Бөрлінің бүгіні мен ертеңі
Бөрлі – Үкіметтен қаржылай көмек, субвенция алмайтын республикадағы саусақпен санап аларлықтай нәрлендіруші аудандардың бірі. Бұл өңір әр жыл сайын республика бюджетіне үш жүз миллиард теңгеден астам қаражат құяды екен. Әрине, мұндай салық түсімдері мен қаржы ағынын Қарашығанақ кен орнын игерумен байланыстыра қараған орынды. Тәуелсіздік жылдарында өңірдің әлеуметтік-экономикалық тұрғыдан дамуы жаңа сапалық деңгейге аяқ басты. Бөрлі ауданының әкімі Болат ШӘКІМОВПЕН газет тілшісінің әңгімесі осындай өрелі өзгерістер төңірегінде өрбіді.
– Болат Әдиетұлы, Тәуелсіздіктің жиырма жылы Бөрлі өңіріне не берді? Аймақ бұрын қандай еді, бүгін қандай? Ең алдымен осы бір сауал аясында, сонау тоқсаныншы жылдардың бас кезіне ойша бір шолу жасап қайтсақ қайтер еді?
– Иә, тоқсаныншы жылдарға дейін Бөрлі егін егіп, мал өсіріп, өзімен-өзі бұйығы, томаға-тұйықтау жатқан өңір еді. Кейіннен әлем картасында Қарашығанақ кеніші нүктесінің пайда болуына байланысты осы жым-жырт тыныштықтың тас-талқаны шығып, өңір дүр сілкініп сала берді. Қазақстан картасынан Ақсай атты әсем де айшықты кеншілер қаласы ойып тұрып орын алды. Тәуелсіздік таңымен бірге Бөрлі бойына инвесторлар келді. Инвестициялық қаражат бұл өңірдің тамырына қан жүгіртіп, өсіп-өркендеуіне даңғыл жол ашты. Біз бұл жетістіктерді, ең алдымен, Елбасының алысты болжай білетін көреген саясатының нәтижесі деп түсінеміз. Кеніштің игерілу тарихында 1997 жылы шетелдік инвесторлармен қол қойылған өнімді өзара бөлісу жөніндегі келісімнің орны ерекше. Осынау қомақты инвестицияның көмегімен жаңа Қарашығанақ кешені өмірге келді.
Бүгінде Бөрлі ауданының үлесіне тұстастай республикада өндірілетін газ-конденсат шикізатының қырық тоғыз және мұнайдың он сегіз пайызы тиеді. Немесе бұл жылына он бес миллиард текше метр газ және он екі миллион алты жүз мың тонна мұнай шикізаты өндіріледі деген сөз. Салыстырмалы түрде алғанда, бұл Польша, Венгрия секілді шағын мемлекеттер бір жыл бойына тұтынатын жер қойнауы өніміне парапар. Ойымды әрі қарай тарқата түсер болсам, шикі мұнайдың елу пайызы Каспий Тұрба құбыры консорциумы арқылы шетелге асады. Қалған елу пайызы Атырау-Самара газ құбыры бойымен жөнелтіледі. Ал газ іргедегі Орынбор облысындағы газ өңдеу зауытына жіберіледі. Шикізат сонда терең өңделгеннен кейін республика тұрғындарының игілігіне жұмсалады.
Бұдан бірнеше жыл бұрын республика Президенті Нұрсұлтан Назарбаев Ақжайық өңіріне келген сапарында Қарашығанақ-Орал магистральды газ құбыры құрылысын бастап, аяқтау жөнінде жергілікті атқарушы органдарға тапсырма берген еді. Осынау тап-таза әлеуметтік жоба өткен жылы ойдағыдай іске асты. Сол арқылы облыстың Бөрлі, Теректі, Сырым және Қаратөбе аудандарының елді мекендеріне көгілдір отын жеткізудің мүмкіндіктері туды. Келешекте Қарашығанақ газын республиканың оңтүстік және орталық өңірлеріне жеткізу жөніндегі өміршең жобалардың ойластырылып жатқандығы да тек тәуелсіздіктің нәтижесі деп түсінеміз.
