Ақтөбе қаласы – еліміздегі ірі мегаполистердің бірі. Облыс орталығында 400 мыңнан астам халық тұрады. Оған жүздеген мекемелер мен ұйымдарды, кәсіпорындарды қосыңыз. Осыншама тұрғыны бар, өндірісті шаһарды жылумен және ыстық сумен қамтамасыз ету өте күрделі шаруа. Бұл өңірде алты ай қыс болатынын ескерсек, бұл жұмыстың жауаптылығы, сірә арта түсетіні белгілі. Қалалықтардың қыста қысылмауының негізі көп жағдайда жаздағы атқарылған шаруаларға тәуелді екені де рас. Қаланы жылумен және ыстық сумен қамтамасыз ететін «Трансэнерго» акционерлік қоғамының директоры Мәжит БЕКМЕЕВПЕН әңгімеміздің жылу беру маусымына дайындықтан басталуы да сондықтан.
– Қазіргі кезде біздің акционерлік қоғам 207 шақырым магистралды және таратушы желілерін, 22 қазандық, 9 сорғы стансасы, 79 топтық жылу бекеттерін пайдалана отырып, қаланы жылумен және сумен қамтамасыз етуде. Кәсіпорында қалыптасқан жұмыс дағдысы бұл міндетті ойдағыдай орындаудың негізгі алғышарты болып табылады. Желілік аудандардың қалыпты жұмыс істеуін қамтамасыз ету үшін кәсіпорында арнайы электр шаруашылығы, газ қызметі, қазандықтың ішкі газ желілерін күтіп-қарау және жөндеу, жылу желілері және еңбек қорғау және қауіпсіздік техникасы бөлімшелері құрылған. Қазандықтар жабдығын жедел басқару үшін тәулік бойы диспетчерлік қызмет жұмыс істейді.
Биыл жоспарға сәйкес 6,6 шақырым жылу желілері жөнделді. Оның ішінде, бюджет қаражаты есебінен 558,5 млн. теңгеге 2,8 шақырым жылу желілері жаңғыртылды. Тарифтерде көзделген қаражат есебінен 130,1 млн. теңгеге 2,89 шақырым жылу желілері күрделі жөндеуден өткізілді. Бұдан басқа «Трансэнерго» АҚ Ақтөбе қаласын 2010-2012 жылдары жылумен жабдықтау жүйесін дамыту, жаңғырту және жетілдіру бойынша инвестициялық бағдарлама әзірледі. Ол тарифтерде көзделген қаражат есебінен жүзеге асырылады. Осы бағдарлама бойынша 2011 жылы ұзындығы 0,93 шақырым жылу желілері жаңғыртылды. Ағымдағы жөндеу жоспарына сәйкес биыл 200,4 шақырым жылу желілері, жылу камераларында 8197 дана ысырмалар тексерілді, 79 элеватор торабы, 22 қазандық, 9 сорғы стансасы ағымдағы жөндеуден өткізілді. Біз жылу мен ыстық суды тұтынушыларымызға кідіріссіз жеткізіп тұрмыз. Көп жағдайда үйлерінде жылу мен ыстық су болмаса бізді жазғыра бастайды. Ал, мұнда кондоминуимдар мен пәтер иелері кооперативтерінің салақтығы ескеріле бермейді. Мұны ақталу үшін айтып отырғаным жоқ, шындығы да солай.
– Жылу беру маусымына тиянақты әзірленгендеріңіз байқалады. Осы атқарылған жұмыстардың сапасы қандай, алты ай қыс бойы үздіксіз жылу беруге кепілдік бере ме?
