Үш облыс ұйымдастырған көрмеде көрініс тапты
Кеше Мемлекет басшысы Нұрсұлтан Назарбаев Алматы, Павлодар және Батыс Қазақстан облыстарының Астанадағы күндері аясында осы аймақтардың экономикалық, әлеуметтік және мәдени салаларда жеткен жетістіктеріне арналып ұйымдастырылған көрмемен танысты.
![271011-2](http://old.egemen.kz/2011img/271011-2.jpg)
Бейбітшілік және келісім сарайында өткен бұл көрменің мақсаты – Қазақстанның 3 облысының ел Тәуелсіздігінің 20 жылдық бедеріндегі белес-асуларын көрсету. Көрмені тамашалау кезінде Нұрсұлтан Назарбаев аймақ басшыларының өз өңірлеріндегі әлеуметтік-экономикалық даму және үдемелі индустриялық-инновациялық даму бағдарламасының жүзеге асырылуы жөніндегі есептерін тыңдады.
Мемлекет басшысы ең алдымен Алматы облысының қол жеткізген нәтижелерінің қорытындысына арналған көрмемен танысты. Облыс әкімі А.Мұсаханов Мемлекет басшысына өңірдің экономикалық жай-күйі мен дамуы туралы баяндап берді. Бір атап өтерлігі, тәуелсіздік жылдарында облыста өмір сүру деңгейінің барлық саласында да ауқымды жаңарулар жүргізілген. Мәселен, 2011 жылы облыста жалпы өңірлік өнімді 1056,9 млрд. теңгеге дейін, ал тұрғындардың жан басына шаққандағы табысын 560,9 мың теңгеге дейін жеткізу жоспарлануда. Бұл облыс республикадағы ірі агроиндустриялық өңірдің бірі саналады. Өйткені, жалпыреспубликалық көлемнің аграрлық сектор бойынша жалпы өнімінің 16 пайызға жуығы осы облыста өндіріледі. 2010 жылы ауыл шаруашылығы жалпы өнімінің көлемі 227,8 млрд. теңгеге жетіп, 1991 жылғы деңгейден 69 есе ұлғайған. Ағымдағы жылы өнеркәсіп өндірісінің көлемін 359,4 млрд. теңгеге жеткізіп, 1996 жылғы көрсеткіштен 16,6 есеге арттыру жоспарлануда.
Соңғы 10 жылда облыста 867 жаңа нысан пайдалануға беріліп, 21 мыңнан астам жұмыс орны ашылды. Белсенді шағын және орта бизнес субъектілерінің саны 1998 жылғы 30 мыңнан 2010 жылы 108 мың бірлікке дейін ұлғайды. Ағымдағы жылы Индустрияландыру картасы аясында сомасы 216,9 миллиард теңгенің 12 нысанын пайдалануға беру көзделген, оның ішінде бірінші жартыжылдықта 5 нысан пайдалануға берілді.
Нұрсұлтан Назарбаев бұдан кейін Қазақстан Тәуелсіздігінің 20 жылында Павлодар облысы қол жеткізген нәтижелердің қорытындысына арналған экспозициямен танысты. Облыс әкімі Б.Сағынтаев Мемлекет басшысына өңірдегі әлеуметтік және экономикалық жетістіктер туралы баяндады. Павлодар облысы – экономика және әлеуметтік дамудың барлық көрсеткіштері бойынша оң нәтижелер көрсетіп отырған аймақ. Жалпы өңірлік өнім көлемі 2010 жылы 1031,9 млрд. теңгені құрады, 1993 жылмен салыстырғанда, 430 есе ұлғайды. Жалпы өңірлік өнім мөлшері тұрғындардың жан басына шаққанда 18 есеге өсіп, 1993 жылғы 531,9 доллардан 2010 жылы 9387,1 долларға ұлғайды. 1993 жылдан бастап өндірілген өнеркәсіп өнімінің көлемі 256 есе өсіп, 2010 жылы 844 млрд. теңгені құраған. Үдемелі индустриялық-инновациялық даму бағдарламасы өңірдің экономикалық дамуына үлкен серпін берді. Бағдарлама аясында 168 инвестициялық жоба іске асырылуда, бүгінгі күні 42 өндіріс іске қосылды. 2016 жылға дейін тағы 126 жобаны іске қосу жоспарлануда. Бұл облыс экономикасына бір триллионнан астам теңге тартуға және 10300 жаңа жұмыс орнын ашуға мүмкіндік береді. 1993 жылдан бастап ауыл шаруашылығының жалпы өнім көлемі 73 есе өсті, 2010 жылдың соңына қарай 60,7 млрд. теңгеге жетті.
Президент ел Тәуелсіздігінің 20 жылында Батыс Қазақстан облысы қол жеткізген нәтижелердің қорытындысына арналған көрмемен де танысты. Облыс әкімі Б.Ізмұхамбетов Мемлекет басшысына өңірдің экономикалық, әлеуметтік және гуманитарлық даму серпіні туралы баяндады. Облыста өндірілген жалпы өңірлік өнім көлемі соңғы 15 жылда 25 млрд. теңгеден 1048,8 млрд. теңгеге дейін өсті, халықтың жан басына шаққандағы табысы 38,5 мың теңгеден 1730,4 мың теңгеге дейін ұлғайды. Облыстағы кәсіпорындардың базалық өндірісі көлемінің ұдайы артуы, жаңа өндірістің дамуы, қуатты жаңа өндірістерді ендіру есебінен өнеркәсіп өнімі 990,1 млрд. теңгеге дейін өсті (1995 жылы – 12,3 млрд. теңге болған). Өңдеуші саладағы өнімдердің бәсекеге қабілетін арттыру мақсатында кәсіпорын базасында инвестициялық жобаларды іске асыру жөнінде жұмыстар жүргізілуде. Осы ретте экспортқа бағытталған саланы дамыту негізгі басымдық ретінде қаралып отыр.
Сондай-ақ, бүгінде индустрияландыру картасы аясында жалпы сомасы 96,4 млрд. теңгені құрайтын 20 инвестициялық жоба іске асырылуда. Жобаны іске асыру барысында 900 тұрақты жұмыс орнын ашу қарастырылған. Жыл сайын 2 мың жаңа шағын кәсіпкерлік субъектілері тіркеледі. Өңірдің экономикалық белсенді тұрғындарының бестен бір бөлігі шағын бизнес саласымен айналысады.
Көрмемен танысып шыққаннан кейін Елбасы Нұрсұлтан Назарбаев Алматы, Павлодар және Батыс Қазақстан облыстары өнер шеберлерінің қатысуымен өткен гала-концертті тамашалады. Құрманғазының «Балбырауын» күйімен ашылған концерттік бағдарлама аясында Ықыластың «Кертолғауы», Махамбеттің «Ақжелең» күйлері күмбірлеп, облыс өнерпаздарының орындауында «Ақ жайық – ақ еркем», «Оралым – асыл қалам», «Ағады Жайық, ағады», «Баянауыл вальсі», «Жер жәннаты – Жетісу», «Қазағымның қанаты», «Асқақта, Астана!», «Үш қоңыр», т.б. әндер шырқалды.
Ләйла ЕДІЛҚЫЗЫ.
Суреттерді түсіргендер С.БОНДАРЕНКО, Б.ОТАРБАЕВ.