«Франция павильоны тек қана озық технологиялар мен заманауи инновациялардың ғана орталығы емес, сонымен бірге, ол әлемдік мәдениеттің де үнқатысу алаңы болып табылады. Міне, соның айшықты дәлеліндей, бүгін біздің ортамызға планетамыздың танымал тұлғасы Олжас Сүлейменов мырза келіп отыр. Сіз, қадірлі Олжас Омарұлы, дүние жүзінің оқырмандарын ұйытқан 16 кітап жаздыңыз. Сіздің 1975 жылы жарық көрген «Аз и Я» кітабыңыз Сізді әлемге танытты, әлем оқырмандарын қазақ ақынының ұлылығына тәнті етті. Қадірлі Сүлейменов мырза, Сіз «Невада Семей» қозғалысын өмірге әкеліп, ядролық сынақ алаңдарының жабылуына себепкер болдыңыз. Біз Сіздің Франция павильонына келуіңізді зор қуанышпен қабылдадық. Бұл біздің елімізге деген Сіздің тарапыңыздан жасалған үлкен құрмет деп білеміз. ЮНЕСКО-ның елшісі ретінде Сіз біздің планетамыздың болашағын қалай болжайсыз?» – деді кездесуді ашқан Франция павильонының Бас комиссары Паскаль Лоро құттықтау сөзінде.
Жиналған жұрттың ду қол шапалақтауымен сөз кезегі Олжас Сүлейменовке берілді. «Тәуелсіз Қазақстанның елордасында өтіп жатқан ЭКСПО-2017 халықаралық көрмесінде әлемнің 115 мемлекетінің павильоны бар екен. Солай бола тұрса да ЭКСПО көрмесімен танысу сапарымды мен Франция Республикасының павильонынан бастадым. Оған менің ұзақ жылдар бойы Францияда тұрып, еңбек еткендігім ғана себеп болған жоқ, мен ежелгі Францияға, бұл елдің мәдениеті мен әдебиетіне балалық шағымнан жақын болып өстім. Сондықтан көрмедегі осы елдің павильонына келуді өзіме парыз санадым», деді өз сөзінде Олжас Сүлейменов.
Одан әрі ақын Парижде еңбек еткен күндердегі естелігімен бөлісіп, адамзаттың алдында тұрған келелі проблемаларды да тілге тиек етті. «Қазақстанда өтіп жатқан ЭКСПО көрмесінің бас тақырыбы – «Болашақтың энергиясы». Бүгінде адамзатты баламалы қуат көздерін игеру проблемасы ерекше толғандырып отыр. Бірқатар елдер, оның ішінде Франция күн энергиясын игеруді бастап отыр. Адамзат күн энергиясын толық игерген кезде бізге басқа энергия көзі қажет болмауы мүмкін. Күн – бұл сарқылмас энергия. Күн энергиясы адам баласына толықтай қызмет еткен кезеңнен бастап көмір, газ және атом арқылы алынатын энергияға деген сұраныс өзінен өзі жойылады. Өкінішке қарай, бүгінде Франция атом электр стансалары энергиясын ең көп тұтынатын ел болып отыр. Біз, «Невада-Семей» қозғалысы Қазақстанда атом энергия стансасын салуға қарсы болып келеміз. Әрине, атом энергиясы – ең арзан энергия көзі. Оның үстіне Қазақстан уран өндіруде әлемде көшбасшы болып табылады. Бірақ ұрпақ болашағы үшін атом электр стансасын салу қауіпті. Міне, сондықтан да Қазақстан «Болашақтың энергиясы» атты тақырыпта көрме өткізіп, адамзатты толғандыратын көкейкесті мәселені күн тәртібіне шығарып отыр. Бұл Қазақстанның қаншалықты өркениет биігіне көтерілгенін көрсетеді. ЭКСПО-2017 халықаралық көрмесі балама қуат көздерін ашуда тек Қазақстан үшін ғана емес, бүкіл адамзат үшін игі жетістіктер әкеледі деп сенемін», – деді ақын сөз түйінінде. Одан әрі жиналған жұрт Олжас Сүлейменовке көптеген сұрақтар қойды. Ақын жұрттың сұрағына жан-жақты жауап қайтарып, Орталық Азия, тіпті, ТМД мемлекеттерінің ішінде Қазақстанда алғаш рет өткізіліп отырған Бүкіләлемдік көрмеге сәттілік тіледі.
Өз кезегінде ЭКСПО-2017 халықаралық мамандандырылған көрмесіндегі Франция Комиссариатының сыртқы коммуникациялар директоры Малгожата Туард ақынға салиқалы кездесу өткізгені үшін шынайы алғысын жеткізіп, оның белсенді әлеуметтік және гуманитарлық қызметіне үлкен табыс тіледі.
