ТӘУЕЛСІЗДІК ҚАРЛЫҒАШЫ
Қазақтың жері табиғи байлықтан кенде емес. Әсіресе, мұнай-газ кеніштерінің ішінде “Теңіздің” орны бөлек. Көмірсутекті шикізатымен әлемге әйгілі кен орнын игеру мақсатында 1993 жылы 6 сәуірде Қазақстан Республикасы мен “Шеврон” корпорациясы арасында келісім жасалып, “Теңізшевройл” бірлескен кәсіпорны құрылды. Бұл – Елбасы Нұрсұлтан Назарбаевтың идеясымен құрылған алғашқы бірлескен кәсіпорын. Басқаша айтқанда, «Теңізшевройл» – тәуелсіздіктің қарлығашы. Кеніштің қойнауындағы мұнай қоры о бастан молдығымен әрі күрделігімен ерекшеленеді. Соңғы бағалауларға сәйкес, «Теңіз» кенішінің 2033 жылдың сәуір айына дейінгі есеппен алынуға тиіс қоры 750 миллионнан 1,1 миллиард тоннаны (6-9 миллиард баррель), жалпы барланған қоры 3 миллиард тоннаны (26 миллиард баррель) құрайды. Ал бұған жалғас жатқан Королев кен алаңының көмірсутекті қоры 190 миллион тоннаға (1,5 миллиард баррель) дейінгі шамада деп есептеледі. Осынша мол қор сақталған қойнауқаттың ені 19 шақырым, ұзындығы 21 шақырымды алып жатыр. Осы кеніштен биылғы 9 айда 19 миллион тонна (152 миллион баррель) мұнай өндірді. Осынша мол мұнай өндіруге 2008 жылы қуаттарды кеңейту мақсатында еліміздегі ең ірі инвестициялық жобасын іске асыруының ықпалы тиді. Нақтылай айтқанда, шикі газды қойнауқаттарға кері айдау және зауыттың екінші буыны жобалары іске қосылғаннан кейін мұнай өндіру тәулігіне шамамен 75 000 тоннаға немесе 600 000 баррельге, ал газ 22 миллион текше метрге немесе 750 миллион футқа жетті. «Теңіз» кенішінде іске асырылған бұл жобаларға қазақстандық кәсіпорындар көптеп тартылды. Олардың ішінде “Белкамит”, “Имстальком”, Кентау трансформатор зауыты, Петропавлдағы ауыр мәшине зауыты секілді танымал кәсіпорындар бар. Жергілікті жерден де көптеген кәсіпорын «Теңізшевройлдың» мердігерлігіне таңдалды. 1993 жылдан бері осындай қазақстандық әлеуетті кәсіпорындардың қызметін пайдалануға бөлінген 10,9 миллиард АҚШ долларын құраса, биылғы қыркүйек айына дейін 1,15 миллиард АҚШ доллары қазақстандық тауарлар өндірушілер мен қызмет көрсетушілердің атсалысуымен игерілді. Жыл өткен сайын «Теңізшевройлдың» Қазақстанға тікелей төлемдері де арта түсуде. 1993 жылдан бастап биылғы қыркүйек айына дейінгі кезеңді қоса есептегенде Қазақстанға төленген тікелей төлемдер тұтастай алғанда 55,8 миллиард долларды құрады. Бұл қаржының ішінде бірлескен кәсіпорынның ұлттық кадрларының жалақысы, қазақстандық кәсіпорындар көрсететін қызмет түрлері мен тауарларға, мемлекеттік кәсіпорындарға төленетін тарифтер мен төлемдер, мемлекет бюджетіне аударылатын салық, рояльти түріндегі төлемдер жатады. Биылғы қаңтар-қыркүйек айларында ғана Қазақстанға тікелей төлемдердің мөлшері 10,4 миллиард АҚШ долларын құрап отыр. Айтқандай, ұлттық кадрлар демекші, соңғы жылдары біздің кәсіпорында еңбек ететін қазақстандық қызметкерлердің қатары көбейе түсті. Бұрын бұл көрсеткіш 50 пайызды құраған болса, қазіргі уақытта ұлттық кадрлар үлесі 85 пайызға жетті. Ал ұлттық менеджерлер мен орта буын жетекшілерінің құрамы жалпы қызметкерлердің 75 пайызын құрайды. Бұдан «Теңізшевройл» басшылығының ұлттық кадрларды оқыту, мамандығын жетілдіру арқылы анағұрлым жауапты лауазымдарға жоғарылатуға ден қойғанын аңғаруға болады. Әнуарбек ЖАКИЕВ, «Теңізшевройл» бірлескен кәсіпорны бас директорының орынбасары.ДЕРЕК ПЕН ДӘЙЕК
