![Құнды қазына қоры](/article_photo/1500003549_article_b.jpeg)
Аталмыш орталық осыдан бір апта бұрын ашылған болатын. Қазіргі таңда бұл мекеменің қорына байырғы рухани қазына көзі – 468 нысан топтастырылса, оның 108-і көне қолжазбалар да, қалған 306-сы сирек кездесетін ескі кітаптар көрінеді. Сондай-ақ, кейбір құнды дүниелер есепті дискіге жинақталыпты.
Ескі кітаптар негізінен ХVІІ-ХІХ ғасырлар туындысы. Көбі араб, парсы тілдерінде шағатай жазуымен жазылған. Тіпті, қытай иероглифтерімен таңбаланған бірен-сарын дүниелер де тұр. Сондай-ақ, төте жазу, латын әліпбиімен жарық көрген ХХ ғасыр басындағы туындылар да бар.
Атап айтсақ, ХІХ ғасырдың басы 1831 жылы Қазан қаласында жарық көрген парсы ақыны Фердаусидің «Шахнамасы», 1895 жылы жарық көрген «Араб-түрік сөздігі», хижраның 1364 (1894) жылы жазылған авторы белгісіз Мұхаммед пайғамбардың өмірбаяны туралы қолжазба, 1904 жылы Қазан қаласында тасқа басылған Қожа Ахмет Ясауидың «Диуани хикметі», Шамсидин Мұхамед әл-Хорасанидың 1905 жылы шыққан «Әбу Ханифа мәсхабының фиқһ мәселелері» атты шариғи туындысы, шағатай тілінде жазылып 1911 жылы жарық көрген «Исламның құқық мәселелері» қатарлы құнды қазыналар топтастырылған.
Сонымен қатар, патшалық Ресей тарихшысы, түріктанушы, орыс география қоғамының негізін қалаушылардың бірі Алексей Ираклиевич Левшиннің 1832 жылы орыс тілінде жазылған «Описание киргиз-казачьих или киргиз-кайсацких гор и степей» атты қазақ тарихына қатысты туындысының 1932 жылы Санкт-Петербургте жарық көрген жаңарған нұсқасы тұр мұнда. Бұдан басқа 1938 жылы латын әрпімен басылған әдебиеттанушы ғалым Қ.Жұмалиевтің «Әдебиет теориясы» және ақын Кәрібай Таңатаровтың Шыңжаң өлкесінен әкелінген қолжазбасы қатарлы дүниелерді көруге болады.
Көрмені көпшілік көрермендермен қатар Швецияның Қазақстандағы төтенше және өкілетті елшісі Христиан Камилл мырза бастаған елшілік қызметкерлері тамашалап, олар шараны ұйымдастырған мекеме басшыларына алғысын білдірді.
Бекен Қайратұлы,
«Егемен Қазақстан»
Суреттерді түсірген
Орынбай БАЛМҰРАТ,
«Егемен Қазақстан»