Бұл ауылдағы жергілікті тұрғындардың барлығы да еңбекқор, шаруашылықтары, жылыжайлары бар, бәрі де көкөніс өсірумен айналысады, 600-ге тарта жылыжай бар болса, тұрғындар қиярдың 15 түрінен 278 тонна өнім алуда. Ауыл үлкен жолдың бойында, қалаға тиіп тұр. Бүкіл ауыл қияр өсіреді деген сөз. Қазір егіп қойған көшеттері жаз бойы қызарып, өсіп, күз бойы жемісін береді. Қазір бау-бақша, жылыжайларда қызу жұмыс.
– Ауылдықтар өздері осы атауды қуана қабылдап, базарды солай атадық. Әлемге әйгілі ЭКСПО көрмесінің Астанада өтуін мақтаныш көргеннен ғой. Бұл біздің ауылдағы кішкентай көрмеміз, – дейді ауыл әкімі Аждар Жүсіпов.
Ал, «ЭКСПО» деп аталатын базардың ашылуы көкөніс өсіруші тұрғындар үшін тіпті, тиімді болды. Сәуір айында отырғызылған қиярлар қазір өсіп-өнді. Тұрғындар жаппай сатып алуда. Бір келісі 230 теңге. Қиярды арзан бағамен сатып алғысы келсе, «ЭКСПО» базарына келуге болады. Базардың ашылу мақсаты да сол: жергілікті көкөніс өсірушілердің өндірілген өнімдерін өткізуге жағдай жасау. Бұрынғыдай облыс орталығындағы базарларға өткізіп әуреленбейді. Мысалы, бір маусымда 278 тоннаға жуық, ал, ауа-райы жақсы жағдайда бір күнде 315 келі қияр жинайды. Қалалықтар енді қияр өсірушілерге келіп, тікелей өнімдерді сатып ала алады. Енді базаршылар «ЭКСПО»-ға барамыз деп ауылға келетін болды.
– Біз өсіретін қияр біздің ауылдың бренді дейді, – ауылдықтар.
Өйткені, өңірдегі Лебяжі ауданында қарбыз өссе, Баянауыл төрт түлігімен, Ертіс ауданы астығымен, Қашыр, Железинка картопқа бай.
Фарида Бықай,
«Егемен Қазақстан»
Павлодар