– Тәуелсіздіктің алғашқы жылдарында барлық жердегідей Орал өңірінде де жабайы урбанизациялық үрдіс орын алды. Атап айтқанда, Сырым, Қаратөбе және Шыңғырлау аудандары тұрғындарының үлкен легі облыс орталығы мен кеншілер қаласы Ақсай маңына қарай ағылды. Өзіміз куә болғандай, мұнда оларды «нағашылары» күтіп тұрған жоқ еді. Жабайы урбанизация жабайы үй салу дағдысын тудыра бастады. Ол жерлерде инженерлік-коммуникациялық жүйелердің он екіде бір нұсқасы болмайтын. Осындай жөн-жосықсыз, ешқандай архитектура мен қала құрылысының қалыбына сыймайтын ұсқынсыз құрылыстар мекені «Шанхай» деп аталғанын да білетін едік. Сол «Шанхайдың» бүгінгі жай-күйі қандай?
– Дұрыс айтасыз. Осы жылдарда өзіңіз айтқандай стихиялық көріністер орын алғаны шындық. Жан-жақтан ағылып келіп жатқан ағайындарымызға тоқтау салудың ешқандай жоқ екенін де терең түйсінгенбіз. Сөйтіп, жөн-жосықсыз, жаппай жүріп жатқан жерге электр энергиясы мен су, газ құбырларын тарту жобалары белгіленді. Сонымен бірге «Шанхай» көшелеріне қиыршық тас жолдар төсеу жұмыстары қолға алынды. Бүгінгі күн биігінен қарағанда, бұл бағыттағы істер жаңа тұрғындардың көңілінен шыққанын айтудың өзі бір мәртебе. Ақсай қаласы мен оның маңайының бас жоспарына сәйкес, «Шанхайдың» болашағы бұдан да жақсы болмақ. Айталық, Қытайдағы Шанхай қаласы әлемдегі ең мықты дамып келе жатқан қалалардың бірі. «Ондай болмақ қайда деп, айтпа ғылым сүйсеңіз» деп Абай атамыз айтқандай, дәл қытай қаласындай болмағанымен, Бөрлі «Шанхайы» тасада еш қалмақ емес. Оның дамуы әркез назарымызда.
Бүгінде жабайы урбанизация, яғни ағайындарымыздың алдын ала әзірліксіз, жоспарсыз көшуі күрт пышақ кескендей тыйылды. «Арқада жыл жақсы болса, арқар ауып несі бар» деп осындайда айтылса керек. Яғни, бұл көрініс қай жерде болсын ел тұрғындарының өмір сүру деңгейі жақсарып келе жатқандығын аңғартады. «Өтпелі кезең» деп аталатын жаңа нарықтық қарым-қатынастар туғызған күрделі кезең де тарих қойнауына кетіп барады. Бүгінгі ел тұрғындарының еңселері биік, көңілдері көтеріңкі. Өйткені олар тәуелсіздіктің алғашқы нәтижелері мен уыз дәмін тата бастады.
– Қалай ойлайсыз, кешегі өткен бүкіләлемдік қаржылық-экономикалық дағдарысты өңір тұрғындары сезінді ме?
