Шағын бизнесті дамыту бағдарламасы таныстырылды

Бұл бағдарламаны Еуропалық одақ қаржыландырады әрі ол Орталық Азиядағы қар­жы инс­титуттарының қызмет­керлерін онлайн оқытуға мүм­кіндік береді. Бағ­дарламаны әзір­леушілер дәріс алушыларға ың­ғайлы болу үшін дербес құрылғыларда оқытуды да ескерген.

Осынау аймақтық бағдарлама шағын бизнесті қаржыландыру саласына ноу-хау енгізуді қарас­тырады.

Бағдарламаның тұсаукесеріне ЕО, ЕҚДБ, Қазақстан Үкіме­ті мен Ұлттық банкі, халық­ара­лық ұйым­дар және қаржы ­ өкіл­дері қатысып, «Банк са­ла­сының бола­шағы және қар­жы қыз­мет­терін ұсы­ну» тақы­рыбында пікір алмас­ты.

Сол сияқты осы бағдарлама шеңбе­рінде Орталық Азия­да микро, шағын және орта кәсіп­орындарды қаржылан­дыратын қаржы институттарына арналған білім алмасу плат­формасы да іске қосылмақ. Сайт жергілікті қаржы институттарына осы саладағы ЕҚДБ тәжірибесімен танысып, түрлі тақырыптағы тренингтерден өтуге жол ашады.

Қазірдің өзінде платформа ша­ғын және орта кәсіп­орындардың несие төлеуге қабілеттілігін сараптайтын тренингтер ұсынуда. Бірақ білім алмасу бағдарламасы ішінара қол­жетімді. Алдағы күндері Орта­лық Азия елдерінде онлайн оқытудың жүйесі толық­қан­ды жұмыс істейтін болады. Биылғы жылдың ортасына қарай қыз­меткерлерді серти­фикат­тау­дың он­лайн-бағдар­ламасы іске қосы­лады.

Бағдарлама кеңесшісі – IPC (Internationale Projekt Consult GmbH) компаниясы. IPC шағын және орта бизнесті қаржы­лан­дыруға байланыс­ты жобалар мен оқыту бағдар­ламаларын жа­сау және жүзеге асыруда мол тәжі­рибеге ие компания.

Сондай-ақ бұл бағдарламаға Қазақстандағы «Даму» кәсіп­кер­лікті дамыту қоры» АҚ серіктес болады. Аталмыш қор­дың елі­міздің бүкіл аймағында филиалдары бар. Әрі «Даму» бизнеспен, қоғамдық ұйымдармен және жергілікті атқарушы билікпен ынтымақтастықта айтар­лықтай тәжірибе жинақтап үлгер­ген.

Тұсаукесер барысында Еу­ро­палық одақтың Қазақ­стан­дағы Өкілдігінің сенімді өкілі Золтан Салаи «Қазақстандағы мик­ро, шағын және орта кәсіп­орындардың ең басты қиын­дықтарының бірі қаржыға қол жеткізу. МШОК-ты қолдау экономиканы әртараптандыру мен инновацияны ілгерілетуде өте маңызды. Бұған дейін ЕО және ЕҚДБ көмегімен басқа аймақ­тарда жүзеге асқан бастама жақ­сы нәтижелерге қол жеткізді. Біз Орталық Азиядағы шағын бизнесті дамыту бағдарламасы Қазақстанда тура сондай жемісті болатынына сенімдіміз», деді.

ЕҚДБ-ның Қазақстандағы басшысы Агрис Прейманистің сөзіне қарағанда, бұған дейін ша­ғын және орта бизнесті қар­жы­ландыру жөніндегі оқыту бағ­дарламалары Орталық Азия­ның қаржылық институттары ара­сында айрықша танымал бол­ған. Өйткені бағдарлама заманауи технологияларды пайдаланып қана қоймай, Орталық Азияның ауқымды аудиториясын қамтуды көздейді. Нәтижесінде бұл МШОК-ты қаржыландыруға қатысты бағдарламаларды жақ­сар­тып, тиімді етпек.

«Даму» қорының басқарма төрағасы Абай Сарқұлов «Микро, шағын және орта биз­несті қаржы­ландыру және оларға қызмет көрсету саласында білім алмасу, оқыту және тестілеу үшін цифр­лы платфор­ма құру – қаржы секторы маман­дарына бизнесті дамыту мақсатындағы қаржылық жобаларды дайындау барысында іріктеу негіздерін дұрыс түсінуге мүмкіндік бе­реді», дейді.

Айнаш ЕСАЛИ,

«Егемен Қазақстан»

АЛМАТЫ