«Елін шын сүйетін жандар қашанда ерен істерді атқаруға қабілетті болады».
Нұрсұлтан НАЗАРБАЕВ.
Тәуелсіздік сыйы
Тәуелсіздік жылдарында еліміз әр түрлі салаларда және ең алдымен, білім саласында таңқаларлық жетістіктерге жетті. 1993 жылдан бастаған «Болашақ» бағдарламасына биыл, міне, 18 жыл толып отыр. Иә, аз уақыт емес. Еліміз тәуелсіздігін жаңадан алып, барлық заңдық нормаларымыз өзгеріп жатқан кезде шекара асып, шетке білім іздеп кеткен жастарымыз өздерінің мойындарына жүктелген міндетті орындап шықты деуге болады. Бағдарлама алғашқы жылдары елге қажет болған құқықтық саладағы мамандарды даярлады. Сол бір кезеңде мемлекетіміз үшін, алдымен заңнамалық құжаттарымызды жасау мен ел экономикасын көтеру мақсаты тұрды. Осыған орай, экономика мен қаржы саласындағы мамандар даярланды. Бұл алғашқы жіберілген түлектер. Кейіннен индустриалды дамуды қолға алдық. Елімізде инженерлік мамандықтар тапшылығы білінді. Осы салада әлемнің ең озық оқу орындарында студенттер даярлау қажет болды. Міне, екінші кезеңде «Болашақ» стипендиясы арқылы инженер-технолог мамандар даярланды.
1994 жылдан бері 7914 стипендиат 33 елде білім алса, бүгінгі таңда 25 елде 2045 стипендиат және 16 елде 49 стипендиат ғылыми тағылымдамадан өтуде. Ал қазіргі таңда бағдарлама бойынша оқуларын тәмамдаған түлектер саны 3316 адам болып отыр.
Білім беру саласы – ел дамуының негізгі тірегі болғандықтан, қай мемлекетте болсын түйінді мәселенің бірі. Елдегі білім беру жүйесінің бәсекеге қабілеттілігі қандай болса, сол мемлекеттің экономикасының деңгейі де сондай болмақ. Біздің ел де сол сүрлеумен келеді. Оның дәлелі осы «Болашақ» бағдарламасы деп айтуға болады.
Бұл бағдарлама бойынша оқитын студенттердің оқу қаражаттары, шәкіртақылары мемлекет қазынасынан төленеді. Мемлекет бір стипендиаттың білім алуына жылына он мың доллардан аса қаражат жұмсайды. Тіпті, әлемді дүр сілкіндірген дағдарыс кезінде де біздің студенттер қаржылық жағынан еш тапшылық көрмеді. Жасыратыны жоқ, қомақты қаржымен оқитын студенттерге қойылатын талаптар да баршылық. Келісім-шарт бойынша, «Болашақтың» түлектері елге қайтып оралып, кем дегенде бес жыл мемлекеттік қызметте жұмыс істеуі тиіс. Ол әрине, тәуелсіз еліміздің өз ұландарына жасаған үлкен жақсылығы мен қамқорлығын түсініп, ел алдындағы борыштарын өтеу деген сөз.
Бүгінде Елбасының сарабдал саясатының арқасында «Болашақ» бағдарламасы арқылы шет елдің озық университтеріне жіберу жүйесі құрылған. Сөзсіз, бұл ауқымды шара өз жемісін беруде.
Балабақша мәселесі республика көлемінде кешенді түрде шешілуді қажет ететін өзекті мәселенің біріне айналған еді. Күні кеше мектепке дейінгі бала тәрбиесімен қамту 35 пайызды ғана құраса, ал оны 100 пайызға жеткізу – «Балапан» бағдарламасы арқылы ғана жүзеге асырылатыны сөзсіз.
Халық: «Бала тәрбиесі – бесіктен» деп бекер айтпаған. Ата-бабаларымыз шыр етіп сәби дүниеге келген күннен бастап, оның тәрбиесі мен мінез-құлқының дұрыс қалыптасуына айрықша мән бергені белгілі. Бұл мәселе қазіргі заманда да маңызын жойған жоқ. Біз мектеп табалдырығын аттаған бүлдіршіндердің әріп танымаса да, ойы жан-жақты жетілгенін қалайтындығымыз рас. Яғни, «Балапан» бағдарламасы арқылы алғыр, білімге құштар бала тәрбиелеп шығару мақсаты тұр.
