![Жаһан төріндегі жарты жыл](/article_photo/1499917775_article_b.jpeg)
Осыдан бір жылдан сәл астам уақыт бұрын, яғни 2016 жылғы 28 маусымда, Нью-Йорк қаласында орналасқан Біріккен Ұлттар Ұйымының штаб-пәтерінде беделі биік делегациялар бас қосты. Себебі, сол күні 2017-2018 жылдарға БҰҰ Қауіпсіздік Кеңесінің тұрақты емес мүшелерін сайлау шарасы жоспарланған болатын. Қауіпсіздік Кеңесінің тұрақты емес мүшелерін сайлау додаға түскен әрбір мемлекет үшін үлкен сынақ әрі айтарлықтай халықаралық жауапкершілік жүктейтіні белгілі.
Сарапшылардың пікірінше, Азия-Тынық мұхит аймағынан бұл сайлауға түскен екі үміткер – Қазақстан мен Таиландтың жеңіске қол жеткізу мүмкіндігі теңдей әрі лайықты кандидаттар болатын. Алайда, ұзақ үгіт-насихат кезеңінің ең маңызды бөлігі – сол дауыс берудің алдындағы бірнеше сағат пен минуттар болып саналады. Неге десеңіз, осы сәттерде көптеген мемлекеттердің президенттері мен премьер-министрлерін кездестіріп, олармен алдын ала қандай да бір келісімдерге келуге болады.
Бірақ үміткерлердің қайсысын қолдау қажеттігі туралы нақты шешім қабылдайтын – БҰҰ-ның Нью-Йорктегі штаб-пәтерінде дауыс беруге тікелей қатысатын тұлғалар, яғни Ұйым жанындағы Тұрақты өкілдер және сайлауға қатысу үшін келген делегациялар. Дауыс беру жасырын өтетін болғандықтан, әрбір дауыс беруші қандай шешім қабылдағаны өзгелерге белгісіз күйінде қалады. Дауыс беруші ең соңғы сәтте шешімін өзгерте салуы да мүмкін. Яғни, жасырын дауыс беру процесінің өзіндік ерекшеліктері аз емес.
Егер, үміткерлер дайындық жұмыстарын тиісті деңгейде өткізбеген жағдайда, сайлау процесі күлкіге қаларлық қалжыңға айналып кетуі мүмкін. Мәселен, 1979 жылы ҚК-ның тұрақты емес мүшелігіне таласқан Куба мен Колумбия арасындағы сайыста екі тарап та дауыстардың басым бөлігін жинай алмай, салдарынан үш ай қатарынан сайлауға түскен. Дауыс берудің 154 (!) келесі кезеңі нәтижесіз аяқталғаннан кейін БҰҰ Куба да, Колумбия да сайлауда ұтылды деп есептеп, оларға тиесілі орынды Мексикаға беру туралы шешім қабылдады. Бұл шешімді бітпейтін сайлаудан шаршаған мемлекет өкілдері мақұлдады.
Сонымен, 2016 жылғы 28 маусымға қайтып оралайық. БҰҰ Бас Ассамблеясының отырыстарына арналған мәжіліс залында делегациялар жинала бастады. Залдағы сол қарбаласты сәтті көз алдымызға елестете сөйлесек, қазақстандық беделді дипломаттар насихат жұмыстарын белсенді түрде атқаруда. Араб мемлекеттерінің өкілдерімен отандық шығыстанудың ақсақалы, Ирандағы елшіміз Бағдат Әміреев сөйлесті. Ол кісіні көрген Таяу Шығыс елдерінің дипломаттары орындарынан атып тұрып сәлем беріп, айтқан сөзін ентелей тыңдайды.
Еуропалықтардың қолдауын қамтамасыз етіп, Кәрі құрлықтың өкілдерімен қол алысып жүрген Қазақстанның Венадағы халықаралық ұйымдардағы Тұрақты өкілі Қайрат Сарыбай, Кариб бассейні мемлекеттерімен тіл табыса білген Канададағы елшіміз Константин Жигалов, Африка елдерінен келген делегаттармен құшақтасқан Эфиопиядағы елшіміз Ерлік Әлі, осы жұмыстарды үйлестірумен шұғылданған сол кездегі БҰҰ-дағы Тұрақты өкіліміз Қайрат Әбдірахманов, жалпы басшылық тізгінін ұстаған еліміздің сол кездегі Сыртқы істер министрі Ерлан Ыдырысов сынды азаматтар сайлау алдындағы аз ғана уақытты біздің Отанымыздың пайдасына асыру мақсатында белсенді әрекеттер жасады.
Қазақстан Республикасының БҰҰ-ға түсірген «дипломатиялық десанты» қойылған мақсатқа жетті. Ұйымның 193 мүшесінің көпшілігі – 138 мемлекет Қазақстанға дауыс беріп, елімізге сенім артты. Қазақстандық дипломатияның жаңа даму кезеңі осылай басталды.
