Кеше Премьер-Министр Кәрім Мәсімовтің төрағалығымен Үкімет отырысы өтті. Онда Үкімет мүшелері сот жүйесін жетілдіру жөніндегі бірқатар заң жобалары мен «2011-2013 жылдарға арналған республикалық бюджет туралы Қазақстан Республикасының Заңын жүзеге асыру туралы» Үкіметтің қаулысына өзгерістер мен толықтырулар енгізу туралы қаулы жобасын талқылап, бірауыздан мақұлдады.
Алдымен Қаржы министрі Болат Жәмішев қаулы жобасының 2011 жылы 20 қазанда Елбасы қол қойған 2011 жылғы нақтыланған бюджетті іске асыруға арналғанын және республикалық бюджеттік комиссияның отырысында мақұлданғанын атап өтті. Қаулы жобасы 2011 жылы қаражатты Білім және ғылым, Ауыл шаруашылығы, Қорғаныс, Туризм және спорт, Көлік және коммуникация министрліктеріне қайта бөлу, бюджет қаражатын тиімді пайдалану және уақтылы игеру мақсатын көздейді. Бұдан басқа Ауыл шаруашылығы, Қаржы, Білім және ғылым министрліктері мен Құрылыс және тұрғын үй-коммуналдық шаруашылық істері агенттігі бойынша мемлекеттік тапсырыстар тізбесіне толықтырулар көзделеді, деді министр. Б.Жәмішев. Үкімет басшысынан биылғы бөлініп отырған қаражатты тиімді игеру мақсатында республикалық бюджеттік бағдарламалардың әкімшілеріне міндеттемелер мен төлемдер бойынша қаржыландырудың жиынтық жоспарына өзгерістер мен толықтырулары нақтыланған бюджет бағдарламалары бойынша тиісті өзгерістер енгізуге тапсырма беруді сұрады.
Бұдан кейінгі баяндаманы Жоғарғы Сот Төрағасы Бектас Бекназаров жасады. Ол Үкімет мүшелерін «Сот жүйесі мен судьялар мәртебесі туралы» Конституциялық заңға өзгертулер мен толықтырулар енгізу туралы заң жобасымен таныстырды. «Сот жүйесі қазір өзгертуді қажет етеді. 2011 жылдың 1 қаңтарынан бастап үш буынды сот жүйесі енгізілген. Бұл жағынан келгенде Қазақстандағы сот жүйесінде әлемдегі озық мемлекеттердің қатарына сәйкес келетін, көпшіліктің көкейінен шығатын жүйе құрылған. Дегенмен, осы жүйенің кейбір тұстары әлі де болса пысықталып, қазіргі уақыт талабына сай сәйкестендіруді қажет етіп отыр», – деді ол. Жоғарғы Сот Төрағасы бұл орайда ең алдымен сот шешімінің тез әрі жылдам іске асуының жолға қойылуы қажеттігін баса айтты. Сотқа келіп жүгінген әрбір азамат, заңды немесе жеке тұлға өз мәселесін тез арада шешіп, сот орындау қағазын алғаннан кейін орындау процесіне баруы керек. Ал қазіргі уақытта Жоғарғы Сот құзыретінің шектен тыс кеңеюіне байланысты осы мәселенің арасы алшақтап кеткенін уақыттың өзі көрсетіп отыр. Қазір заңды күшіне енген сот шешімдері актілерінің заңдылығын тексеру тек қана Жоғарғы Соттың құзыретіне берілген. Бізде жылына миллионға жуық сот істері қаралады. Ал енді Жоғарғы Сот осы істер бойынша, заңды күшіне енген сот шешімдерінің заңдылығын тексеруге барлық кезде үлгеріп отыр ма, оған даяр ма деген мәселеге келгенде уақыттың өзі бұл мәселеде жергілікті соттардың әлеуетін кеңейту қажеттігін көрсетіп отыр, деді Б.Бекназаров.