«Назарбаев интеллектуалды мектебі» уақыт талабына сай, жас жеткіншектер арасындағы ең талантты, математикаға ерекше қабілетті балаларды даярлап отырған жөні бөлек мектеп болып табылады. Интеллектуалды мектептерде жастар орта білім негіздерімен қатар, тереңдетілген физика-математика, химия-биология пәндері бойынша жүйелі ғылыми бағытта білім алады. Жалпы, бұл мектеп оқушыларының тек қана орта білім алып қана қоймай, ғылыми еңбекпен айналысуына да мүмкіндіктері мол. Міне, осыдан кейін, жоғары оқу орнына келген студент қай бағытта, қандай ғылыммен айналысатынын нақты біліп және соған даяр келеді.
1996 жылы «зияткер ұлт» идеясы аясында жас дарын иелеріне арналған мектеп желісі, «Дарын» бағдарламасы құрылды. Бүгінгі таңда бұл мектептер мыңдаған оқушылар арасынан оза шапқан дарын иелерін анықтаудағы ең тиімді жүйе болып отыр. «Дарын» бағдарламасы арқылы көптеген қазақстандық оқушылар халықаралық олимпиадаларда көк туымызды желбіретіп, жүлдемен оралып жүр. Ал ендігі кезекте Қазақ елі үшін, толыққанды мектептің ең жаңа жүйесі бойынша білім алған жастарды оқытатын әлемдік деңгейдегі жоғары оқу орны ауадай қажет еді.
Жалпы, жоғары оқу орындарының сапасы жөнінде сөз қозғағанда, елімізде аса беделді, жан-жақты, ғылыми орталықтары бар, бір сөзбен айтқанда, шет мемлекеттерден іздейтін білім негіздерінің барлығын алуға мүмкіндік жасалған жоғары оқу орнын жасамай тұрып, сапаны арттыра алмайтынымыз шындық. Ал Назарбаев университеті дәл осы аса маңызды міндетті арқалаған білім ордасы болып табылады.
Алғашқы студенттерін қабылдап, әлемнің үздік университтерінің профессорлық құрамын жинап үлгерген бұл университет түлектері еліміздің ең білімді жастары болары сөзсіз. Осыған орай, биылдан бастап «Болашақ» бағдарламасы шет елдерге «бакалавриат» бойынша студенттер жіберуді тоқтатты. Себебі, айдан анық. Елімізде әлемдік деңгейдегі университет бой көтеріп жатса, оқимын, білемін деген жандарды шекара асырудың еш қажеттігі болмай қалды.
Ендігі кезекте «Болашақ» бағдарламасы арқылы магистратура, докторантура «phd» мамандарын даярлау, жекелеген мамандар арқылы ғылыми жұмыстар мен тәжірибелер алмасу, ғылыми тағылымдамалар саласында қарым-қатынас орнату жоспарланып отыр.
Назарбаев университетінің ашылу салтанатында Президент Н.Назарбаев “Болашақ” халықаралық бағдарламасының жақсы жұмыс істеп жатқанын, талапкерлер төрткүл дүниедегі белді де беделді оқу орындарын бітіріп, еліміздің дамуына өз үлестерін қосып жүргенін, ендігі жерде мұндай үрдіс өз мемлекетімізде де орнығатынын, түлектер Отанымыздың өркендеуіне атсалысатынына сенім білдіретіндігін қадап айтқан болатын.
Жоғарыда атап өткен, «Балапан» бағдарламасы, «Дарын» бағдарламасы, «Назарбаев интеллектуалды мектептері», «Назарбаев Университеті» – қазақстандық жастарға озық үлгідегі, терең ғылыми негіздегі білім берудің жүйелі түрде жасалынған үлгісі. Білімнің терең нәрімен сусындаған жастар кәсіби біліктілігін арттыруға немесе арнайы бір сала бойынша ғылыммен айналысу үшін «Болашақ» бағдарламасы арқылы шет елге, яғни сол ғылымның ең жақсы дамыған, ауқымды ғылыми- зерттеу орталығы бар университетке жол тартады.
Біз әлемде жалпы білімнен он төртінші орындамыз. Ал төртінші сыныпқа дейінгі аралықта төртінші орында екеніміз белгілі.