– Қандай қоғамдық құбылыс болсын, оның теріс әсерімен қатар, пайдасы да болмай қалмайды. Әлемдік дағдарыс ауанына да осындай көзқарас тұрғысынан келсек, қазақы ұғымға сайғанда, ол босап кеткен айылдар мен белбеулерді қайта бір қынай тартып алуға септігін тигізді деуге болады. Бұл арада Елбасының ұшқыр ойынан туындап, әлеуметке орасан зор пайдасын тигізген «Жол картасы» бағдарламасының шапағатын қалайша айтпай қала аламыз?! Осы арқылы мәдениет үйлері мен балалар бақшалары, білім беру мен денсаулық сақтау нысандары, басқа да әлеуметтік-тұрмыстық нысандар қайта жаңғырды емес пе?! Әрі осы арқылы республиканың мыңдаған тұрғындары табыс тауып, отбасылық бюджеттерін толықтырғандығын қайда қоямыз. Бір сөзбен айтқанда, бұл дағдарыс тұсында табылған тамаша тактика болғаны анық. Сондай-ақ осы арқылы республикадағы тұралай бастаған бірқатар шағын өндіріс орындары мен фирмалар төрт аяқтарынан тең басып кетті. Өйткені, олар мемлекет тарапынан тиісті тапсырыстар алып, қаржы жағдайларын әжептәуір түзеді.
Тағы бір айтайын дегенім, тәуелсіздік тұсында барлық жердегідей Бөрлі бойында да ипотекалық және арендалық үй құрылыстары кеңінен қанат жайды. Сөйтіп, егеменді ел КСРО өзінің жетпіс жылдан астам тарихында шеше алмаған тұрғын үй құрылысын оңтайлы жолға қойды. Тәуелсіздік жылдарында аудан орталығы Ақсай қаласында ғана емес, сонымен бірге ауылдарда да тұрғын үй құрылысы бұрын болып көрмеген биік деңгейге көтерілді.
– Бөрлі ауданының бүгінгі дамуы мен оның келешектегі өсіп-өркендеу жолына тән басты бағыттар қандай деп есептейсіз?
– Өңірде о бастан ауыл шаруашылығы өндірісін өркендетуге қолайлы факторлар қалыптасқан болатын. Қарашығанақ кенішінде мұнай-газ шикізаты өндірілуіне байланысты осы бір ата кәсібіміз тасада қалып қойғандай немесе екінші-үшінші кезекке ысырылып қалғандай күй кешіп келгеніміз рас. Бүгінде осы екі тізгінді тең ұстауға бағыт ұстап отырмыз. Бұл бағыттағы міндеттерді жақында өткен ауыл шаруашылығы қызметкерлерінің республикалық кеңесінде Мемлекет басшысы Нұрсұлтан Назарбаев белгілеп бергені мәлім. Қазір Бөрлі аймағында күрт қысқарған егіс көлемі де, мал саны да өсіп келеді. Ауыл шаруашылығы өнімдерін өңдеу ісіндегі қолға алынған істер өз алдына бір төбе.
– Әңгімеңізге рахмет.
Әңгімелескен Темір ҚҰСАЙЫН.
Суретте: Бөрлі ауданының әкімі Б.Ә. Шәкімов.
Басты мақсат – сапалы өнім шығару – дейді «НазТур» ЖШС жетекшісі Лесбай Елеусінов
Жұмсақ жиһаз – кез келген үйге немесе кеңсеге көрік беріп тұратын тұрмысқа қажетті мүліктердің бірі. Ақсай қаласындағы аталмыш кәсіпорын сәнді де сапалы жиһаздар шығарумен айналысып келеді. Таяуда біз осы ұжымның басшысы Лесбай ЕЛЕУСІНОВПЕН кездесіп, онымен өз өндірісі жөнінде пікірлескен едік.
![021211-31](http://old.egemen.kz/2011img/021211-31.jpg)
Ол бізді кәсіпорын ауласында жылы шыраймен қарсы алып, өндіріс орнын аралатып таныстырды. Ең алдымен жиһаздарды құрастыру цехына бас сұққанымызда, он шақты жігіт қайнаған жұмыс үстінде екеніне куә болдық. Олардың біреулері жиһаздың қаңқасын құрастырып жатса, келесі тобы оны паралонмен қаптап, сыртқы «киімін» кигізумен айналысуда. Кәсіпорын жанындағы арнайы ашылған салонның бір шетіне жиналған дайын өнім – әртүрлі үлгідегі дивандар мен креслолар көздің жауын алып тұр.