Соңғы 5 жылда судьялардың 40 пайызы тәртіптік жауапкершілікке тартылған көрінеді. Тәртіптік жауапкершілікке тартылған істердің барлығын зерделеп шықтық. Бірқатар жағдайларда бұл тәртіптік істер болмауы тиіс еді және бірқатары ұзаққа созылған, деді Жоғарғы Сот Төрағасы. Оның атап өтуінше, судьялардың тәртіптік жауапкершілігі мәселесі жергілікті жерлерде облыстық сот төрағаларының қарауына берілмеуі тиіс. Яғни, Жоғарғы Сот жанындағы бірыңғай сот төресі соттардың тәртіптік жауапкершілігі мәселесін қарап, шешуі қажет. Осылайша Жоғарғы Сот ведомствоішілік қысымнан судьяларды қорғау тетігін күшейтіп, олардың тәуелсіз болуына жәрдемдеспек.
Жоғарғы Сот Төрағасы аудандық, қалалық және оларға теңестірілген сот төрағаларының лауазымды қызметін атқару мерзімін 3 жылға дейін қысқартуды ұсынды. Облыстық соттарда апелляциялық сот алқасын құру қажет. Нақтылай түссек, апелляциялық сот алқасы азаматтық, әкімшілік және қылмыстық істер бойынша алқаларға бөлінеді. Осылайша мамандандыруды одан әрі тереңдету желісі жалғасатын болады, деген Б.Бекназаров кассациялық сот алқасына облыстық соттардың төрағалары басшылық жасауы қажеттігін айтты. Қазіргі уақытта мұндай тәжірибе жоқ көрінеді. Облыстық сот төрағалары сот ісін қараудан бөлектенген және олар іс жүзінде шаруашылық-құрылыс, кадр, қамтамасыз ету сынды мәселелермен айналысатындығын тілге тиек еткен Б.Бекназаров, облыстық сот төрағалары судья болып табылатындықтан өздерінің қызметтерін атқаруға міндетті екендігін еске салды.
Баяндамашының атап өтуінше, ағымдағы жылдың тек 5 айында Жоғарғы Сот аудандық және одан төмен тұратын соттардың 158 сот актісін қайта қараған. Бұл орайда 57 млрд. теңгенің мемлекет мүддесі қорғалыпты. Жоғарғы Сот ұсынып отырған заң жобасында кез келген іс ең бірінші сатыда аудандық және оған теңестірілген соттарда қаралуы керектігі баса айтылды. Заңда белгіленген мерзім бойынша сот шешіміне наразы болған тұлға немесе тарап апелляциялық шағым беруі қажет. Апелляциялық шағым қаралғаннан кейін сот актісі бірден күшіне енуі тиіс. Орындау қағазы жазылып, сот актісі орындалуға жіберілуі қажет. Ал егер апелляциядан кейін күшіне енген сот актісімен келіспейтін тараптар болатын болса, онда кассациялық сот алқасына, облыстық сотқа шағымдануы қажет. «Бұл мыңдаған азаматтардың, мыңдаған істердің әр облыс орталықтарынан бізге, Жоғарғы Сотқа келуінің қажеттігі жоқ екендігін көрсетеді. Облыстық соттар қазір кәсіптік деңгейі жоғары, барлық жағдайда істер бойынша дұрыс шешім қабылдайтын судьялармен қамтамасыз етілген. Сондықтан кассациялық сот алқасы 6 айлық мерзім ішінде заңды күшіне енген сот актілерін қарап, оның заңдылығын тексеріп, өз қаулысын қабылдайды», – деді Жоғарғы Сот Төрағасы.
Сот жүйесін жетілдіруге бағытталған заң жобаларын Үкімет мүшелері бірауыздан мақұлдады. Ал Премьер-Министр өз кезегінде мақұлданған заң жобаларының әділ сотты сапалы атқаруға және сот жүйесін жақсартуға бағытталып отырғанын атап көрсетті. «Біз аталмыш заң жобасын қолдаймыз және біздің азаматтарымыздың, заңды тұлғаларымыздың құқықтары бұрынғыдан да жақсырақ қорғалатын болады деген сенімдеміз. Сонда ғана, Елбасы берген тапсырмалар сапалы орындалады дей аламыз», деді Үкімет басшысы.
Венера ТҮГЕЛБАЙ.