18 жылдың ішінде 7,5 мыңнан аса студент даярланды. Жалпы білімге, дамуға құйылған қаржы еш уақытта қысқа мерзімде нәтижесін бермейді. Болашақ түлегі ең алдымен, сырттан алған озық білімінің негізінде елдегі белгілі бір қызметтерге араласа отырып, әбден пісіп-жетілген соң ғана өз нәтижесін көрсете бастайды.
Екіншіден, біз көп ескере бермейтін дүние – «болашақтықтардың» алып келген әлеуметтік капиталы. Айталық, біздің студенттер шет мемлекеттердің ең озық университеттерінде білім алып жатыр делік. Ал, онда кімдер оқып жүр деген сұрақтың қойылуы заңды. Әлемдік элиталардың балалары, ең білімді жастар оқиды. «Гарвард» университетін алайық. Бұл оқу орны – дүние жүзіндегі игі жақсылар мен жайсаңдардың үмітін арқалап келген студенттер оқитын жер. Яғни, әлем элиталарының ізбасарларымен біздің студенттер парталас болады деген сөз.
Ендеше, сол бірге оқыған, жан-жақтан келген студенттердің әрқайсысы ертең өз елінде белгілі бір белестерге көтеріле бастайды. Енді ойлаңызшы, кез келген үлкен бір мәселені шешу үстінде әлгі бірге оқыған екі адамның бір-біріне деген көзқарасы қандай болмақ? Міне, бұл да алдағы күндерге үміт шоғын үрлей үңілуімізге мүмкіндік береді.
Тәуелсіздіктің бастапқы жылдарында-ақ, «зияткер ұлт» идеясының алғашқы қадамдары жасалына бастады.
Сонау 1993 жылдары, еліміз үшін ауыр бір кезеңде, Елбасының тікелей басшылығымен қолға алынған «Болашақ» бағдарламасына көпшіліктің сенімі аз болғандығы рас. Алайда уақыт көрсетіп отырғандай, жасалынған жұмыстардың барлығы ұлт болашағы үшін теңдесі жоқ істер еді.
Жалпы әлем бойынша дәл осы «Болашақ» сияқты бағдарламалар тым аз, кейбір мемлекеттерде ғана мұндай жобаларды кездестіруімізге болады.
Ұлыбритания елінде «мемлекеттік шәкіртақы» арқылы жылына әр елден 5-10 студентті жинап алып, Ұлыбританиядағы бір университетте оқытады.
1,5 миллиард халқы бар, Қытайға келетін болсақ, жылына бірнеше мың адамды әлемнің ең ірі оқу орындарына ғана жібереді. Көбінесе, мемлекеттік қызметкерлерді қысқа мерзімді, 2 айлық, 4-6 айлық, әрі кетсе 1 жылдық курстарға жібереді.
Ресей енді ғана қолға алып жатыр. Сол сияқты басқа да елдерде аз студенттерді оқытумен айналысатын ұйымдар бар.
Ал, біздің еліміз жыл сайын 3 мың студентті 87 мамандық бойынша 32 елдің айтулы білім ордаларында білім алуларына мүмкіндік туғызып келеді.
Тәуелсіздік біз үшін, қазақтың әрбір азаматы үшін, көк тудың желбірегенін көріп, кең тыныстайтын, шетел асып, білім алатын барлық жастар үшін тым қымбат. Қыран бүркіт асқар таудың шыңынан кең далаға қарай қанат қағып, қалықтап ұшқанда өзін қалай еркін сезінсе, бүгінгі егеменді елдің жастары да өздерін сондай еркін, асқақ сезінеді.
Қалай дегенмен де, 20 жылдық тәуелсіздік тарихында көптеген игі істер жасалынуымен, тарихи маңызды науқандарды атқаруымен әлем алдында өзінің шынайы бейнесін қалыптастырып үлгерді.
Бүгінгі Қазақстанда қарқынды дамушы, экономикасы тұрақты, саясаты салиқалы, іргесі берік егеменді ел деп біледі өзгелер.
Ал, осы жылдар ішінде «зияткер ұлт» идеясын қалыптастыру мен дамыту жолында үлкен істер атқарылғанына жұрт куә. Енді сол игілікті істердің жемісін көрер сәттер де алыс емес...
Саясат НҰРБЕК, «Халықаралық бағдарламалар орталығы» АҚ президенті.
Алаулаған жас жігер
Қазақ елі Егемен ел атанып, Тәуелсіздігін алған тұста қазақ халқының бойын шаттық билеп, қуанышы қойнына сыймады.
