Әуелде Алатаудың баурайындағы әсем қаланы көпшілікке аяқастынан қиып кету мүмкін еместей көрінген. Солардың қатарында өзім де бар едім... Бір жағы осындай баққа оранған жасыл қалада өзім туып-өстім емес пе? Басқа жерден дәл осындай құлпырған қала салу қолдан келмейтін іс секілді еді?! Уақыттың жылдамдығын сезініп те үлгерер емеспіз, міне, Астанадай әсем қала көз алдымызда өсіп-өркендеді. Көзің сүйсінеді, көңілің ән салады! Қазіргі ЭКСПО салтанаты кезінде еліміздің бас қаласына ат басын бұрып келген әлем жұршылығының әсем қаламыз туралы пікірлерін естігенде, көңілің тіпті жадырап кетеді екен. Осындайда бір кезеңде табиғаты адам күшін мойындамайтын өңірден қала салу мүмкін емес деген ой құшағында болғаның үшін ұялып та қалады екенсің. Айналып келгенде, азаматтығы мен асқар таудай арманын бір арнаға тоғыстырып, арман қаланы аяғынан тік тұрғызған Нұрсұлтан Әбішұлына басыңды иіп тұрып алғысыңды жаудырғың-ақ келеді!
Қазақстан Республикасының Тұңғыш Президенті – Елбасы Нұрсұлтан Назарбаев Еуразияның кіндігінде болашақтың қаласын салды. Әлем жұртшылығының өкілдері – дүние жүзінің небір алпауыт мемлекеттері басшыларының өзі Астананың төрінде халықаралық мәмілелерге қол жеткізіп, Қазақстанның даңқын арттырды. Қазір әлемдік сарапшылар қауымы Астананы аймақтағы Дубай қаласымен теңестіріп жатыр. Бұдан он-он бес жыл бұрын ондай ой айтылар ма еді, ойланыңызшы? Айтылса, оған ел сенер ме еді? Міне, Астана шаһарының бүгінгі болмысы, бүгінгі таңдауы дәл осындай мәртебеге ие! Осындайда Елбасымыз Нұрсұлтан Назарбаевтың болашақты болжай білген көреген саясатына сүйсінесің.
Жалпы, қызмет барысында менің өз басым Нұрсұлтан Әбішұлымен сан рет кездестім. Алайда, солардың ішінде екі рет жүздескенім менің есімде ұмытылмастай болып қалды... Оның өзіндік себебі де жоқ емес. Екі кездесуде де Елбасына әңгіме арасында өтініш айтып үлгергенім бар. Оның біріншісі Қазақстанның БАҚ-тарына қатысты еді. Ол кезде ұйғыр тіліндегі газетті басқарғаныммен, тілімді сындырып, университеттегі орыс тіліндегі факультетті бітірдім. Білімімді одан әрі Мәскеуде жетілдірдім. Менің бар арманым – өзіміздің әл-Фараби атындағы ҚазМУ-дің осы факультетінің жанынан ұйғыр бөлімін ашу еді.
Талай есікті қағып жүріп, алдағы 10 жылдың көлемінде қанша ұйғыр тілді журналист керектігін саралап, ол бөлімді аштық та. Еңсеміз енді көтерілгенде, университеттің сол кездегі ректоры бала саны жетімсіз деген сылтаумен ол бөлімді жапты. Бір қызығы, менің ізімше, корейлер мен немістер факультет жанынан сондай бөлім ашып алған еді. Істің орайы келсе жақсы ғой, бір шара үстінде Нұрсұлтан Әбішұлымен жүздесіп қалдым да, уақытының тапшылығына қарамастан, жайсыз болса да әлгі проблеманы жайып салдым. Елбасы өзінің Әкімшілігіндегі салаға қатысты бір әріптесімді шақырып алды да, «Кеңсенің сыртында не болып жатқанын білмейсіңдер», деп жедел тапсырма берді. Жұрттың қуанышында шек жоқ, бөлім қайта ашылды.
Қазақстан халқы Ассамблеясында жүрген кезімде Қазақстандағы, тіпті Орталық Азиядағы дейікші, жалғыз ғана ұйғыр театрына жабылу қаупі төнді. Елбасы Алматыға сапармен келгенде, Ассамблеяның жұмысымен танысты. Сондай сәтті пайдаланып, театрдың басына төнген қауіп бұлты туралы тәптіштеп баяндадым. Мұқият тыңдаған Нұрсұлтан Әбішұлы сол жерде сала қызметкерлеріне тапсырма берді. Театрдың жаңа тұрпатта ашылу салтанатына өзі келіп қатысатынын ескертті. Расында да, кейін театрдың алғашқы сахналық қойылымына Нұрсұлтан Әбішұлының өзі келді. Бірегей өнер отауының қызметіне, қазақ өнеріндегі оның алар орнына тоқталып, оң бағасын берді.
Қандай бір сәтте еліміздегі азаматтардың мұқтажына, қажетіне айрықша көңіл бөліп, оның орындалуын мұқият назарда ұстайтын Елбасының осы бір қасиеттеріне мен өз өмірімде осылайша куә болған жайым бар. Күн санап құлпырып, қанатын кеңге жайып келе жатқан айшықты Астананың сән-салтанатын көрген сайын, шаһар салудағы Нұрсұлтан Әбішұлына ғана тән мұқияттылық нышанын анық аңғарамын.
Юлдаш АЗАМАТОВ,
«Қазақ газеттері» ЖШС
Бас директоры – Редакторлар кеңесі төрағасының кеңесшісі
