Әңгімені сәл әріден қозғасам, мәселе осыдан 6 жыл бұрын, 8 жылға тарта Қарағанды облысы Шет ауданы әкімі қызметін атқарып жүрген кезімде сол кездегі облыс әкімі К.Мұхамеджановтың: «Кәкімжан, бұл жақта аз уақыт қызмет істеген жоқсың, Қарағандыға кел, пәтер, бір облыстық басқармаға басшылық қызмет беремін», дегенінен басталды. Облыс әкімі ұсынысын қабыл алғаныммен, өкінішке орай, ол сөзінде тұрмады, үш айдан аса жұмыссыз жүріп, әрең дегенде, облыстық жер қатынастары басқармасы бастығы орынбасары қызметіне орналастым. Осы мекемеде 6 жылға тарта еңбек еткенде, 2010 жылғы 8 қарашада басқарма қызметкерлері санының өзгеруіне, Қазақстан Үкіметінің «Жергілікті атқарушы органдар штат санын бекітудегі кейбір мәселелер туралы» 2004 жылғы 15 желтоқсандағы №1324 қаулысына сәйкес қызметім қысқартылды. Осыған байланысты 2010 жылғы 10 қарашада облыс әкімі С.Ахметовке келешек қызметімді анықтауға ықпал етуін сұрап, жазбаша өтініш жасадым. Жауап болмаған соң, 2011 жылдың 11 қаңтарында қабылдауында болдым. Әкім менің қызметімнің қысқарғанын білмегенін айтып, қабылдауға қатысып отырған аппарат қызметкерлеріне реніш білдірді, маған да осы уақытқа дейін неге келмедіңіз деді. Шаруамның шешілетініне толық сенгендей, әрі қарай еш сөз айтпадым. Бірақ мәселе онымен де шешілмегендіктен, облыс әкіміне жазбаша хат жолдап, қабылдауын өтіндім, тағы жауап болмады. Одан соң Ауыл шаруашылығы министрлігіне қарасты өндірістік, ғылыми құрылымдар басшыларының қызметке орналасу мәселесі бойынша үстіміздегі жылдың 13 шілдесінде министр А.Мамытбековтің қабылдауында болдым. Министр маған, білім, тәжірибемнің молдығын айтып, бюджеттік мекемелерде жалақы аз, неге жеке шаруашылық құрып алмайсыз деді. Мен күтпеген жауапқа іштей реніш білдіріп, «ол үшін мен елімізде жекешелендіру жүргізілген жылдарда ауыл тұрғындары алдында реформа маңыздылығын дәлелдеп, балалар жәрдемақысы, жалақы, зейнетақы төлемдерінің кешіктірілуіне байланысты наразылық білдірушілер алдында жауапкершілікті мойныма алып, түсіндіру жұмыстарын жүргізіп бас қатырмай, қомақты мемлекет мүлкін иеленіп қалу жағын ойлауым керек еді, енді кеш, менен кәсіпкер шықпайды», дедім. Асылжан Сарыбайұлы, түсінгендей: «Уәде бермеймін, ойланамын, сіз туралы сұраймын, cосын қызмет ұсынуым мүмкін», деді. Бұл әңгіменің соңы да созылып барады.
Әрине, бұл жерде жұмыссыздық бүгінгі заманның заңды құбылысына айналғалы қашан, мемлекеттік қызметке орналасудың арнайы тәртібі де бар, бұл жағдай жалғыз сіздің басыңызда ғана емес, сондықтан бұл мәселені осынша күрделендірудің мәні неде деген сұрақ туындауы мүмкін. Мемлекеттік қызметке орналасудағы бүгінгі келеңсіздіктер оларды бастарынан өткергендер ғана емес, халықтың басым бөлігі сезетіндей жағдайға жетті десек, еш қателеспейтін сияқтымыз. Менің жұмыссыздық жағдайымды шешудегі осындай көзқарасты да мемлекеттік қызметкерлер құқығын қорғау мәселесіндегі енжарлыққа жатқызғым келеді. Бұған дәлел, 20 жылдан астам мемлекеттік қызмет өтілім бар, сонымен қатар, қызметімнен өз еркіммен, заң бұзушылық іс-әрекеттерден немесе міндеттерімді атқара алмаудан босатылғаным жоқ. Демек, бұл жағдай менің бұған дейін қызмет атқарған әкімшілік-аймақтық мемлекеттік билік органдарынан тиісті қызмет талап етуіме де мүмкіндік беретін сияқты. Асыл тұқымды малды шетелдерден тасымалдайтын немесе елімізде стратегиялық маңызды бидай өнімділігін нақты анықтай алмайтын жағдайға жеткен бүгінгідей кезеңде білімі, қабілеті, тәжірибесі мол мамандарды, әлі де бағыт-бағдары нақтылана қоймаған ауыл шаруашылығы саласында пайдалану мемлекетіміз үшін де тиімді болмас па еді...
Кәкімжан САРХАНОВ, ауыл шаруашылығы ғылымдарының кандидаты.
Қарағанды.