Жиында ұлттық компанияның басқарма төрағасы Мақсат Қабашев есепті мерзім ішінде шетелдік инвесторлармен бизнес-жобаларды ашу бойынша 90 кездесу ұйымдастырылғанын мәлімдеді. «Кездесулердің дені Қазақстан экономикасының машина жасау, фармацевтика, химия, мұнай-химия, агроөнеркәсіп, металлургия, өңдеу өнеркәсібі сияқты басым салаларына инвестиция тартуға бағытталды. Шетелдік компаниялармен 22 ынтымақтастық туралы келісімге қол қойылды. Америкалық, британиялық, неміс, испан, қытай және түрік инвесторлары Қазақстанда өз бизнестерін жүргізуге қызығушылық білдірді», дейді ол. М.Қабашевтің айтуынша, 2017-2018 жылдары құны 7,7 млрд АҚШ долларын құрайтын 16 инвестициялық жобаны іске асыру жоспарланып отыр. Сондай-ақ, шетелдік инвесторларды тарту ғана емес, өңірлердегі инвесторларды қолдау бойынша да жұмыстар атқарылған.
Компанияның шетелдік өкілдері АҚШ, Қытай, Түркия, Канада, Бразилия, Мексика сынды мемлекеттердің әлеуетті инвесторларымен 160-тан астам кездесулер мен келіссөздер жүргізген. Қазақстанға америкалық, түрік және қытай трансұлттық компаниялары өкілдерінің сапарлары ұйымдастырылған. «Солардың бір нәтижесі, жақында Қазақстанда түрік бизнесі жобаларының іске қосылуы жоспарлануда. Мұнда тартылатын инвестициялардың көлемі шамамен 36 млн долларды құраса, болашақта 300-ге жуық жұмыс орны ашылады», деді «Kazakh Invest» өкілі. Ол жыл соңына дейін 6 реинвестициялық жобалар іске қосылатынын айтып, өңірлерде де инвесторларды қолдау бойынша айтарлықтай жұмыстар атқарылғанын жеткізді. 1 сәуір мен 11 шілде аралығында компанияның өңірлік бөлімімен 115 кездесу өтіп, инвесторлардың 74 мәселесі қаралған. Оның ішінде визалық қолдау, лицензиялар алу мерзімдерін оңтайландыру, сертификат ресімдеу, ШЖК тарту, өнімді өткізу, кедендік преференциялар, жер телімін ресімдеу, газдандыру, инфрақұрылым сияқты 22 мәселе оң шешімін тауыпты. Қазіргі таңда тағы 52 мәселе жұмыс үстінде көрінеді.
«Қазақстандық экспортты сүйемелдеу, ілгерілету және дамыту саласында қазақстандық бизнестің қатысуымен 146 жергілікті, 600 шетелдік компания-
ны қамтитын 10 елде 16 экспорттық шара өтті. Қол қойылған экспорттық келісімшарттар құны 95,4 млн долларын құрады», деді М.Қабашев.
«Адал адамдар елінің» мерекесі
ЭКСПО-2017 қалашығындағы ұлттық мерекелер легі жалғасуда. Күні кеше Африкадағы Буркина-Фасо мемлекеті төл күндерін атап өтті. Өздерін «адал адамдар елі» деп әспеттейтін олардың мерекесінде екі елдің туы көтеріліп, әнұраны шырқалды.
Халықаралық көрмеге келушілер Африка плаза павильонын аралап, Буркина-Фасо елінде қолданылатын баламалы қуат көздерімен танысты. Сондай-ақ, павильон алдына жиылған көрермен-қауым африкалық өнерпаздардың концертін тамашалады.
Мемлекеттен келген делегацияның жетекшісі Исса Бенджамин Багуян шараның ресми бөлімінде сөз сөйлеп, Қазақстан басшылығына шексіз алғысын жеткізді. «Осындай ауқымды халықаралық көрмеге қатысып жатқан Буркина-Фасо елі үшін бұл – үлкен мүмкіндік. Баламалы қуат көздерінен біз күн энергиясын жиі пайдаланамыз. 2030 жылға дейін елдегі күн стансаларын көбейтуді жоспарлап отырмыз. Оған техникалық жобалар да дайын. Инвестиция тарту мақсатында елде кәсіп жүргізу жағдайын жеңілдеттік», деді ол.
Буркина-Фасо елінде баламалы қуат көздері қатарында күн энергиясы мен биомасса қалдықтары жиі қолданылады. Африканың батысында орналасқан мемлекет Қазақстанға географиялық орналасу және халқының саны жағынан ұқсас болып келеді. Бұрын Жоғары Вольта Республикасы атанған ел 1984 жылы атауын Буркина-Фасо деп өзгерткен. Павильонда мақтаның көп кездесуі бұл елдің Африка құрлығында мақта өндіруден алғашқы орында екенінен хабар береді.
Халқының 90 пайызы ауыл шаруашылығымен айналысатын Буркина-Фасо елінің павильонына қызығушылық танытып, сол елден әкелінген базарлықтарды сатып алып жатқандар жетерлік. Шара кезінде осы елден келген өнерпаздар жиналған жұртты өзгеше өнерлерімен тәнті етті.
Топтаманы дайындаған
Асхат РАЙҚҰЛ,
«Егемен Қазақстан»
Суреттерді түсірген
Ерлан Омаров,
«Егемен Қазақстан»