Сол Тәуелсіздік алған тұста дүниеге келген нәресте бүгін 20 жасқа толған азамат атанды. «Нұр Отан» Халықтық демократиялық партиясы мен «Жас Отан» Жастар қанаты және «Қазақстан жастар Конгресі» осы Тәуелсіздікпен қатар дүниеге келген «Тәуелсіздік құрдастарын» назардан тыс қалдырмай, не бәрі 20 жаста болса да Елбасына көмекші болып, ел үшін қосқан еңбектерін елеуде. Мәселен, елдің қауіпсіздігін ойлаған, ІІІ дәрежелі «Айбын» орденімен марапатталған Ербол Отарбаевты, спорт саласынан конькимен сырғанаушы Екатерина Айдованы, білім, ғылым бойынша физикадан бірнеше дүркін халықаралық олимпиадалардан жеңімпаз атанған Ли Вячеслав пен ауылды гүлдендіріп, жас та болса егін шаруашылығының білгір маманы Мәди Жұмабеков сынды Тәуелсіздік құрдастарын мақтанышпен айтамыз. Сондай-ақ, бірер күн бұрын ғана қазақ халқының төбесін көкке жеткізіп, Тәуелсіздіктің 20 жылдығына ерекше сыйлық жасаған Илья Ильиндей ерлеріміздің еңбектерін атамай кету мүмкін емес. «Жақсының жақсылығын айт, нұры тасысын» деген. Сайып келгенде, бұл жетістіктердің барлығы жастарына қолдау көрсетіп, жағдайын жасап отырған нар тұлғамыз Ұлт көшбасшысының еңбегі.
егемен елде ержеттік
Нұрлан ӨТЕШЕВ, «Нұр Отан» ХДП «Жас Отан» ЖҚ атқарушы хатшысы.
Егемен елде ержеттік
Тәуелсіздік – қасиетті ұғым. Тек қазақтарға ғана емес, қазақ жерін мекендеген, онда кіндік қаны тамып, бірге қайнап бітіскен, туған топырағым деп қасиеттеген басқа ұлттар мен ұлыстардың да ортақ игілігі.
Ұлтымыздың Ұлық мерекесі – Тәуелсіздігімізге 20 жыл толды. Еліміз Тәуелсіздік туын көтерген тұста, Тәуелсіздік таңымен таласып жарық дүние есігін ашқан сәби, жиырмаға келді. Бұл – ержеткендігіміз.
Бүгінде Қазақстан озық ел, озат мемлекет атанып, әлем картасына өзінің мәңгілік белгісін, Тәуелсіздік таңбасын салды. Жұмыр жердің иен бөлігін иемденіп, жер көлемі жағынан дүние жүзі бойынша тоғыздыққа табан тіреген Қазақстан Тәуелсіз Қазақстан Республикасы деген мәртебелі атақты бұдан аттай 20 жыл бұрын күллі адамзаттың санасына құйды.
Жиырма жыл ішінде Тәуелсіз Қазақстанда не тындырылды деген сұраққа әркім әр түрлі жауап беруі мүмкін. Бірақ бір ақиқаттың беті ашық, Тәуелсіз Қазақстан төрткүл дүние түгел мойындаған, беделді мемлекетке айналды.
Бүгінгі гүлденген Қазақстанның жеткен биігі – Елбасы Н.Ә.Назарбаевтың ерен еңбегінің жемісі. Аға буын өкілдерінің қажырлы қайраттарының, төккен маңдай терлерінің нәтижесі.
Ендеше ұлы көшті әрі қарай жалғастырушы ұрпақ ретінде кезек жастарға келді. Жас ұрпақ тәуелсіздіктің тағылымдарын танып, қастерлеп, құрметтеп отыруымыз керек. Тәуелсіздік бізге бәрінен де қымбат. Сондықтан да бәріміз еліміз үшін еңбектенеміз, Отанымыз үшін қызмет етеміз.
Шахмардан Байманов, «Қазақстан жастар Конгресінің» атқарушы директоры.
Оқу мен өндіріс – егіз
Бүгінде Мемлекет басшысы Нұрсұлтан Назарбаевтың тікелей қолдауымен құрылған «Болашақ» бағдарламасы үлкен қолдауға ие. Оның аясында жастарымыз шетелдің алдыңғы қатарлы университеттерінде білім алып, сапалы оқумен қатар ой-өрісі жаңаша қалыптасқан үлкен лекті құрап отыр. Қазақстанның өркениетті мемлекеттермен теңесуге ұмтыла отырып озық технологиялар үрдісін жедел игеріп жатқанын ескерсек, мұндай білімді жастарға деген сұраныстың арта түсері сөзсіз.
