«Астана» кубокты жеңіп алды

Алматыда баскетболдан өткен Қазақстан кубогы жолындағы додаға еліміздің таңдаулы деген алты командасы қатысты. Жеңімпазды анықтаған ше­шеуші сында «Астана» мен «Аты­рау барыстары» командалары кездесті. Ойынның бірін­ші жартысы «Астана» коман­дасының жеңісімен аяқтал­ды. Матчтың үшінші кезе­ңінде де Атырау командасы аста­налықтарды қуып жете алмады. Үшінші кезеңде «Астана» тоғыз ұпай айырмасымен, яғни 47:38 есебімен басым­дық танытты. Шешуші және де тартысты ойын болғандықтан, баскетболшылар алаңқай үстінде тәртіпті жиі бұзып та жатты. Әсіресе, кездесудің соңында шар­шаң­қырап қалған ойыншылар бірінен соң бірі төрешілерден ескертулер алды. Сонымен, финалда өрнекті де өте қызықты ойын үлгісін көрсеткен «Астана» командасы 66:46 есебімен жеңіске жетіп, Қазақ­стан кубогының иегері атанды. Бұдан бөлек, кубок сынының қола жүлдесін қостанайлық «Тобыл» мен ақтаулық «Каспий» командалары өзара сарапқа салды. Бұл матч та аса тартысты өтті. Кездесу барысында жинақы ойнап, жеңіске деген жігерлілік танытқан «Каспий» клубы қарсыласын 99:86 есебімен ұтып, турнирдің жүлдегері атанды. Жарыс қорытындысында арнайы аталымдар бойынша үздік ойыншылар анықталды. Олардың қатарында Рүстем Мұрзағалиев («Астана»), Рустам Ерғали («Астана»), Павел Ильин («Атырау барыстары»), Антон По­номарев («Астана») және Все­волод Фадейкиннің («Алматылық Легион») есімдері аталды. Айнаш ЕСАЛИ, «Егемен Қазақстан» АЛМАТЫ