Қазақстан Республикасы Ислам Ынтымақтастығы Ұйымының (ИЫҰ) төрағасы ретінде бірқатар жұмыстар атқаруда. Еліміздің Сыртқы істер министрі Ержан Қазыханов осы ұйымдағы төрағалық шеңберінде Жидда қаласына келіп, ИЫҰ штаб-пәтерінде министрлік деңгейіндегі Атқарушы комитеттің кеңейтілген отырысын өткізді.
Жақсыбай САМРАТ – Жиддадан.
Сауд Арабиясы – батысында Қызыл теңіз, солтүстік-шығысында Парсы шығанағымен шайылатын Араб әлеміндегі жер көлемі жағынан ірі мемлекеттердің бірі. Ол Иордания, Ирак, Кувейт, Катар, БАӘ, Оман және Йемен мемлекеттерімен шектеседі. Бұл елді «Екі мешіттің елі» деп те атайды. Өйткені, мұнда Мекке мен Медине секілді Исламның екі қасиетті қаласы орналасқан. Жыл сайын 4 млн.-ға жуық адам қажылық парызын өтеуге келеді. Сауд Арабиясының атауы басқарушы әулеттің (Саудиттер) есімінен алынған. Қазір әлемде басқарушы әулеттің атауын алған Саудиядан басқа Иордания Хашимиттік корольдігі және Лихтенштейн ғана бар.
Сауд Арабиясының аумағында мұнайдың әлемдегі аса ірі қоры шоғырланған. Соның арқасында Саудия мұнай экспорты бойынша әлемде ең алдыңғы орындардың бірін алады. 2009 жылы мұнай өндіру мен экспорттау бойынша әлемде Ресейден кейінгі екінші орынды иеленді. Мұнай экспорты сыртқа тауар шығару балансында 95 пайыздық үлесті қамтып отыр. Сонымен бірге, ол ел кірісінің 75 пайызын құрайды.
Жидда – Сауд Арабиясының батыс бөлігінде орналасқан аса ірі қаланың бірі. Оның халқы 3,6 млн. адам. Елдің астанасы Эр-Риядтан кейінгі үлкен қала осы. Қызыл теңізге шығатын ең үлкен портты қала да осы. Жыл сайын Мекке мен Мединеге қажылық парызын атқаруға кемемен келетін миллиондаған мұсылман алдымен осы қалаға түседі. Мекке мен Жидданың арасы 75 шақырым. Мұның өзі қала бюджетінің кіріс бөлігін еселеп арттырады. Жидда Алматы қаласымен бауырлас шаһар болып табылады. Екі қаланың арасында тығыз ынтымақтастық орнаған.
Әлемде БҰҰ-дан кейін екінші халықаралық ұйым болып табылатын Ислам Ынтымақтастығы Ұйымының штаб-пәтері осы қалада орналасқан. ИЫҰ мұсылман әлемінің мүддесін халықаралық аренада қорғайтын жалғыз аймақтық ұйым болып табылады. Қазір ол Азия, Африка, Еуропа және Оңтүстік Америка елдерінің 1,6 млрд. халқы бар 57 мемлекетінің басын қосып отыр. Ұйымның өзі 1969 жылы құрылған. Қазір оның түрлі функциялар атқаратын институттарының саны 26-ға жеткен. Құрылған кезінен 2011 жылы Қазақстанда болған Сыртқы істер министрлерінің 38-сессиясына дейін ұйым Ислам Конференциясы Ұйымы деп аталды. Осы сессияда оның атауы Қазақстан Президентінің ұсынысымен Ислам Ынтымақтастығы Ұйымы деген жаңа атау алды.
Бүгінгі күні ИЫҰ қарастыратын негізгі мәселелер қатарында араб-израиль кикілжіңін реттеу, «созылмалы сырқаттардың» емін табу, терроризм мен экстремизмге қарсы күрес, жаппай қырып-жоятын қаруларды таратпау, адам құқын қорғау секілді проблемалар бар. Сондай ақ, Африканың кедей елдеріне экономикалық көмек, олардың орта және шағын бизнестерін қолдау, туризм мен көлік саласын дамытуға жәрдем беру сияқты мәселелер қарастырылады.
Қазақстан төрағалығы шеңберінде 2011 жылғы 17 тамызда Ыстамбұл қаласында Сомали мәселелеріне арналған Атқару комитетінің отырысы болып өтті. Ал 19 қыркүйекте Нью-Йоркте Атқарушы комитет мүшелерінің бейресми кездесуі , ал 22 қыркүйекте осы қалада ИЫҰ – ЕО шеңберінде отырыс болды. 29 қыркүйек пен 1 қазан аралығында Астанада ИЫҰ-ға мүше-мемлекеттер Денсаулық сақтау министрлерінің 3-ші конференциясы өтті.
2011 жылдың 17-20 қазаны аралығында ИЫҰ Экономикалық және сауда жөніндегі Тұрақты комитетінің 27-сессиясы шеңберінде Ыстамбұл қаласында Қазақстанның төрағалығымен Орталық Азиядағы ынтымақтастық жөніндегі Іс-қимыл жоспарын іске асыруды талқылаған 1-ші отырыс болды.
ИЫҰ шеңберінде азық-түлік қауіпсіздігі жүйесін құру жөніндегі Қазақстанның бастамасы табысты іске асуда. Осы орайда Азық-түлік қауіпсіздігі жөніндегі кеңес құру туралы тиісті құжаттарды әзірлеу жұмыстарының сапалы жүргізілгенін атап айтқан абзал.
Қазақстанның ұйым шеңберінде энергетика саласы бойынша инвестициялық және технологиялық ынтымақтастық орнату, Шағын және орта бизнесті дамыту қорын құру, Ислам банкингін дамыту жөніндегі ұсыныстары Ислам Даму банкі тарапынан қолдау тапты. Сонымен бірге, Президент Н.Назарбаевтың қазақстандық төрағалық шеңберінде мұсылман экономикасының он жетекші елінің үнқатысу алаңын құру, ИЫҰ G20 форумына ИЫҰ қатысуы жөніндегі бастамалары іске асырылуда.
Ал алдағы уақытта қазақстандық төрағалық шеңберінде дінбасылардың халықаралық форумы, «Исламның ТМД елдеріндегі рөлі» атты конференция, Ислам Ғылым академиясының отырысы сияқты бірқатар шаралар өтеді. Сонымен бірге, Африка мен Таяу Шығыс елдері мәселелерінің тұрақтануы, Сомалиге гуманитарлық көмек беру секілді мәселелер де назардан тыс қалмайды.
ИЫҰ Атқарушы комитетінің Жиддадағы кеңейтілген отырысы туралы келесі нөмірде хабарлайтын боламыз.