Игілікке жарағанына айдан асқан «Нұрлы жол» вокзалына біздің де жолымыз түскен. Көргеніміз бен көңілге түйгеніміз көп. Сүйсінткен дүниелерді қағазға сүйкесек, вокзал бір қарағанда, шыға келсеңіз, айналаңыз алақандағыдай көрінетін ел іргесіндегі төбе тәрізді. Қоғамдық көліктен түсіп, ішіне енгенде, үшінші қабатқа – перронға бір-ақ тап боласыз. Айта кетейік, осындағы алты шойын жол ағылған қырықтан аса пойызды алып келіп, Павлодар, Қарағанды, Қостанай және Көкшетау бағыттарына сілтейді. Елордада өтіп жатқан ЭКСПО көрмесіне байланысты қосымша оннан аса пойыз тағы бар. Мамандардан білгеніміздей, мұнда негізінен «Тұлпар-Тальго» жүрдек пойыздары мен қала маңына қатынайтын электропойыздар аялдайды.
Эскалатормен жоғары көтерілгенде, негізгі, төртінші қабат – күту залына кіреді екенсіз. Дәл осында тәулік бойы жұмыс істейтін билет сату кассалары, электронды билет алу терминалдары, мүмкіндігі шектеулі жандарға қызмет ететін терезе, анықтама бюросы, сауда нүктелері, телефон, смартфон қуаттайтын құрылғы, «Астана-такси» қызметі бар. Бесінші қабат тамақтану орындарымен жабдықталса, алтыншы қабатқа вокзал әкімшілігінің кеңселері орын тепкен.
Айта кетейік, егер нысанға жеке көлігіңізбен келетін болсаңыз, бірінші, екінші қабаттар – 740 орындық автотұрақ. Вокзал сыртында 760 көлікке арналған тұрақ тағы бар.
Байқағанымыздай, мұнда жолаушылар мен шығарып салушылар демалып, дүкендерді аралап, тамақтана алады. Келушілердің жайлылығы үшін қонақүй, ана мен бала бөлмесі, жүк сақтау орны, асхана, медициналық қызмет қарастырылған. Мүгедектер тактильді төсеніштерге жантайып, көзі нашар көретіндер Брайль әліппесін қолдана алады. 52 эскалатор мен 26 лифт орнатылған. Жедел жұмыс істейтін ғаламтор желісі тартылған. Қауіпсіздікке де көп көңіл бөлінген сияқты. Өйткені, ғимаратта адамдарды тексерістен өткізетін 16 кіреберіс пен ақылды жүйемен басқарылатын 510 камера орнатылған.
Ашылғанына енді ғана айдан асқан вокзалда халықтың қарасы қалың. Жалпы көлемі 120 мың шаршы метр болатын нысанда жөн сілтейтін қызметкерлердің көптігін де аңғару қиын емес. Бізге жоғарыдағы деректерді жеткізіп, мән-жайды әңгімелеген – кешен кезекшісі Мадияр Аманбаев. Ол соңғы үлгідегі дизайнмен және технологиямен жабдықталған мекемеде 1700-ге тарта қызметкер бар екенін айтты. «Жаңа темір жол бекеті күн сайын 35 мыңға жуық жолаушыны күтіп алып, шығарып салуға қауқарлы. Ал қазір тәулігіне небәрі 7 мың жолаушыны қабылдаймыз. Тағы бір ерекшелігіміз, жүрдек пойыздар алты қабатты бекеттің ішіне кіріп, жолаушыларға қызмет көрсетеді», дейді М.Аманбаев.
Мынау мәлімет те бізді бейжай қалдырмады: жаңа вокзалда жаңа технологиялар іске қосылған. Нысанның шатырына жинақталған жаңбыр суы техникалық қажеттіліктерге және жер телімін суғаруға жұмсалады. Бұл – «жасыл» технологияда қолданылатын ең озық жобалардың бірі. Ауа баптау жүйесі де тартымды, яғни ғимараттың бір бөлігінен екінші бөлігіне ауа алмастырылады. Суық болып тұрған залға жылы ауа айдалады да, вокзалды жылытуға кететін энергия үнемделеді. Сондай-ақ, мұнда жердің тұрақты температурасы арқылы ауаны жылытуға мүмкіндік бар. Жердің төменгі ауа қабатына радиатор орнатылған, сол арқылы жазғы маусымда ауаны салқындатып, қысқы уақытта жылытуға болады екен. Автоматтандырылған бұл құрылғы да энергияны үнемдейді.
Міне, бас шаһардың ТМД мемлекеттерінде жоқ вокзалының жағдайы мен көрінісі осындай.
Астанаға қош келдің, ағайын!
Жолың болсын, жолаушы!
Асхат РАЙҚҰЛ,
Суреттерді түсірген
Ерлан ОМАРОВ,
«Егемен Қазақстан»