– «Жиһаздың дизайны жасалып, бекітілген соң, сол үлгі бойынша қаңқасын құрайтын ағаштар ұстаханада кесіліп-жонылса, пішу цехында берілген өлшемдерге сәйкес қаптаушы материалдар дайындалып, олар тігін цехында құрастырылады, паралон цехында жиһаздың жұмсақ негізі кесіледі. Дайын болған құрамдас бөліктердің сапасы техникалық бақылау бөлімінің бастығы Н.Кубдановтың қатаң сұрыптауынан өтеді. Сөйтіп, барлық бөлімшелерде өндірілген өнімдер құрастыру цехына келіп тоғысады да, осы жерден әдемі жиһаз болып шығады. Содан соң сәндік және сырлау цехына жол тартқан өнім дүкендерге таратылады», – деді кәсіпорында атқарылатын істің мән-жайын кеңінен түсіндірген Лесбай Жексенұлы.
Дайын жиһаз Ақсай қаласындағы «Әдемі» сауда үйіне, Орал қаласындағы әмбебап дүкеніне сауда-саттыққа шығарылады. Бұдан басқа республиканың Ақтөбе, Қарағанды, Қызылорда, Шымкент, Көкшетау қалаларына да жөнелтіледі. Жиһаз жасауға пайдаланылатын ағаш, мата, паралонды, тіпті жіп, сырма, жапсырма, түйме секілді уақ-түйектің өзі Ресейден сатып алынады екен. – Отандық өндіріске қолдау көрсету мақсатында бастамасында Қазақстанда шығарылатын материалдарды да алып көрдік. Алайда олар Қытайдан әкелінген сапасыз тауар болып шықты. Ал Ресейден алатын тауарларымыз еуропалық стандарттарға сай болып келеді. Басты мақсатымыз – сапалы өнім шығару болғандықтан, Ресеймен іскерлік қарым-қатынастамыз, – дейді өз ісінде өнім сапасына баса мән беретін серіктестік басшысы.
Дегенмен, бәсекелестікке қабілетті елу елдің қатарына енуді межелеп отырған қазақстандық өндірушілер де өнім сапасын арттыруға мойын бұрған сыңайлы. Бұған дәлел – «НазТурға» жеткізілген жиһаздық ағаштың соңғы партиясы Өскеменнен алыныпты. Өзімізде өнім шығарудың жергілікті тұрғындар үшін бір артықшылығы – көңілің қалаған жиһаздың түр-түсіне, дизайны мен үлгісіне өз қалауыңша тапсырыс беруіңе болады. Мұндағы шығарылатын жиһаздың 30-ға тарта үлгісі бар, сондықтан патша көңілді тұтынушының таңдауына мүмкіндік мол.
Әңгіме барысында ерлі-зайыпты Лесбай және Қарлығаш Елеусіновтер өз өндірістерін дамыту ісінде мемлекеттің қолдауын ұдайы сезініп отырғандарын айтып берді. Атап айтқанда, олар республикадағы ағаш өңдеу саласында істейтін өндірісшілерге арналған «Даму-өндіріс» бағдарламасының көп пайдасын көргендерін ризашылық сезіммен жеткізді. Бұдан ұққанымыз, «Самұрық-Қазына» ұлттық әл-ауқат қоры қаржыландыратын бұл несиелік қаражаттар небары сегіз пайыздық өсіммен беріледі екен. Бұл біз үшін өте тиімді. Коммерциялық несие мен өндірістік мақсатқа берілетін несиелерді бір-бірімен теңгеруге болмайды. Осы орайда өндірістің әр саласы бойынша несие берудің нақты тұтқалары белгіленгендігі отандық өндірісті алға дамытудың басты алғышарты болып табылады дейді олар.
