбегі тіпті ересен.
Қазір музей қызметкерлері өлке шежіресін шертер тарихи- мәдени мұраларды насихаттау мақсатында түрлі шаралар өткізіп, ауылдарға жылжымалы көрме ұйымдастыруда.
Фарида БЫҚАЙ,
«Егемен Қазақстан»
ЕКІБАСТҰЗ
