![Достықты дәріптеген, туысты бауыр еткен Сабантой](/article_photo/1500002562_article_b.jpeg)
Сабантой мерекесіне қатысу үшін Қостанайға Татарстан Республикасының президенті Рустам Минниханов келді. Мәртебелі қонақтың Қостанайдағы күмбезді залда Қазақстанның барлық облыстарынан келген татар-башқұрт диаспорасының, жергілікті этномәдени орталықтар мен зиялы қауым, жұртшылық өкілдерімен кездесуі болды.
Кездесуде облыс әкімі Архимед Мұхамбетов:
– Елбасы Нұрсұлтан Назарбаевтың сарабдал ұлттық саясаты мен қазақ пен қазақстандықтардың даналыққа суарылған толеранттылығы арқасында елімізде келісім мен татулық сақталды, – деді.
Қазақ жерін өзінің кіші отанына, құт мекеніне айналдырған туыс халықтардың бірі – татар мен башқұрт. Бүгінде Қостанай облысын 16 мың татар, 4 мыңдай башқұрт жайлап отыр. Республикада олардың саны 500 мыңдай болады. Бұл саны жағынан республикадағы ұлт пен ұлыстар арасында бесінші орын алады деген сөз. Олардың тілін, өнерін, дәстүрін, дінін сақтау үшін қажетті бүкіл жағдай жасалғанына барлығы да куә.
– Қазіргідей ырғағы тым жылдам жаһандану заманында қай ұлтқа да тілін, дәстүрін, мәдени мұралары мен дінін сақтау оңайға түспейді. Оның өзектілігімен Татарстанда да бетпе-бет келіп отырмыз. Сондықтан Қазақстанда жүзеге асып жатқан істер ерекше құрметке, алғысқа ие дер едім, – деді Татарстан президенті Рустам Минниханов. Ол, сонымен қатар, Қазақстанның экономикалық дамуына, әлем алпауыттарын мойындатып келе жатқанына тәнті екенін, халықаралық ЭКСПО-2017 көрмесін өткізуді жеңіп алуының өзі осы сөзінің куәсі, үлкен жетістік екенін жеткізді.
Басқосуда сөз алған Қазақстан татар-башқұрт конгресінің төрағасы Тауфик Кәрімов елімізде Татарстан мен Қазақстан арасындағы жаңа деңгейге көтерілген экономикалық, мәдени және қарапайым адами байланыстар туысқан екі халық достығының нығая беруіне қызмет ететінін айтты. Сонымен қатар, елімізде интеграциялық байланысты дамыту мақсатында және тұрғындар өтінішін ескере келе «Қазақстан темір жолы» акционерлік қоғамының басшылығына жасаған «Астана-Қазан» бағытында вагон тіркеу туралы өтінішін қажет болған жағдайда Татарстан президентінің қолдауын өтінді. Қазақ пен татар халқының мәдени, тіпті рухани байланысы тұтас бір тарих десе артық емес. Белгілі кәсіпкер-меценаттар, Мұхаметжан Сералин шығарған «Айқап» журналының қаржылық жағын көтерген ағайынды Яушевтардың пассажы Қостанай қаласының орталығында бүгінге дейін тұр.
Тауфик Кәрімов те, Қостанай облыстық татар-башқұрт этномәдени бірлестігінің жетекшісі Ринат Бектемісов те облыс орталығындағы Марал ишан атындағы мешіттің тарихи қалпының сақталуына ықпал көрсетілуін өтінді. Қостанайдағы ірге тепкеніне 120 жылдан асқан мешіт қазақ пен татар халықтары арасындағы рухани байланыстың, түбі бір туыстықтың нағыз тарихи көрінісі болып табылады. Көнекөз қариялар жеткізген тарихи деректер бойынша, сәулетті мешітті Тобыл бойындағы қазақтардың жинап берген қаржысына Яушевтар Қазан қаласынан шебер шақырып салдырған екен. Осы салтанатты басқосуда облыс әкімі Архимед Мұхамбетов көпшілікке тарихи ғимараттың республикалық мұсылмандар басқармасының балансында екенін, қазір оны коммуналдық меншікке көшіру жөніндегі жұмыстар жүріп жатқанын, осыдан кейін жөндеу жұмыстарына, одан әрі ұстауға қаржы бөлінетіндігін айтты.