Нарық заңдылықтарын жетік меңгерген кәсіпкерге «Осы саланы таңдауыңызға не себеп болды?» деген дәстүрлі сауалды қойған едік. Әу баста кәсіпкерлікті Ресейден жиһаз әкеліп сатудан бастаған Лесбай Жексенұлы өзге жиһаздарға қарағанда, тасымалдау кезінде жұмсақ жиһаздар көбірек бүлінетіндігін айтады. Сондықтан «Даладан тасығанша, неге өзіміз шығармасқа?» деген ойға бекіпті. Сөйтіп, 2004 жылы қала шетінен бой көтерген ғимаратта жаңа нысанның негізі қаланды, қажетті құрал-жабдықтар мен материалдар сатып алып, іске кірісті. Бастапқы кезде, әрине, қиындау болды. Жаңа іс, тәжірибе аз. Дегенмен, «көз қорқақ, қол батыр» емес пе? Өз қызметін 15-20 адаммен бастаған кәсіпорындағы жұмыс орны бүгінгі таңда 140-қа жетті. Жалақы уақытында беріледі, қызметкерлердің тұрмыстық жағдайларын шешу барысында серіктестік басшысы үнемі қолдау көрсетіп отырады. Жұмысқа деген ынталарын арттыру үшін олардың кәсіби санаттарын көтеріп отыру енгізілген, соған орай жалақыға да үстеме қосылып отырады. Кәсіпорында өздеріне тапсырылған жұмыстарын жауапкершілікпен атқарып жүрген жиһаз жасаушылар Өтеғалиев Тимур, Төлемісов Хайдар, Есмағұлов Тілектес, Жұмабаев Мұрат, балташылар Салекешов Нұрболат, Қазекенов Кенже, Тастеміров Ғизат, тігіншілер Иманғазиева Толқын, Нұрабалина Қамария, Құсанова Айгүл, Барсаева Айгүлдердің есімдерін атап өткен абзал. Осындай жандардың арқасында ұжымның өнімі 2005 жылы республикалық көрмеде ІІ орын алып, «Сәтті дебют», «Жоғары сапа» аталымдары бойынша марапатталса, бұдан кейінгі жылдары бірнеше дүркін осы көрменің бас жүлдесін жеңіп алды. Сөйтіп, бөрлілік өндірісшілер қазақстандық жұмсақ жиһаз жасаушылардың алдыңғы қатарынан көрініп келеді.
Жылдан-жылға қанат жайып, өркендеп келе жатқан «НазТур» ЖШС-нің болашақта жүзеге асыруды жоспарлап отырған орамды ойлары баршылық. Табысқа апарар жолын анықтап, дұрыс бағытты таңдай білген ұжымның әлі талай асуларды бағындырары анық.
Айгүл АХМЕТОВА, Бөрлі аудандық «Бөрлі жаршысы» газеті редакторының орынбасары.
Суретте: «НазТур» ЖШС директоры Л.Елеусінов.
Шағаладай жаңа ауыл – тұрмысы төмен отбасылар үшін
![021211-33](http://old.egemen.kz/2011img/021211-33.jpg)
Орал өңірінде от ауызды, орақ тілді, тіліп тұрып айтатын, кесіп тұрып айтатын Нығмет Нағымов есімді айтыскер ақын болған еді. Өмірден ертерек кетіп қалды. Сол Нәкең сонау жетпісінші жылдардағы айтыстарының бірінде өз қарсыласына: «Тереңкөлдің үйлері шағаладай, Ешкім де кете алмайды бағаламай», – деп төгілдіре жырлағаны бар. Ол кісінің Тереңкөл деп отырғаны, сол кезде жаңадан құрылған шаруашылықтың жаңадан бой көтерген орталығы болатын. Бөрлі ауданының Бөрлі ауылында сап түзеген сәнді де сапалы жаңа үйлер мен көшелерді көргенде, Нығмет ағамыздың осы бір өлең жолдары ойымызға оралып еді.
