Кеше елордада «Эксперт-100-Қазақстан» ІІІ Экономикалық форумы болып өтті. Оған Үкімет басшысы Кәрім Мәсімов қатысып, құттықтау сөз сөйледі.
Аталмыш басқосуға қатысқан ірі бизнес өкілдері бүгінгі экономикалық ахуал шеңберінде қазақстандық бизнес қызметінің бірқатар маңызды мәселелерін талқылады. Атап айтқанда, негізгі әңгіме ішкі инвестициялық тетіктер тиімділігінің жеткілікті деңгейде еместігіне, инновациялық артықшылықтар қалыптастыру мен корпаративті басқару мәдениетін дамыту қажеттілігіне қатысты мәселелер төңірегінде өрбіді. Сондай-ақ, шара барысында салаға қатысты тақырыптарды қамтыған үш секциялық отырыс болды.
«Эксперт Қазақстан» рейтинг агенттігінің бағалауы бойынша, Қазақстандағы ірі бизнестің 2010 жылғы рейтингі ел экономикасының дағдарыстың терең фазасынан шыққанын дәлелдеп отыр. Аталған форумда бұл мәселе жан-жақты айтылды.
Форумда тілге тиек етілген мәліметтерге сүйенсек, аталмыш рейтингке қатысушы компаниялардың жинақталған табысы 13 трлн. теңгеден асқан. Бұл 2009 жылмен салыстырғанда 25 пайызға, 2007 жылмен салыстырғанда 50 пайызға артық көрсеткіш. Мұндай өсім қарқыны «Әлемнің ең қауырт дамыған экономикасы» дәрежесін иеленуге толық мүмкіндік береді. Ernst&Young мәліметінше, осы дәрежені иемденуші мемлекеттер арасында бірінші орында – Катар, екінші орында – Қытай, ал үшінші орында Қазақстан тұр. Ал өзіміздегі ішкі ұлттық экономиканың көшбасшысы ретінде «Самұрық-Қазына» ҰӘҚ» АҚ деп танылды. Оның табысы былтыр 3,6 трлн. теңгені құраса, бұл өткен жылмен салыстырғанда 23,9 пайызға көп екен. Сонымен бірге, алғашқы ондық биыл «АрселорМиттал Теміртау» АҚ (8-орын) және «Қазцинк» ЖШС (10-орын) сияқты алыптармен толығыпты.
Экономиканың негізгілері қатарынан саналатын отандық ірі өнеркәсіп компаниялары өткен жылы өз табыстарын 37,3 пайызға ұлғайтқан. Дегенмен, өсімнің басты драйверлері деп өнеркәсіптің өндіруші саласын айтқан жөн. Әрине, оған әлемдік рыноктағы мұнай мен металлдар бағасының өсуі әсер еткені анық. Рейтингтегі барлық компаниялардың жиынтық табысының шамамен 71 пайызы мұнай және тау-кен металлургия компаниялары үлесіне тиесілі болған. Мұнайшылардың табысы 34 пайызға өскен. Елімізде өндірілетін бүкіл қара алтын көлемінің жартысынан көбі «Теңізшевройл» мен «Қазмұнайгаз» компанияларының еншісіне тиген. Әрі олардың үлесі жыл санап өсіп келеді. Ал тау-кен металлургия компаниялары өз табысын былтыр 47,7 пайызға арттырған.
Сондай-ақ агроөнеркәсіп кешеніндегі табыс көлемі өткен жылы – 26,6 пайызға, көлік – 24,3, телекоммуникация 16,1 пайызға ұлғайған. Өткен жылы құрылыс компанияларының табысы 11,4 пайызға төмендеген. 2007 жылдан бері құрылыс саласындағы тоқырау жағдайларына тікелей байланысты болған ірі банктердің де табысы айтарлықтай төмендегені белгілі. Алайда, екінші деңгейлі банктердің соңғы уақытта табыстары толыға түскен. Бүгінгі күні олар тұрақты өсімін сақтап отыр. Соңғы төрт жыл ішінде екінші деңгейлі банктердің қаржы жүйесіндегі үлесі 8 пайыздан 15 пайызға өскен.
Әбдірахман ҚЫДЫРБЕК.