Тарих және қатысушылар: Әлемдегі ең терең және ірі мұнай кеніштерінің бірі болып саналатын «Теңіз» мұнай кеніші 1979 жылы ашылды. «Теңізшевройл» бірлескен кәсіпорны 1993 жылы 6 сәуірде Қазақстан Республикасы мен «Шеврон» компаниясы арасында жасалған келісім негізінде құрылды. «Теңізшевройлдың» қазіргі кездегі серіктестері: «Шеврон» – 50%, «ҚазМұнайГаз» – 20%, «ЭксонМобил Қазақстан Инк.» – 25% және «ЛукАрко» Б.К. – 5%. Қорлар, өнім өндіру және экспорттау: Жалпы барланған қоры жөнінен «Теңіз» кенішінде 3 миллиард тонна (26 млрд. баррель), ал, Королев кен алаңында 190 миллион тонна (1,5 млрд. баррель) шамасында мұнай бар. «Теңіз» коллекторының ені –19 шақырым (12 миль), ұзындығы – 21 шақырым (13 миль). «Теңізшевройл» 2000 жылдан бері жылдық мұнай өндіру көлемін 182 пайызға ұлғайтты. «Биылғы 9 айда 19 миллион тонна (152 миллион баррель) мұнай өндірілді. Өндірілген мұнай КҚК-ның құбыры арқылы Новороссийскіге, темір жолмен Одесса, Феодосия мен Ақтауға, әрі қарай Батумиге және Кулевиге экспортталады. Өнімнің өзге түрлері: Бірлескен кәсіпорын сұйытылған газ сату көлемін 992 400 тоннаға, ал құрғақ газ сату көлемін 5,1 миллиард текше метрге жеткізді. «Теңізшевройл» 2,9 миллион тонна күкірт сатты, бұл осы кезеңде өндірілген 1,7 миллион тонна күкірттің 170%-ын құрайды. Бұл күндері «Теңізде» сақталған күкірт көлемі 4,5 миллион тоннаға азайды. «Теңізшевройл» күкірттің жоғары сапалы 4 Жерорта теңізі бассейні мен Орта Азия елдеріне және Қазақстан, Ресей, Украина, Қытайға жібереді. Әлеуметтік көмек: «Теңізшевройл» 1993-2010 жылдары өз қызметкерлері мен жергілікті тұрғындардың игілігі үшін Атырау облысының әртүрлі әлеуметтік жобаларына 645 миллион АҚШ доллардан аса қаржы жұмсалды. 2010 жылдан бері «Игілік» бағдарламасы шеңберінде өңірдің әлеуметтік саласын жақсартуға жыл сайын 20 миллион АҚШ доллары көлемінде қаржы бөлінеді. Биыл өңірдің денсаулық сақтау, білім және оқыту салаларының сапасын жақсарту бағытындағы әлеуметтік инвестициялық бағдарламасына шамамен 800 мың АҚШ доллары көлемінде қаржы игерілуде.«ИГІЛІКТІҢ» ИГІЛІГІ
Біздің Жылыой – өңірдегі ең байырғы ауданның бірі. Қазақ мұнайының алғашқы тамшысы да осы аудан аумағынан табылған. Ғасырдан аса мерзім өтсе де «қара алтынның» қайнары таусылған жоқ. Әйгілі «Теңіз» кеніші де біздің аудан аумағында болғандықтан, елімізге, өңірге бет бұрған шетел инвесторлары алдымен біздің ауданға келуге ниет танытады. Сонымен бірге, аудан үстімен Орта Азияға бағыт алған күре жол да өтеді. Демек, Жылыой ауданының орталығына келушілер де, жолаушылап өтушілер де үзілмейді. Сол себептен, 2001 жылы аудандық маңыздағы қала мәртебесі берілген, 60 мыңнан астам тұрғыны бар Құлсары қаласының келбетін, инфрақұрылымын жаңғыртуды қолға алдық. Соның ішінде сонау кеңестік кезеңде жүргізілген су құбыры жүйесін жаңалауға баса көңіл бөлініп отыр. Бұл әрине, мол қаржы қажет ететіндіктен, облыс әкімі Бергей Рысқалиев «Теңізшевройлдың» «Игілік» бағдарламасымен бөлінетін қаржысын Құлсары қаласының сумен жабдықтау жүйесін қайта жаңғыртуға жұмсауды көздеді. Бірлескен кәсіпорыннан жылына 15 миллион АҚШ доллары бөлінеді. Сөйтіп, үш жылда бөлінетін 45 миллион АҚШ долларына жалпы ұзындығы 300 шақырымға жуық су құбырын жаңарту жұмыстары басталып