Коттедж үлгісінде бой көтерген бұл үйлер өз қоныстанушыларын қарсы алуға әзір. Ақсай- Орал тас жолының бойында орналасқан бұл үйлер кез келген жолаушының көз құртына айналды десе де болады. Жалпы саны алпыс үйдің әрқайсысының жалпы көлемі 71 шаршы метрді құрайды. Жаңа қоныс төрт бөлмеден тұрады.
– Осынау айырықша да ерекше құрылысқа қазіргі заманғы жаңа технология мен құрал-жабдықтар пайдаланылды. «НазТур» ЖШС тұрғызған бұл баспаналар тұруға ыңғайлы, сапалы әрі мықты болуымен ерекшеленеді. «Жұмыспен қамту – 2020» мемлекеттік бағдарламасы аясында тұрғызылған арнайы құрылысқа республикалық бюджеттен 294 миллион теңге бөлінді. Бүгінгі күні бұл қомақты қаражат толықтай игерілді, – деді бізге Бөрлі ауданы әкімінің орынбасары Талғат Сидық.
Аталған бағдарлама республиканың 2020 жылға дейінгі Стратегиялық даму жоспарына сай қабылданғанын айта кеткен жөн. Сонымен бірге, бұл іс үдемелі индустриялық-инновациялық даму бағдарламасымен де өзара үндестік таба алады. Тарқата айтар болсақ, жоғарыда аталған бағдарламалық құжаттарға сәйкес, табысы төмен, жұмыссыз жүрген тұрғындарды оқытып, жаңа кәсіпке бейімдеу, жұмысқа орналастыру істері де өзек болған екен. Осындай міндеттер тізбегіне ауылдық жерде кәсіпкерлікті өрістету, еңбек ресурстарын топтастыру сияқты кешенді шаралар да кіреді. Бұл бағыттар 2011 жылы қанатқақты жоба ретінде белгіленген. Ал алдағы жылдан бастап аталған жобалар толықтай жүзеге асырылмақ. Бұл мәселе жөнінде бізге Бөрлі аудандық жұмыспен қамту орталығының директоры Бауыржан Балмолдин айтып берді.
Бөрлі ауданының Бөрлі ауылындағы жаңа алпыс үй жоғарыда көрсетілген бағыттар мен міндеттерді іске асыру мақсатында тұрғызылған. Бұған облыс аудандарындағы болашағы жоқ, құрып бара жатқан елді мекендердің тұрғындары қоныстанады деп күтілуде. Әрине, бұл іс белгіленген нормативтер мен тиісті тәртіп бойынша жүргізілмек. Сонымен қатар, жоғарыда айтылғандай, жаңа тұрғын үй иелерін еңбекпен қамту, жаңа мамандыққа бейімдеу шаралары қоса атқарылмақ.
Бұл іс Тәуелсіздіктің жиырма жылдық мерекесі қарсаңында елдің тұрмысы төмен тұрғындары үшін жасалған баға жетпес, үлкен қамқорлық екені белгілі.
Суретте: Бөрлі ауылында бой көтерген 60 үйдің сыртқы көрінісі.
Светлана
Бөрлі ауданындағы «Нұр» шаруа қожалығының жетекшісі С.Маутеева ер-азаматтар көтере алмайтын ауыр жүкті нәзік иығымен арқалап жүрген арулардың бірі. Қазақ аруларына тән ибамен сәл ғана жымиып, нұрлы жүзіне қызыл шырай жүгіріп, күміс күлкінің шуағы шашылып тұратын нәзік жанды, ұяң да сұлу келіншекті бір көргенде, бизнес тізгінін ұстап, үлкен шаруашылықтың ісін дөңгелентіп отырған жан деп ойлай қоймайтыныңыз анық.
