Оңтүстікте шетелдік атақты дәрігерлер шеберлік сыныбын өткізуде
Мемлекеттің қуаты экономикалық-әлеуметтік жағдайлардан бөлек тұрғындарының денсаулығымен өлшенеді. Ең басты байлық – денсаулық.
Халықтың аузынан ақ май ағызып қойсаң да медициналық емдеу жағынан ақсап жатсаң, заманауи қондырғыларға қолың жетпесе, онда ол мемлекеттің жолы оңғарылуы қиын.
Елбасымыз «Жаңа әлемдегі жаңа Қазақстан» атты халыққа Жолдауында еліміздің жаңа кезеңдегі дамуында мемлекеттік саясаттың бағыттарының бірі – медициналық қызмет сапасын жақсарту және денсаулық сақтау саласында жоғары технологиялық жүйені дамыту керектігін қадап айтқан.
Оңтүстік Қазақстан облысында соңғы жылдары денсаулық сақтау саласында айтарлықтай жұмыстар жүргізіліп, нәтижесінде облыстың негізгі демографиялық көрсеткіші жақсарды. Облыста өмір сүрудің орташа жасы 69,8 (республикада бұл көрсеткіш – 68,8) құрады. Тұрғындар өлімінің жалпы көрсеткіші республика бойынша ең төменгі деңгейде. Облыста жыл сайын 75 мыңнан аса бала дүниеге келеді, демек, еліміздің әрбір төртінші тұрғыны Оңтүстіктің үлесінде деген сөз. Тәуелсіздік жылдарында ана өлімі 5 есе азайды, бұл 1991 жылдан бергі көрсеткіш. Бала өлімі 2 есеге жуық төмендеді.
«Саламатты Қазақстан» мемлекеттік бағдарламасындағы басты міндеттердің бірі – облыстың денсаулық сақтау саласында жоғары білікті кадрлар даярлау және денсаулық сақтау саласының бәсекеге қабілетті кадрлар әлеуетін құру болса, бұл Оңтүстік Қазақстан облысында табысты түрде жүзеге асуда.
Облыстық денсаулық сақтау басқармасының бастығы, медицина ғылымдарының докторы, профессор Жұмағали Исмайлов жоғарыдан нұсқау күтпей-ақ облыс медицинасын жақсартудың өзіндік жоспарын жасап, халықаралық стандартқа енген әлемдік орталықтармен тиімді байланыс жүйесін жасады.
Соңғы екі жылда облыста денсаулық сақтау басқармасы мамандарды шетелде тәжірибеден өткізіп, сонымен қатар Литва, Польша, Израиль, Түркия, Ресей, Украинаның белгілі медициналық орталықтарынан атақты ғалымдарды шақырып, оқытуды ұйымдастырды.
Жақында, 24-25 қараша аралығында Шымкентте Оңтүстік Қазақстан облысының денсаулық сақтау басқармасы Литва денсаулық ғылымы университетімен бірлесіп, «Ана мен бала өмірін құтқаратын қол – емдеудің тиімді әдістері және көмек көрсетуге жүйелі көзқарас» деп аталатын І-халықаралық ғылыми-практикалық конференциясын өткізді.
Конференцияның мақсаты мен міндеті бірлесе атқарған жұмыстан қорытынды шығару және Литва денсаулық ғылымы университетімен үш жылдық бірлестіктің механизмдерін жүзеге асыру және жаңа технологияны көрсету болып табылады.
Біз осы конференция аясында Литваның атақты дәрігерлері шеберлік сынып өткізген облыстық клиникалық балалар ауруханасының бас дәрігері, өңір медицинасының оңалуында өзіндік үлесі бар Әнуар Маймақов мырзаны әңгімеге тартқан едік. Биыл “Нұрсәт” шағын ауданындағы жаңа зәулім ғимаратқа көшкен ауруханада Елбасының өзі болып, дәрігерлерге ақ тілеу айтқан болатын. Бас дәрігер осындағы атқарылған жұмыстарды жүлгеледі.
Жаңа аурухана жан-жақты жаңа әдіске бейімделген медициналық кешеннің қызметін атқарады. Ауруханада 15 жасқа дейінгі балаларға тәулік бойы педиатриялық пен хирургиялық мамандандырылған медициналық көмек көрсетіледі, – дейді бас дәрігер.
Мұнда БДҰ-ның талаптарына сай еуропалық стандартқа сәйкес ең теңдессіз диагностикалық визуализациялық кешені магнитті-резонанстық томография, сандық рентгенография, эндовидеохирургия, ультрадыбысты зерттеу және датчикпен, мониторлық жылу жүйесімен жарықтау нәрестелерге арналған инкубаторлармен қамтамасыз етілген.
Соңғы үлгідегі жаңартылған диагностикалық сәулелі, функционалды, эндоскопиялы, биохимиялы, иммунологиялы, аудиометрлі және тағы басқа диагностикалық жабдықтармен жабдықталған. Бұл жүйке жүйесінің және асқазан-ішек туа пайда болған ақаулықтары бар балаларға жоғары дәрежеде медициналық көмек көрсетуге мүмкіншілік береді.