Әрине, бүгінгідей ақпараттар тасқыны, заманауи технологияларды игеру тек біліммен шектелуі жеткіліксіз. Өскелең өмір талабы білім мен өндірістік тәжірибені қатар ұштастырып, жан-жақты мамандық иесі болуды талап етері анық. Мемлекет әрбір жасқа осындай мүмкіндік тудырып, жан-жақты қолдау жасап келеді.
Болашақтықтардың ертеңгі болашағы тіпті жарқын, кемел. Бүгін шетелдерде халықаралық стандарттарға сай білім алып, ақыл-ой көкжиектерін кеңейтіп жатқан жастарымыз ертең еліміздің игілігі үшін қызмет етеріне ешқандай күмән жоқ. Сондықтан да әрбір білімді маманның басты мақсаты – Қазақстанның экономикасын гүлдендіруге жеке үлес қосумен ғана шектелмей, сонымен қатар, мемлекеттік басқару құрылымдарында, салт-дәстүрлерімізді, мәдениетімізді, тілімізді дамыту бағытында қазақстандық патриотизм үлгісін таныта білгендері жөн.
Бауыржан БАЙБЕК, «Болашақ» халықаралық стипендия иегерлері ассоциациясы кеңесінің төрағасы.
100 күн, 100 игі іс
Оңтүстіктің жастары Тәуелсіздік тойына осындай тарту жасауда
Жастар – қоғамның қозғаушы күші. Келешегі. Оған мысалды көнекөз тарихтың өзі талай мәрте дәлелдеген. Мәселен, Жапония. Екінші дүниежүзілік соғыстан соң екі қаласына атом бомбасы тасталып, өзі де сау-тамтығы қалмай қираған жапон мемлекеті сол бетімен кетсе әлемдегі ең азусыз, кедей елдердің бірі болар еді. Ертеңді бағамдаған ел ақсақалдары жапон мемлекетінің басшысына келіп: “Мейлі, біз аштықты, суықты көрейік. Мейлі, біз он, он бес қабат үйге электр энергиясы болмаса жаяу-ақ көтерілейік, бәріне төземіз. Мына елдің еңсесін көтеру, экономикасын нығайту үшін жастарды оқытуымыз керек” дейді. Екі жақ осы бәтуаға келіп, әркім өзінің асыл дүниелерін, алтын-күміс бұйымдарын ортаға үйіпті. Елдегі талантты жастарға: “Міне, жапон елінің бар қазынасы. Осы ақшаға шет елдің ең іргелі мемлекеттеріндегі ең мықты оқу орындарында оқып, жапон мемлекетін тұс-тұстан көтеріңдер. Ал, адал ақшаға қиянат жасап, өнер-білім игермегендер елге қайтпаса да болады” дейді.
Сол талапты жастар жапон мемлекетін санаулы жылдарда дүние жүзі санасатындай, осы елге қарап бой түзейтіндей биікке көтерді.
Көп ақшаның буы ұрып, шет елде сайрандағандары да болыпты. Олар да қайтыпты елге. Кемеден жағалауға келіп түсіп, ары ұзамапты. “Ұлы жапон халқы, мен сіздердің үміттеріңізді ақтамаған сормаңдай ұлмын. Келмесем, мені ешкім таппас еді. Бірақ, өзімді өмір-бақи кешіре алмаған болар едім. Кешірім сұраймын сіздерден” деп басын ақ орамалмен шарт буып, кеудесін жалаңаштап өзін-өзі жарып тастаған.
Бізге, әрине, екіншісі емес, біріншісі керегірек. Қазақ жастары жаңа инновациялық технологиялар арқылы Қазақстанның көкжиегін айқындап жатса, одан артық қандай қуаныш бар.
Жастар қабілетін көбік сөзбен емес, нақты іс-әрекетімен көрсетуі қажет. М.Әуезов атындағы Оңтүстік Қазақстан мемлекеттік университетінің жастар ісі жөніндегі комитетінің ұйымдастыруымен “Тәуелсіздік мерейтойына 100 күн, 100 игі іс” атты марафон ашылғанда, салтанатына қатысқан едік. Бұл күз мезгілі еді. Одан бері не атқарылды, не жаңалық бар? Осы сауалды ОҚМУ-дің Жастар ісі жөніндегі комитетінің төрағасы Береке Дүйсебековке қойған болатынбыз.