Мұнан кейін Татарстан президенті Рустам Минниханов AllurGroup тобына енетін «СарыарқаАвтоПром» машина жасау зауытында болды. Онда татарстандық қонақтарға осындағы машина құрастыру желілері, конвейерден шығып жатқан бренд – JAC IEV6S электромобилі көрсетілді. Электромобильге отырып, «сынап» көргеннен кейін өзі кәсіби автошабандоз, спорт шебері, спорттың осы түрінен Ресей және Еуропа жарыстарының жүлдегері Рустам Нұрғалиұлы оған жоғары баға берді. Заманауи көліктің жылдамдығын және жеңіл басқарылатынын айтты. Сонымен қатар, зауыттың қуатына, кеңдігіне, жоғары технологиялармен жабдықталғанына, электромобиль өндірісін игергеніне ризалығын жеткізді.
Кездесуде AllurGroup директорлар кеңесінің төрағасы Андрей Лаврентьев Рустам Минниханов арқылы Татарстан автомотоспорт федерациясының пайдалануына бір JAC IEV6S электромобилін сыйға тартты. Татарстан президенті мен AllurGroup тобының өкілдері автомобиль зауыттарының және машина жасау кластерінің базалық негізі бар Татарстан Республикасы мен қазақстандық автомобиль өнеркәсібі осы салада әріптес болуға, тізе қосып жұмыс істеуге дайын екендіктерін білдірді.
Сабантой мерекесі Тобыл жағасында орналасқан Қазақстан Тәуелсіздігінің 25 жылдығы атындағы демалыс саябағында жалғасын тапты. Сабантой – тек татар халқының ғана емес, Қазақстанды жайлаған, Қостанайды құт мекенім деп білген баршаның мерекесі екеніне куә етті, жиналған жұртта есеп болған жоқ.
Қазақ жеріндегі ұйыған бірлік, татулық, даму осында тұрып жатқан татар халқының өкілдерінен білінеді. Елбасы Нұрсұлтан Назарбаевтың кемел саясатының арқасында менің қандастарым Қазақстанда ешнәрседен кенде болып отырған жоқ. Тілін де, дінін де, дәстүрін де сақтауға тамаша мүмкіндік алған. Қос халықтың тарихы бүгінде олардың игілігіне айналған. Қазақ топырағы татар халқына Назип Жиғанов, Латиф Хамиди секілді композиторларды берді. Ақын Ғабдолла Тоқай Татарстанда туғанмен, қазақ жерінде ақын болып қалыптасты. Біз Қазаннан, Қазақстанның барлық шалғайынан татар-башқұрт бауырларды шақырып, осы халықтық мерекені өткізіп отырған Қостанай облысының басшылығына алғысымды айтамыз, – деді Дүниежүзілік татарлар конгресі атқару комитетінің төрағасы, Татарстан мемлекеттік кеңесінің депутаты Ринат Зәкіров.
Тобыл жағасынан орын тепкен «қазақ ауылында» Татарстан делегациясына қазақ халқының салт-дәстүрлері көрсетілді. Қостанай облыстық филармониясының өнерпаздары мен Татарстаннан келген «Ақеділ» ән-би ансамблі Тобыл жағасын ән мен күйге бөледі. Сонымен қатар, Ахтаныш ауданы дайындап әкелген «татар ауылынан» қостанайлықтар татар халқының дәстүр-салтына, өнеріне қанық болды. «Қазақ ауылында» татарларды домбыраны сөйлеткен әнші-жыршылар қарсы алса, «татар ауылында» татар әуендерін төккен гармонь сандуғаштай сайрады.
– Татарстан мен Қостанай облысы экономикалық, мәдени байланыс орнатты. Татарстан қай сала болсын даму жағынан Ресей аймақтарының ішінде көш бастап келеді. Осыдан бір жыл бұрын Рустам Нұрғалиұлы біздің Елбасымызбен кездескенде, Нұрсұлтан Әбішұлы «Ресеймен қалай болсақ, Татарстанмен де сондай жақын, жылы қарым-қатынастамыз. Татар мен қазақ халқын тарихымыз, тіліміз, салт-дәстүріміз байланыстырады» деген болатын. Біз бүгін екі жақты келісімдер жасадық, бірқатар кәсіпорында болдық, екі ел аймақтарының ынтымақтаса жұмыс істеуін сөз еттік, – деді облыс әкімі Архимед Мұхамбетов.
Сабантой қызығы күні бойы жалғасты. Татар-башқұрт халықтарының ұлттық ойындары көрсетілді. Татарлардың ұлттық спорты корэштан жарыста түйе палуан атанған қостанайлық Ержан Қабибуллинге Татарстан президенті Рустам Минниханов өз қолынан темір тұлпардың кілтін ұстатты. Сән-салтанаты барынша әсем сабантой алысты жақын, туысты бауыр еткендей, достықтың жібін ширата түскендей болды.
Нәзира ЖӘРІМБЕТОВА,
«Егемен Қазақстан»
ҚОСТАНАЙ