Аурухананың құрамында 1 ауысымда 240 науқас қабылдауға мүмкіндігі бар емхана орналасқан. Мұнда жан-жақты бейінді мамандандырылған медициналық көмек көрсетеді.
Ауруханада Оңтүстік Қазақстан мемлекеттік фармацевтикалық академия және Қ.А.Ясауи атындағы Халықаралық қазақ-түрік университетінің клиникалық базалары орналасқан.
Облыстық балалар ауруханасында 900-ден астам қызметкер бар, оның 146-сы жоғары санаттағы дәрігерлер. Ауруханада тәжірибелі, мамандандырылған кадрлар жұмыс істейді. Соңғы екі жылда аурухананың 30-дан астам дәрігерлері алыс және жақын шетелдердің клиникаларында тәжірибе жинақтап, оқып келді. Облыстық балалар ауруханасында халықаралық жетекші мамандардың қатысуымен 5 шеберлік сынып ұйымдастырылды. Атап айтқанда, Ресей ғылыми-зерттеу университетінің профессоры М.Дегтяреваның, Новосібір мемлекеттік медицина университеті мамандарының қатысуымен дәрістер тыңдалды. 2011 жылғы 17-22 қараша аралығында Литвадан Каунас қаласының медицина университетінің профессоры, Еуропадағы атақты балалар хирургы В. Бараускастың қатысуымен балалар хирургиясы және операциядан кейінгі күтім тақырыбында шеберлік сынып жүргізілді. Бұл іс-шара тікелей облыстық денсаулық сақтау басқармасының бастығы Жұмағали Қазыбайұлы Исмаиловтың қолдауымен ұйымдастырылды. Шеберлік сынып аясында теориялық және практикалық тәжірибелерімен бөлісіп, біздің қызметкерлер білімдерін жоғарылатуда.
Аурухананың жаңа ғимараты іске қосылуы облыстағы балаларға сапалы деңгейде медициналық көмек көрсету және жас нәрестелердің өлім көрсеткішін төмендету үшін үлесін қосады.
2010 жылы облыстық балалар ауруханасы ҚР ДСМ-нің аккредиттеу комиссиясының шешімінің негізінде төрт жылға аккредиттелген деп танылды.
Болашақта балаларға мамандандырылған және жоғары мамандандырылған көмектің әрі қарай дамуы жоспарланып, оның ішінде ең маңыздысы неонаталды хирургияны дамыту белгіленген.
2009 жылдан бастап туа біткен ақаулықтарды жедел емдеудің жаңа әдістері енгізіле бастаған.
Хирургия патологиясы бар жас нәрестелерді алдын-ала дайындау және тексеру алгоритмін енгізу, гидронефроздың түрлі дәрежеде реконструктивті операция жасау қолға алынды.
Хирургияда жаңа технология-диагностикалық эндобейнехирургиялық лапароскопияны қолдануды бастады.
Нейрохирургиялық науқастардың емі және диагностикасы жақсару үшін әр түрлі қысыммен шунттық жүйімен жасалынатын вентрикулоперитонеостомия отасы енгізілді. Ақаудың орнын келтіру үшін бас протокрилоны, сүйек цементі, металлоконструкция, аяқ және иық сүйектерін орнына келтіру үшін Илизаров аппараты, туа пайда болған жамбас сүйектің шығуының емі және функционалдық әдісі, синдактилия тері пластикасы, ойнамалы санға жедел емі қолданылады.
ЛОР жүйелерінің зақымдану диагностикасын анықтауда 2008 жылы операциялық микроскоп және мамандарды оқытудың арқасында хирургиялық әрекет кең көлемінде ұлғайып, алғашқы рет есту қабілетін жақсарту үшін — дабыл жарғағын мерингопластика отасы, антротомия, тимпанопластика қолданылады.
Дүниежүзілік денсаулық сақтау ұйымы мен Біріккен Ұлттар Ұйымының Балалар қоры ұсынған ауруларды емдеуді бірлесіп жүргізу әдістерін енгізу мақсатымен облыстық балалар ауруханасында былтырғы жылдан бері орталық ашылды. Онда облыс көлемінде аталған бағдарламаларды бастапқы медициналық-санитарлық көмек көрсететін медицина қызметкерлерін үйрету жұмыстары жалғасуда. Денсаулық сақтау министрлігінің бұйрығына сәйкес облыстық балалар ауруханасында медицина қызметкерлерін үздіксіз кәсіби дамыту оқу орталығы ашылды. Осы оқу орталығында балаларға жедел медициналық көмек көрсету әдістерін үйретеді.
Тұсаукесер рәсіміне Елбасымыздың өзі қатысып, заманауи медициналық қондырғылардың жұмысымен танысып, ақ желеңді абзал жандардың жұмысына табыс тілеген облыстық балалар ауруханасында осындай толымды жұмыстар атқарылып жатыр.
Бақтияр ТАЙЖАН.
Оңтүстік Қазақстан облысы.