– Атап айтатын болсақ, жастарды, қала тұрғындарын жағымсыз қылықтардан арылтып, саламаттылықты насихаттау мақсатында темекі шегуге қарсы «Никотин орнына – витамин» атты акция ұйымдастырылды, – дейді комитет төрағасы. – Бұл акцияның ұйымдастырылу себебі, жастарды темекі шегуден арылту, оның орнына денсаулыққа пайдалы дәрумендер пайдалануды кеңінен насихаттау болатын. Сондай-ақ, акция аясында көптеген қала тұрғындары мен жастар аталмыш акцияның жиі-жиі ұйымдастырылуын сұрады. Акция соңында екі қорап темекі жиналып, орнына 10 кг алма, 10 кг алмұрт, 30 дана банан, 7 кг конфеттер мен витаминдер таратылды. Алдағы уақытта мұндай акцияны тағы да ұйымдастыру жоспарланып отыр. Тәуелсіздік мерейтойының қарсаңында университет аумағын, қала аумағын гүлдендіру, абаттандыру жұмыстарын атқарып жатырмыз. «Гүлдене бер, Тәуелсіз Қазақстан!» атты ұранмен экологиялық акциялар мен сенбіліктер ұйымдастырылды. Саламатты өмір салтын қалыптастыру мен бұқаралық спортты, дене шынықтыруды дамыту мақсатында жаппай таңғы дене шынықтыру акциясын өткізіп жүрміз. Бұл күні университеттің барлық студенттік жатақханаларында тұратын студенттердің қатысуымен спорттық жаттығу жасалады. «Тәуелсіздік құрдастары» атты 21 түрлі бағытта факультетаралық студенттердің шығармашылық, өнер байқауы өткізілді. Студенттер арасында «Біз Тәуелсіз елдің жастарымыз!» деген ұранмен факультетаралық көңілді тапқырлар сайысы, «Тәуелсіз Қазақстан жастар көзімен» атты фотокөрме ұйымдастырылды.
Ең маңыздысы, қала көлемінде «Тәуелсіздік алауы» атты эстафеталық жаяу жүгіру марафоны болды. Бұл марафон барысында арнайы «20 жылдық» символы бейнеленген алауды қаланың орталық көшелерімен алып өтіп, 1991 жылдан бастап эстафеталық тәртіппен әрбір бекетке жеткізу арқылы 2011 жылға дейін еліміздің жеткен жетістіктері мен көрсеткіштерін бейнелеу қала тұрғындары мен қонақтарына, жастарға тәуелсіздік құндылықтарын кеңінен түсіндіруге септеседі деп ойлаймыз.
Бақтияр ТАЙЖАН,
Оңтүстік Қазақстан облысы.
Дерек пен дәйек
1993 жылғы 5 қарашада Қазақстан Республикасының Президенті Н.Ә.Назарбаевтың қаулысымен «Болашақ» халықаралық стипендиясы тағайындалды. 1994 жылы бір топ қазақстандық студенттер тұңғыш рет шетелдік жоғары оқу орындарына жіберілді.
* * *
1994-2004 жылдар аралығында «Болашақ» бағдарламасы аясында барлығы 785 студент әлемнің 13 елінде білім алды. Бүгінде олардың дені мемлекеттік және халықаралық ұйымдарда, акционерлік құрылымдарда жауапты қызметтер атқарып, ел Тәуелсіздігінің нығаюына өз үлестерін қосуда.
* * *
Мемлекет басшысының 2005 жылғы халыққа Жолдауында айтылған «Болашақ» халықаралық стипендиясының иегерлерінің санын арттыру жөніндегі бастамасын іске асыру мақсатында ҚР Президентінің «Болашақ» халықаралық стипендиясына конкурс өткізуді ұйымдастыру үшін Қазақстан Республикасы Үкіметінің 2005 жылғы 4 сәуірдегі № 301 қаулысымен «Халықаралық бағдарламалар орталығы» акционерлік қоғамы құрылды.
* * *
«Болашақ» бағдарламасы бойынша мамандарды даярлау жыл сайын Шетелде кадрлар даярлау жөніндегі республикалық комиссия бекітетін Басым мамандықтар тізбесіне қатаң сәйкестікте жүргізіледі.