Светлана Бұрханқызы өз ісіне мығым болғанмен, сөзге сараң боп шықты. Сары майдан қыл суырғандай суыртпақтап сыр тартқанда, көңілге түйген кейбір жайттар төмендегідей.
«Кәсіпкерлікпен айналысам» деген ой кез келген қазақ әйелі сияқты, балаларын бағып, отағасының бабын тауып, үй шаруасында жүрген Светлананың басына кіріп те шықпаған еді. Тоқсаныншы жылдардың аяғында жұбайы «Омаров Е» жауапкершілігі шектеулі серіктестігінің іргесін қалап, нарықтық қатынастарға алғаш қадам басқанда, оны қолынан келгенінше қолдаған Светлана есеп-қисап жұмыстарын жүргізеді. Кейін отбасына тіреу болған азаматы өмірден өткенде, ашық күнде жай түскендей болды. Қайғы-қасіреттен бас көтере алмай қалды. Алайда қазадан кейін есін жиып, айналасына көз салғанда, марқұм ерінің ісін жалғастыру қажеттігін түсінді және оны жұбайының рухының алдындағы парызы деп есептеді.
Табиғатынан білмекке құмар, қайсар жан шаруашылық тізгінін өз қолына алды. Ұжымдағы қызметкерлеріне сенім арта отырып, өзінен де, өзгеден де жоғары жауапкершілікті талап ететін Светлана Бұрханқызының ұйымдастырушылық қабілеті осы жерде анық байқалды.
Бүгінде өз атауын «Нұр» шаруа қожалығы деп өзгертіп, 300-ге тарта адамды жұмыспен қамтып отырған кәсіпорын құлашын кеңге жайып, Орал өңірінде кондитерлік өнім өндіруден алдына жан салмай келеді. «Нұрдың» балбармақ мамандарының қолынан шыққан дәмі тіл үйіретін тәтті тоқаштар мен бөлкелер, бәліштер мен торттар халық сеніміне ие болғаны қашан?! Бұл өнімдер сатылатын дүкендерге бас сұққан адам оның тұрақты тұтынушысына айналады. Мұнда өндірілетін 100-ден аса өнім түрлері Ақсай қаласында «Ассорти», «Гүлжауар», «Зеленый», «Наурыз», «Салтанат» дүкендері арқылы халыққа ұсынылады. Дәл осындай кондитерлік цех пен екі дүкеннен тұратын сауда желісінің жұмысы Орал қаласында да жолға қойған.
Сондай-ақ, бірнеше жылдан бері «Ақсай» дәмханасы қала тұрғындарына қызмет етіп келеді. Әр отбасының өмірінде болатын той-томалақтары мен жаназа-садақаларын өткізуге қамданған ақсайлықтар негізінен осы дәмхананы таңдайды. Өйткені, бұл жердің тағамы дәмді, қызмет көрсету деңгейі жоғары, бағасы да аса қымбат емес. Айнадай жарқыраған ғимараттың ішкі безендірілуі де көңілден шығады. «Біздің міндетіміз – халыққа қуаныш сыйлау. Сондықтан олардың сұранысын қанағаттандырып, талапқа сай қызмет етуге тырысамыз. Мүмкіндігімізге қарай өз қалауымызша интерьерді өзгертіп отырамыз. Ең бастысы, сапа жағына көп көңіл бөлеміз. Сондықтан да дәмхананың ас мәзіріне пайдаланылатын азық-түліктің экологиялық жағынан таза болуы үшін кейінгі жылдары ептеп ауыл шаруашылығымен айналыса бастадық. Сөйтіп, дастарқанға қойылатын қазы-қарта, ет-сүт тағамдарын, астық өнімдерін, көкөністерді өз шаруа қожалығымыздан аламыз», – дейді кәсіпкер ару. Өйткені, С.Маутеева астық өндірумен, асыл тұқымды мал басын көбейтумен, көкөніс дақылдарын өсірумен де шұғылданады.