кетті. Шетелдік инвесторлармен бірлесіп құрылған кәсіпорынның қаржысы аудан орталығының инфрақұрылымын жаңғыртуға үлкен қолдау болатыны даусыз. Себебі, Құлсары қаласындағы тұрғындар су құбырының әбден ескіруінен көп қиындық көруші еді. Әсіресе, көп қабатты үйлерде тұратын тұрғындар жоғары қабаттағы пәтерлеріне суды амалсыз даладан таситын. Енді аз ғана уақыттан кейін Құлсары қаласының тұрғындары «Игіліктің» игілігін көретін күні қашық емес. Жылыойлықтардың бірлескен кәсіпорын демеуін көруі бір бұл емес. Бұған дейін де талай рет алып кәсіпорынның қолдауын сезінді. Мәселен, 1993 жылы кәсіпорын Құлсары қаласындағы табиғат апатынан баспанасыз қалғандарға тұрғын үй құрылысын жүргізуге қолдау көрсетті. Майкөмген ауылына табиғи газ желісі тартуға қаржы бөлген еді. Ал Сарықамыс, Кеңарал ауылдарының тұрғындары Жаңақаратон кенті мен Атырау қаласынан «Теңізшевройлдың» қаржыландыруымен жаңадан тұрғызылған қалашықтағы тұрғын үйлерге көшірілді. Рахметолла НҰҒМАНОВ, Жылыой ауданының әкімі.«БОЛАШАҚ» ҮМІТІМДІ ҮКІЛЕДІ
Еліміз тәуелсіздікке қол жеткізіп, дербес мемлекет атанғанда әлі де оң-солымызды тани қоймаған бала едік. Өсе келе біз үшін ел тәуелсіздігінен қымбат нәрсе болмайтынына көзіміз жете түсті. Тәуелсіздіктің қадірі әсіресе, туған жерден, туған елден жырақта жүргенде арта түседі екен. Олай дейтінім, Атыраудағы Ж. Досмұхамбетов атындағы техникалық лицейде алған білімімді Қазақ-Британ техникалық университетінің халықаралық экономика мектебі факультетінде жалғастырған едім. Бұл факультет Лондондағы экономика мектебімен тығыз байланыс жасайды екен. Шетелдің таңдаулы оқу орындарында білімімді жетілдірсем деуші едім. Кейін бағым жанып, Президенттік «Болашақ» бағдарламасының стипендианты атандым. Сол кезде қалай қуанғанымды білсеңіз ғой. Осы бағдарлама аясында 2009-2010 жылдары Ұлыбританияның Бат қаласындағы университетінің магистратурасын бітірдім. Тұманды Альбион еліндегі екі жылда Қазақстан жайлы, Тұңғыш Президентіміз Нұрсұлтан Назарбаев туралы жақсы пікірлерді көп естідік. Бізбен, қазақстандық студенттермен Қазақстанның экономикасы мен табиғи байлығы, қазақтың тарихы мен салт-дәстүрі жөнінде пікір алысушылар көп болды. Біздің Қазақстанымызға қызығушылық танытқан да көп еді. Шетелде оқыған кезде экономикасы өркендеген жаңа тұрпаттағы тәуелсіз еліміз үшін, әлемдік деңгейдегі саясаткерлігімен, Қазақстанды жаһан жұрты қызығатындай қуатты мемлекетке айналдырған Елбасымыз үшін талай рет марқайғанымыз естен кетпейді. Қазір, елге оралғасын Елбасының идеясымен шетелдік инвесторлардың бірлесуімен құрылған «Теңізшевройлға» жұмысқа орналастым. Мұндағы жұмыс өте жауапты. Сол себептен, қазақ жастарының да бәсекеге қабілетті бола алатынын танытып жүрміз. Тәуелсіз еліміздің дарынды, білімге құштар жастарының шетелдік танымал оқу орындарында білім алуына қолдау білдіретін «Болашақ» бағдарламасының маңызы айрықша. Өйткені, бұл бағдарламаның әлемде теңдесі жоқ. Яғни, Қазақстанның бәсекеге қабілеттігін танытатын білімді жастары «Болашақтан» әлі талай қанат қағады. Осы бағдарлама талай жастың үмітін үкілейді. Мен де осы бағдарламаның түлегі екенімді ұдайы мақтан тұтамын. Дана ХАСАНОВА, «Болашақ» бағдарламасының түлегі. Дайындаған «Егемен Қазақстан» газетінің Атырау облысындағы меншікті тілшісі Жолдасбек ШӨПЕҒҰЛ.