* * *
2005 жылы шетелде оқуға арналған елдер тізімі өсіп, үміткерлер АҚШ, Ұлыбритания, Германия, Ресей, Австралия, Австрия, Венгрия, Дания, Жаңа Зеландия, Жапония, Израйль, Испания, Италия, Канада, Қытай, Малайзия, Нидерланды, Норвегия, Оңтүстік Корея, Польша, Сингапур, Финляндия, Франция, Чехия, Швеция, Швейцария сияқты өркениетті елдердің оқу орындарынан өздеріне ыңғайлысын таңдау құқына ие болды.
Білім – келешектің кепілі
Әлібек ҚУАНТЫРОВ, Анн-Арбор қаласы Мичиган университетін қолданбалы экономика магистрі бойынша 2008-2010 жылдары бітірген. Сондай-ақ Томск мемлекеттік университетінің «Қаржы және несие», экономика және қаржы факультетінде, Бизнес жоғары мектебінде оқыған.
– Әлібек Сәкенұлы, Президенттің «Болашақ» бағдарламасы сіздің өміріңізге қаншалықты өзгеріс әкелді?
– «Болашақ» стипендиясы менің жоғары білімді маман атануыма үлкен септігін тигізді. Және мемлекеттің осындай қамқорлығын сезіну адамның иығына үлкен жауапкершілік жүктейтінін білдім. Өзіңді шет елде оқып жүргенде туған жеріңнің сондағы бір бөлшегі ретінде ұстауға тиіссің. Өйткені, ондағы жұрт сен арқылы еліңнің, халқыңның бет-бейнесін таниды. Содан да өзіңнің ғана мақсатыңа өмір сүру деген ұғымдар мүлде санаңнан біртіндеп сызылып қалып жатады. Қашанда намыс дейтін отты сезім жаныңды қамшылап тұрады. Шынын айтқанда, бұл Қазақстанның және өзімнің бұдан әрі дамуыма орасан мүмкіндік берген сүйікті жобама айналды. Жастардың кеудесіндегі біле түссем деген шоқты үрлей түсетін бағдарлама болғандықтан сандаған замандастарым секілді мен де осы арқылы өзіме керекті бағытымды таптым.
Елбасының шет елде бала оқыту идеясы өзінің жемісін беріп жатыр деп есептеймін. Және де осы бағдарлама бойынша білім алған жастар келешекте мемлекеттің сол үмітін толықтай ақтап шығады деген сенімдемін.
– Шет елде алған сол білімді қалай ел игілігіне айналдыруға болады?
– Мен макроэкономика және фискалдық саясат саласында жұмыс істеймін. Білімімді тікелей өз тәжірибеме қолданып жүрмін деуге толық негіз бар. Алған теориялық білім мен тәжірибем өз саламдағы көптеген түйткілдерді талдауға, мұны әрмен қарай дамытуға мүмкіндік беруде. АҚШ-та білім алу «батыстық» пайыммен дүниетанымымды әжептәуір байытты деуге болады. Жергілікті жердің ерекшеліктерімен санаса отырып, әлемдік деңгейді бағындырудың жолы білім алудың осы жүйесімен әжептәуір қалыптасып қалғаны рас. Еліміздің әлеуметтік-экономикалық дамуына белгілі бір деңгейде үлес қосу деген сөз өмірден өз орныңды табу дегенмен бара-бар ұғым емес пе? Қазақстанды көркейтуге бар қажыр-қайратымды жұмсай беретін боламын.
Қуаныш ЕРҒАЛИЕВ, С.Ж.Асфендияров атындағы Қазақ ұлттық медицина университетінің емдеу ісі факультетін бітіріп, Жаңа Орлеан қаласында Тулейн университетінде магистратураны қоғамдық денсаулық сақтау мамандығы бойынша тәмамдаған.
– Қуаныш Асылханұлы, бағдарлама сіздің өмірлік жолыңызды табуға қаншалықты әсер етті?
– Шынымды айтсам, мен өзім сол сырт жақта жүргенде елге, жерге деген сезімдерге қатысты көптеген беймәлім сырларға қанықтым. Туған жердің, Отанның қадірін бөтен жұрттың арасына түскенде анық бағамдайды екенсің. Сол себепті де, ең алдымен, саған бұл бағдарлама не берді дейтін болса, «Болашақ» халықаралық стипендиясы өзімнің Отан алдындағы жауапкершілігімді нығайтуға әжептәуір сабақ болды және әрдайым оған адал болып қалуға үндейтінін сезіндім. Жиған-терген білімді енді өз халқыңның игілігіне айналдыру үшін мен мемлекеттік қызметте жұмыс істеуге бел будым.
