Тұжырымдаманың басты мақсаты – Қазақстан Республикасындағы зайырлылық қағидаттарын нығайту. Сондай-ақ, тұжырымдама жобасының негізі қазақстандықтардың діни сенім бостандығын, дінді ұстану немесе ұстанбау құқығын қамтамасыз ету болып табылады.
Құжат қоғамымызда іс жүзінде орныққан конфессияаралық келісімді нығайту бағытындағы мемлекеттік-конфессиялық қатынастарға алдағы уақытта өзінің елеулі үлесін қоса отырып, дінді деструктивті мақсаттарда қолдануға жол бермеуге септігін тигізетіндігіне сенімдіміз.
Құжатта мемлекет саясатының дін саласындағы ұстанымы, стратегиялық мақсаттары мен бағыттары айқын көрсетілген. Аталған құжат жобасы бірқатар сарапшылар мен дінтанушы мамандардың, сонымен қатар, азаматтық қоғам институттары өкілдерінің талқылауынан өткен.
Тұжырымдамада елімізде діни білім беру тәртібін реттеу, жасөспірімдерді діни қызметке заңсыз тартуға жол бермеу, діни әдебиеттерді тарату тәртібін жетілдіру және т.б. мәселелерді шешу жолдары қарастырылған. Дінді ұстанатын азаматтарымыздың діни рәсімдерді жүзге асыруына қолайлы жағдай жасау тетіктері де қамтылған.
Әсіресе, бізге зайырлылық қағидаттарын халқымыздың өмір сүру салтына айналдыру мақсатында мемлекеттік басқару мен мемлекеттік қызмет, құқық қорғау, арнайы қызмет пен қарулы күштер, бұқаралық ақпарат құралдары, білім беру, денсаулық сақтау, мәдениет пен спорт салаларын жұмылдыра отырып, Тұжырымдама негізінде елімізде әлеуметтік-экономикалық және отбасы институтының мәселелерін шешуді көздейтін мемлекет пен діни бірлестіктердің қарым-қатынасына жағдай жасалатындығы бізге құлшыныс туғызып отыр.
Аталған құжат бойынша дін саласындағы мемлекеттік саясат іске асырылмақ, діни бірлестіктермен өзара қарым-қатынас дамытылмақ, азаматтардың діни сенім бостандығы қамтамасыз етілмек. Сонымен қатар, мемлекет пен азаматтық қоғам арасында өзара әрекеттесу моделі қалыптасып, зайырлылық қағидаттары нығая түспек.
Жалғас САНДЫБАЕВ,
дінтанушы