– Біздің жұмыста атүстілікке жол беруге болмайды. Бұл кейін үлкен апаттарға соқтырады, басы артық шығынға батырады. Ең бастысы, тұрғындардың біздің қызметімізге деген сеніміне селкеу түсіреді. Мұндай жағдай болмас үшін «Ақтөбе ЖЭО» АҚ-мен бірлесіп тығыздық пен беріктікке жылу желілері гидравликалық сынақтан өткізілді. Гидравликалық сынақ нәтижесінде магистралды және ішкікварталдық жылу желілерінің әлсіз жерлері анықталып, олар уақытылы қалпына келтірілді. «Казахэнергоэкспертиза» АҚ сараптау ұйымы жылумен жабдықтау нысандарының яғни, 22 қазандық, 9 сорғы стансасы, 207 шақырым жылу желілерінің әзірлігіне кешенді тексеру жүргізді, актілер рәсімделіп, сараптама қорытындысы алынды. Қала әкімінің шешімі бойынша шаһарды жылыту маусымы 1 қазаннан басталды. Бүгінгі таңда жұмыс істеп тұрған және резервтегі барлық жабдық қандай да жүктеме көтеруге әзір. Қазандықтардың күзгі-қысқы кезеңде үздіксіз жұмыс істеуі үшін «ҚазТрансГазаймақ» АҚ облыстық филиалымен көлемі 14719,8 мың текше метр газ жеткізуге шарт жасалды. 64 қазанды жуу және сығымдау жұмыстары жүргізілді. Барлық қазандықтарда қазандар жұмысшы, сынама қысыммен гидравликалық сынақтан өткізілді, қазандарда сақтандыру клапандары реттелді. Мамандандырылған ұйым 22 қазандықта түтіндіктерді, желдету арналарын тексерді. Толық көлемде реле қорғанысы және автоматика құрылғыларын, ӨЖА құралдарын, электр стансалары және желілерін техникалық пайдалану ережелеріне сәйкес күтіп-қарау орындалды. Қазандықтарда және сорғы стансаларында электр жабдығының жұмысы сенімді болу үшін сорғылардың электр қозғалтқыштары және электр стансаларының резервтік қозғалтқыштары ағымдағы жөндеуден өткізілді.
– Кездейсоқ болатын оқиғалардың алдын алу үшін қандай сақтандыру шаралары алынды?
– Қалалық сумен жабдықтау жүйесінде болуы мүмкін іркілісте қазандықтарда салқын су қоры жасалды және қажет болған жағдайда әр қазандыққа су жеткізу үшін арнайы автомобильдер бөлінді. Барлық қазандықтар бастапқы өрт сөндіру құралдарымен жарақтандырылып, өрт бекітпелері орнатылды. Қолданыстағы желілердің шегінен шығып тозуына байланысты магистралды жылу желілерінде кірме аралары қайта қосылатын болып қарастырылған. Төтенше жағдайларды жою үшін кәсіпорында желілік аудандар және автокөлік цехы жұмысшы құрамынан тұратын апаттық-техникалық команда құрылды. Апаттық-техникалық команда материалдық-техникалық құралдармен жабдықтау нормаларына сай толықтай жарақтандырылды. Жылумен жабдықтау желілерінде апатты жағдайларда пайдаланылатын құбырлар мен арматураның қажетті қоры жасалды.
– Дебиторлық қарызды азайту мақсатында не істелуде?
– Тұтынушыларды толық қамту үшін қаланың тұрғын аудандары 57 учаскеге бөлінді және әр учаскеге абоненттермен тікелей жұмыс істейтін бақылаушы бекітілді. Әр абонентке көрсетілген қызмет үшін уақтылы шот беріледі. Екі ай абоненттен төлем түспеген жағдайда ескерту жасалады, 10 күннен кейін абоненттің ыстық суы жабылады, 20 күннен кейін қарызды өндіріп алу үшін сотқа материал беріледі. Абоненттермен жұмыс істеуге оңтайлы болу үшін қала бойынша бес есептесу қосыны жұмыс істейді. Оларда абоненттер өздерін толғантқан сұрақтарға жауап алады, салыстырып тексере алады. Есептесу орталықтары банктердің есептесу-кассалық бөлімшелерінде, «Қазпошта» АҚ және «Трансэнерго» АҚ-ның өзінде орналасқан. Барлық банктерге нысандарды аукционнан сатқан кезде коммуналдық қарыздарын ескеру қажеттілігі жөнінде хабарланады.
Бүгінгі таңда алашақты өндіру үшін сотқа 114,891 млн. теңгеге 3706 талап-арыз берілді, соның 70,998 млн. теңге болатын 2231-і қаралды. Кәсіпорында энергияны үнемдеу мәселелеріне баса назар аударылады. Энергия ресурстарын үнемдеу мақсатында және «Табиғи монополиялар және реттелетін нарық туралы» ҚР Заңын орындау үшін «Трансэнерго» АҚ жылу қуатын есепке алу аспаптарымен қамтылған тұтынушылар санын көбейту бойынша ауқымды жұмыс атқарып келеді. Мысалы, акционерлік қоғам 6,0 млн. теңгеге 1200 жеке есептеуіш аспабын орнатуға «Теплоуют» ЖШС-мен шарт жасасты. Бүгінгі таңда жеке есептеуіш аспаптары бар тұтынушылар саны 94 пайызға жетті.
Міне, осындай жоспарлы жұмыстардың қайтарымы да жаман емес. Жылу маусым басталғаннан бергі екі айда кәсіпорын қалыпты жұмыс істеуде. Қалған уақытта да бұл ырғақтың бұзылмайтынына сенім мол.
– Әңгімеңізге рахмет.
Әңгімелескен Сатыбалды СӘУІРБАЙ.
Ақтөбе.