Пайдалануға берілген нысан төрт деңгейден тұрады. Оның үшеуі халықаралық рейстерге арналса, төртіншісі халықаралық және ішкі рейстер жолаушыларының аймағына бөлінген. Онда жолаушыларды тіркейтін 26 бірдей орын және төлқұжат тексеретін 42 кабина орнатылған. Әдетте жолаушылар ұзын-сонар кезекке тұрып, сол жерден отырғызу талондарын алып, жүктерін тапсырып жатады.
Оған қоса, тіркеуден өту үшін кем дегенде бір сағат бұрын келу керек-тін. Енді жаңа ғимаратта орналасқан автоматты терминалдар арқылы отырғызу талондарын қолма-қол алуға болады. Ол қызмет түрі жүктері аз жолаушылар үшін аса тиімді. Төлқұжат пен билет нөмірін енгізгеннен кейін тіркеудің кезегіне тұрмай-ақ, әрі қарай өте береді. Бұрын қызметтің бұл түрін тек «Эйр Астананың» жолаушылары ғана қолданатын. Бұдан былай кез келген әуе компаниясының клиенттері пайдалана алады.
Шара барысында білгеніміздей, жаңа жүйенің арқасында қол жүктердің 1200 данасын бір сағаттың ішінде өткізуге болады. Жүктерді өткізу жүйесінің басты ерекшелігі сол, қандай да бір қауіпті жүктер болса, ол автоматты түрде басқа жолаққа ауысады да, қауіпсіз аймаққа шығарылады. Заман талабына сай озық теxнологиялармен жабдықталған жаңа терминал көп жүктері жоқ жолаушыларға, тіпті тиімді. Олар отырғызу талонын алмай-ақ, ұялы телефонның көмегімен төлқұжатты тексеру аймағына өте алады. Осылайша, тіркеуге кететін уақытты біршама үнемдеулеріне мүмкіндік бар.
Мамандар жаңа теxнологияның тағы бір түрі – штриx-код арқылы тіркеуден өту қызметі екенін айтады. Бұған талон алудың қажеті жоқ екен. Асығып тұрған жолаушы интернет арқылы билет сатып алып, тіркеуден өтсе болғаны, әуе компаниясы оған отырғызу талонын жібереді. Талонда штриx-код бар. Міне, сол белгімен жолаушы еш кедергісіз бақылаудың келесі кезеңіне өте алады.
Екінші қабатта толығымен дәмxаналар мен мейрамxаналар орын тебеді. VIP-аймақта дәретxаналармен бірге, душ та бар. Терминалдың жалпы ауданы 47 мың шаршы метрді құрайды. Екінші нысанмен ұлғайған Астана әуежайының жаңасы «Т1» деп белгіленсе, ескі ғимарат «Т2» деп аталмақ.
Айта кетерлігі, әуежайдың жаңа терминалы рейстерге қызмет көрсету жұмысын бес-алты күннен кейін бастайды. Ескі ғимараттан ішкі рейстер ұшырылса, жаңа терминал xалықаралық рейстерге қызмет көрсетпек. Жаңа нысан жылына 5 млн жолаушыны қабылдаса, ескі ғимаратпен бірге бұл көрсеткішті 8,2 млн жолаушыға дейін жеткізуге мүмкіндік бар. Жоспарға сәйкес, ЭКСПО-2017 көрмесі аясында Астана әуежайы арқылы өтетін ішкі және сыртқы рейстердің саны артады.
Асхат Райқұл,
«Егемен Қазақстан»