Шет елде оқып жүргенде мен Қазақстаннан барған жастардың білім сапасы, ой-өресі басқа дамыған елдердегі құрдастарынан қалыспайтынын көрдім. Оларға тек алдарына қойған мақсаттары мен идеяларын жүзеге асыруға толық мүмкіндік туғызсаң жетіп жатыр. Бағдарлама, міне, сол игі қадамның бір көрінісі болып табылады. Талантты, интеллектуалды жастарға қамқорлық көрсетіп, әлемнің ең ірі оқу орындарында білім алуына жағдай жасау арқылы Елбасы осындай маңызды істі тиянақты жүргізіп отыр.
– Америкада оқып келген біліміңді өз елімізде қалай кәдеге жаратып жатырсың?
– Қоғамдық денсаулық сақтауда магистр дәрежесін ала отырып, еңбек жолымды Денсаулық сақтау министрлігінде бастадым. Қазіргі уақытта денсаулық сақтау саласында менеджментті дамыту басқармасының басшысы қызметін атқарудамын. Мемлекет басшысы қабылдаған Денсаулық сақтау саласын дамытудың 2011-2015 жылдарға арналған «Саламатты Қазақстан» мемлекеттік бағдарламасының шеңберінде кәсіптік менеджерлер институтын және қазіргі заманғы басқару технологияларын қоса алғанда басқарудың транспаренттік түрлерін енгізуге тікелей қатысудамын.
Сабина ДҮЙСЕКЕЕВА, Монтерей институтын мемлекеттік басқару магистрі бойынша тәмамдаған. Қазақстан тарихы бойынша көптеген олимпиадалардың жеңімпазы.
– Сабина Сұлтанғалиқызы, «Болашақ» бағдарламасы жастардың өмірлік идеяларын жүзеге асыруда құнды жоба болып табылатыны белгілі. Сен өзің қандай жетістіктерге қол жеткіздің?
– Мұның, әрине, жастардың шет елде білім алып келуіне жасалған үлкен қамқорлық екені түсінікті. Бірақ сыртта оқыған түлек тек білім алып қана қайтады десек, жеткіліксіз сияқты. Мұны санадағы бұлқыныс дейміз бе, әлде бетбұрыс дегеніміз дұрыс бола ма, абзалы әлеуметтік және саяси өзгерістерге барлық азаматтардың қатысуы елімізге қаншалықты маңызды екенін, бойдағы енжарлықтан арылу жастардың болашағын оң өзгерістерге бастайтынын жете түсінесің десек, әлдеқайда ұғынықты болар. Менің қазіргі мониторинг пен бағалау, қоғамдық ұйымдар мен медиасалалардағы жасап жатқан барлық істерім осы «Болашақ» бағдарламасы бойынша білім алып келуімнің арқасында жүзеге асуда.
– Нақтырақ айтқанда, бұл қандай идеялар?
– Өткен 20 жылда еліміздің экономикалық дамуы бағытында көптеген істер атқарылды деуге толық негіз бар. Еліміздегі ең ірі үкіметтік емес ұйым болып табылатын Қазақстанның Азаматтық альянсының идеялық рухтандырушысы және азаматтық қатысу бағдарламасының жетекшісі ретінде мен де өзімнің алған білімімді барынша осы салаға жұмсауға күш салып келемін. Мұндағы әріптестеріммен бірге мемлекеттік қызмет көрсету сапасын және бағдарламалардың нәтижелерін мониторингілеуге, бағалауға азаматтарды қатыстыра отырып жұмыс істеудеміз. Жинаған тәжірибем мен білімімді елімізде азаматтардың саяси-әлеуметтік істерге белсене қатысу мәдениетін қалыптастыруға арнаймын. Бірақ бір кемшілікті бәріміз мойындауымыз керек. Қоғамдық сана әлі де болса көп оқиғаларға селт етпейтін халден түпкілікті арыла қойған жоқ. Азаматтар мен билік тұрақты нәтижесі болатын сапалы өзгерістерге тек өзара бірлесіп қимыл жасағанда ғана жететінін түсіну маңызды. Осы бағытта бізге алда көп тер төгуге тура келеді.
Айқарма беттің материалдарын ұйымдастырған Қарашаш ТОҚСАНБАЙ.