Қазіргі таңда Қазақстанның Сыртқы істер министрлігі Президент Нұрсұлтан Назарбаевтың БҰҰ-ға мүше мемлекеттерге арнаған саяси Үндеуінде бекітілген басымдықтарға сәйкес, Қауіпсіздік Кеңесіндегі жұмысын белсенді жалғастыруда. Елбасы ұсынған басымдықтар қатарында ядролық қарусыз әлем құру, жаһандық соғыс қатерін болдырмау, Ауғанстандағы бейбітшілікке ықпалдасу, Орталық Азияда бейбітшіліктің өңірлік аймағын қалыптастыру, БҰҰ қамқорлығымен жаһандық лаңкестікке қарсы коалиция құру, Африканың бейбіт дамуына жәрдемдесу, БҰҰ-ның Орнықты даму мақсаттарын, бейбітшілік, қауіпсіздік және даму арасындағы ажырамас байланысты ілгерілету, БҰҰ-ны ХХІ ғасыр талаптарына бейімдеу және жаһандық проблемаларды шешу үшін ұжымдық саяси ерікті нығайту мақсатында мемлекеттер мен үкіметтер басшылары деңгейінде Қауіпсіздік Кеңесіне мүше мемлекеттердің тұрақты кездесулер тетігін жасауға келісу сияқты мәселелер бар.
Өткен алты айдың ішінде дипломаттарымыз БҰҰ Қауіпсіздік Кеңесінің 120-дан астам ресми отырыстарына, сондай-ақ, 60-қа жуық бейресми жиналыстарына белсене қатысты. Сонымен қатар, Қазақстанның қатысуымен Қауіпсіздік Кеңесінің Е-10 атты тұрақты емес мүшелері кіретін топ 10 рет жиналды. Қазақстандық дипломаттар Кеңес мүшелерінің 5 ресми сапарына қатысты. Қазақстанның қатысуымен Қауіпсіздік Кеңесінің 20-дан астам қарары, ҚК төрағасының 7 мәлімдемесі және Кеңестің 50-ден астам ресми релиздері қабылданды.
Аталған іс-шаралардың көбі Таяу Шығыстағы қақтығыстар, Сирия мен Йемендегі жағдай, Африкадағы шиеленістер, ядролық қаруды таратпау, Солтүстік Кореяның зымыран сынау әрекеттері, сондай-ақ, халықаралық терроризм мен діни экстремизмге қарсы күрес секілді тақырыптарға бағытталды.
Қазақстан өзі төрағалық ететін ҚК-нің үш комитетінің жұмысын жоғары деңгейде ұйымдастыруда. Атап өтсек, олар: «Ислам мемлекетіне» (Қазақстанда тыйым салынған) қарсы күрес, Ауғанстанды қалпына келтіру және Сомали/Эритреядағы жағдай жөндеріндегі комитеттер. Осы комитеттерге қатысты жұмыс аясында Қауіпсіздік Кеңесінің бірнеше маңызды қарары дайындалып, қабылданды. Бұлардың ішінде ҚК-нің Ауғанстандағы жағдайдың Орталық Азия мемлекеттерінің қауіпсіздігіне әсерін түйіндейтін №2344 қарары, экстремистердің мәдени мұра нысандарын күйретуіне қарсы күрес туралы №2347 қарары, лаңкестердің үгіт-насихат әрекеттеріне қарсы халықаралық ынтымақтастық туралы №2354 қарары және Сомалидегі жағдайды қалпына келтіру туралы №2346 және №2355 қарарлары бар.
Қазақстан өзін Қауіпсіздік Кеңесіндегі қызметінде бүкіл Орталық Азия өңірінің өкілі ретінде сезінуде. Сондықтан, БҰҰ ҚК әрекеттері жөнінде қазақстандық дипломаттар көршілес Орталық Азия мемлекеттерінің өкілдерімен жиі және тұрақты түрде пікір алмасады. Осы орайда еліміздің БҰҰ-дағы Тұрақты өкілі Қайрат Омаров өзінің Орталық Азиядағы әріптестері үшін ай сайын арнайы брифинг өткізуде.
Бүгінде қазақстандық дипломаттардың бейнеті көп еңбегін ерекше атап өтуге тиіспіз. Олар еліміздің игілігіне бағытталған ортақ міндетті орындауға қомақты үлестерін қосуда. Отандық дипломаттардың еңбегі өз жемісін беріп, Қазақстан Республикасы өзінің БҰҰ Қауіпсіздік Кеңесіндегі миссиясын одан әрі абыроймен жалғастыратынына еш күмән жоқ.
Жанболат ҮСЕНОВ,
Еуразиялық кеңестің халықаралық
қатынастар жөніндегі директоры