Өндіріс иесінің тағы бір айта кететін әлеуметтік жобасы – қаладағы «Ардагер» дүкені. «Аға ұрпақты сыйлау – қастерлі парызымыз» деп есептейтін жүрегі жұмсақ, жаны нәзік Светлана Бұрханқызы дағдарыс кезеңінде қарияларымызды қолдау мақсатында әлеуметтік дүкен ашу туралы аудан әкімінің ұсынысын облыс бойынша алғашқылардың бірі болып қолдаған еді. Мұнда ардагерлер мен зейнеткерлерге күнделікті тұрмысқа қажетті бірінші кезектегі азық-түлік түрлерін арзан бағамен сатылады. Жалпы, С.Маутеева қайырымдылық жасамайтын сала кемде-кем. Тұрмысы төмен отбасылар мен мұқтаж жандарды айтпағанның өзінде, аудандағы мұсылмандар мешітіне, мәдени, спорттық шаралардың өткізілуіне, білім ошақтарына әркез демеушілік жасап отырады.
Өмір бір орында тұрмайды. Әсіресе, бәсекелестікке бағыт алған бизнес әлемі күн санап өзгеріс үстінде. Жаңалыққа жаны құмар басшы соның бәрін қалт жібермей бақылап отырады және қоғамдық тамақтандыру саласындағы жылт еткен жаңалықты, өзгерістерді өндіріске енгізуге тырысады. Осы мақсатта еліміздегі, Ресейдегі, шетелдердегі ірі комбинаттарда болып, олардың іс-тәжірибесімен танысып қайтты. Мамандарын да әртүрлі курстарға жіберіп, оқытып алды. Швециядан жаңа үлгідегі екі пеш сатып әкелді. Германиядан әкелген жабдықтардың көмегімен неміс технологиясы бойынша дәмі бал татыған торттар шығара бастады.
«Жүйріктен жүйрік озар жарысқанда» дегендей, 2004 жылдан бастап «Нұрдың» аспаздары әртүрлі деңгейдегі байқауларға қатысып, бақ сынап келеді. Кәсіпорын басшысы кеңсесінің қабырғаларына ілінген аудандық, облыстық, республикалық, әлемдік деңгейдегі әртүрлі алғыс хаттар мен грамоталар, дипломдар мен кубоктар Светлана ханым басқарып отырған ұжымның жарқын жетістіктерінің куәсі. Сонымен бірге, Светлана Бұрханқызы – өңір және ел деңгейінде өткізілген «Жыл адам», «Жер иесі» аталымдарының да иегері.
Күнделікті қым-қуыт тірліктің қазанында қайнап жүрген кәсіпкердің әр сағаты мен әр минөті есептеулі. Оның күн сайынғы ісі апта бұрын белгіленіп қойылады. Әйтсе де ол өз перзенттеріне аналық жүрегінің шуағын түсіруге әркез уақыт таба біледі. Ұлы Рахат жоғары оқу орнын аяқтап, қазір екінші мамандық алуда. Ал АҚШ-тағы беделді университеттердің бірінде білім алып жатқан қызы Рабиға үздік оқуымен қуантып келеді. Ол анасының бойындағы еңбекқорлық пен табандылық секілді тамаша қасиеттерді бойына сіңірген. Тәрбиелі бойжеткен шетелде тек оқумен шектелмей, мамандығы бойынша қызмет атқарады. «Ана көрген тон пішер» деген осы да.
Малика БЕЙБІТҚЫЗЫ.
Суретте: «Нұр» шаруа қожалығының жетекшісі С.Маутеева.
Беттің материалдарын ұйымдастырған «Егемен Қазақстан» газетінің Батыс Қазақстан облысы бойынша меншікті тілшісі Темір ҚҰСАЙЫН. Суреттерді түсірген Станислав ЛАРИН.