26 маусым мен 2 шілде аралығында ЭКСПО-2017 халықаралық көрмесіне 217 732 адам келген. Яғни, орташа есеппен күніне – 31 104 адам.
Айта кетерлігі, алдыңғы аптада – 19-25 маусым аралығында көрмеге 168 675 адам келген болатын, онда орташа есеппен күніне 24 096 адам кірген қалашыққа.
10 маусым мен 2 шілде аралығында көрмені тамашалауға келгендердің жалпы саны 591 968 адамды құрады. «Қонақтар жиі кіретін нысандар қатарында «Нұр Әлем» Қазақстан павильоны бірінші тұр. Екінші кезекте Тақырыптық павильонды тамашалаушылар көп. «Дю Солей» циркінің де көрермендері баршылық», дейді мамандар.
Қауіпсіздік мәселесін де айта кетсек, көрме аумағында «Вокорд» жүйесі жұмыс істеп тұр. Соның көмегімен өткен аптада қалашыққа билетсіз өтпек болған 12 адам анықталған. Бұдан бөлек дрон аппараттарын заңсыз ұшырмақ болған 4 адамның әрекетіне тосқауыл қойылды.
Топтаманы әзірлеген Асхат РАЙҚҰЛ,
Суреттерді түсіргендер Ерлан Омаров, Орынбай Балмұрат,
«Егемен Қазақстан»
