![60 мыңға жуық отбасы көшіріледі](/article_photo/1499829271_article_b.jpeg)
Вице-министрдің сөзіне қарағанда, 2017 жылдың 1 шілдесіндегі жағдай бойынша жұмыспен қамту орындарында жұмыссыз ретінде 151,7 мың адам тіркелген. «Бағдарламаның техникалық-кәсіби біліммен және қысқа мерзімдегі кәсіби оқумен қамтамасыз ету көзделген алғашқы бағыты аясында биыл техникалық әрі кәсіби білімі бар 21,3 мың кадр даярлау және де 70,3 мың қазақстандықты қысқа аралықта кәсіби оқыту жоспарланып отыр. Оқу сабақтары бүгінде қажеттілікке ие кәсіптер бойынша қолға алынуда.
1 шілдедегі дерекке сүйенсек, 21 127 адам қысқа мерзімді оқуға жіберілді», деп атап өтті Б.Нұрымбетов.
Сонымен қатар, көшіп-қонушылардың мәселесіне мән беріп, олардың көшіп- қонуы ерікті болуы керектігін алға тартты. Былтыр Солтүстік Қазақстанға қоныс аударған 1-2 отбасының қайтадан көшуіне тура келген. «Біріншіден, адамның көшіп-қонуы өз қалауымен жүзеге асуы керек. Мемлекет ешкімді мәжбүрлемейді. Себебі, бұл – конституциялық құқық. Екіншіден, көшемін деген азаматты ынталандыру керек. Ол сол аймаққа қызығушылықпен баруы қажет. Біз оларға үй алып береміз, жағдайыңды жасап береміз деп үміттендірмеуіміз керек. Мемлекет ешкімге бара салып, үй әпермейді. Себебі, елімізде тұрғын үймен қамтамасыз етуде бірыңғай саясат қалыптасқан. Ал көшіп жатқандарға біз тұрғын үйлік несиенің жеңілдетілген түрлерін немесе жалға алған үйдің шығындарын өтеу сияқты құралдарды қарастырып жатырмыз», деді вице-министр.
Сонымен қатар, Б.Нұрымбетов 5 жылдың ішінде 59 мың отбасын көшіру көзделіп отырғанын тілге тиек етті. «Біз оларды көшіруді 2018 жылдан бастап кетсек дейміз. Қазір соның барлық тетіктерін қарастырып жатырмыз», деді ол.
Рауан ҚАЙДАР,
«Егемен Қазақстан»