«Егемен Қазақстанның» арнайы жобасы: Жасампаздық жемістері
Жиырма жылдың ішінде атқарылған игі істердің арқасында әрбір өңіріміз өзгеріп, өміріміз жақсарып келеді. «Егемен Қазақстан» газеті осындай өркенді өзгерістерді бейнелейтін материалдарды тұрақты жариялап тұрады.
Төменде Ақтөбе облысындағы Әйтеке би ауданынан фоторепортаж беріліп отыр.
Облыстың астықты өңірі болып табылатын Әйтеке би ауданындағы оң өзгерістер тәуелсіздіктің жемістері, егемендіктің еншілес жеңістері. Аудан аумағын басып өтетін «Алтынсарин – Хромтау» теміржолының пайдалануға берілуі, республикалық маңызы бар 391 шақырымдық «Ақтөбе – Қостанай», «Самара – Шымкент» бағытындағы тас жолдарының күрделі жөнделуі өңірдің экономикалық-әлеуметтік дамуына серпін берді, екінші тынысын ашты. Осы жолдардың бойында көлік-коммуникациялық кешендер іске қосылып, аудан халқының «екі қолға бір күрек» кәсіп – табуына алғышарт жасады. Ауыл шаруашылық игілігіндегі 263,9 мың гектар жер алқабы ірі қара, қой, жылқы шаруашылығын дамытуға толық мүмкіндік береді. Егіс алқабы ең құнарлы 180 мың гектар жерді алып жатыр. Өндірілген ауыл шаруашылық өнімдері аудан халқын толық қамтамасыз етіп қана қоймайды, экспортқа да шығарылады. Әйтеке би өңірінде ақ мәрмәр, гранит, никель-кобальттық жез, мыс, коалин сазы және басқа да пайдалы қазбалардың бай қоры бар. Алайда, осы кен орындарын игеруге тәуелсіздіктің арқасында ғана қол жетті. Бірыңғай ауыл шаруашылықты аудан болып келген өңірде қазір бірнеше инвестициялық жобалар жүзеге асырылып, жаңа өндіріс орындары ашылуда. Ауданда бүгінгі күнге «Текше тас» ЖШС-де жылына 700 000 тонна жол төсеніштері мен құрылыс материалдары өндіріледі. Бенқала жез кенін игеруші «KazCopper» ЖШС-де бүгінде ауыспалы жұмыс кестесімен 150 адам, оның ішінде 50 жергілікті тұрғын еңбек етеді. Аталған кен орны бойынша жердің беткі қабаты аршылып, жездің мол қорына жетті, қондырғыларды құрастыру жұмыстарының 85 пайызы орындалды. Оған қоса жезді ұсақтау, сығындау, электролиздеу мен тасымалдау цехтарын орнату және темір жол арқылы жүктерді қабылдап-жөнелту терминалын салу жұмыстары аяқталып келді. «Vertix холдинг» компаниясы 500 тонна темір кенін шығарып, кен орны бойынша барлау жұмыстарын жүргізуде. Облыстағы ең ірі ауданның аумағында орналасқан 15 селолық округтегі 32 елді мекенде 25 509 адам тұрады. Аудан аумағындағы 30 денсаулық сақтау мекемесі соларға медициналық қызмет көрсетеді. Мұнда 32 мектепте 4 901 оқушы білім алса, 15 балабақшада 880 бүлдіршін және 19 шағын балалар орталықтарында 728 бүлдіршін тәрбиеленуде. Соңғы үш жылда ғана 6 мектеп пайдалануға берілді. Сонымен бірге, кәсіптік лицей, саз мектебі және жасөспірімдерге арналған спорт мектебі жұмыс істейді. Аудан бойынша 3 стадион мен 15 спорт залы бар. Мәдениет саласында 23 кітапхана, 16 мәдениет үйі, 2 мұражай, барлығы 41 мекеме халыққа мәдени қызмет көрсетуде. Комсомол селосында орталық мешіттің құрылысы басталды. Үстіміздегі жылғы он айда ғана 637 жаңа жұмыс орны ашылды. 2009 жылы 23 аз қамтылған отбасы болса, биыл олардың саны 11-ге дейін кеміді. Бюджеттік түсім жаспары ағымдағы жылдың 10 айында 114,3 пайыз орындалды. Өнеркәсіп өнімдерін өндіру 209,3(2010 жылы 205 млн.) млн. теңгеге жетіп, 2 пайызға артты. Ауыл шаруашылық өнімдерін өндіру де артты. Осы кезеңде 570 тонна ұн, 150 тонна нан, 79 тонна макарон өнімдері және 92 тонна жарма өндіріліп, барлық көрсеткіштер бойынша 2010 жылмен салыстырғанда 0,5-2 пайыз өсім болды. Ауылшаруашылығы бойынша жалпы өнім құны 9 643 млн. теңгені құрап, өткен жылмен салыстырғанда 2 109,7 млн. теңгеге, яғни 28 пайызға артты. Биыл егіс салынған 167 886 гектардан 125 332 тонна астық алынды Мал шаруашылығында да ілгерілеу бар. Осы кезеңде ірі қара – 1,7, қой-ешкі – 2,1, жылқы – 1, құстың барлық түрі 2,3 пайызға өсті. 2011 жылдың он айында 8 116,4 тонна ет, 25 900 тонна сүт, 112,6 тонна жүн және 5 550 мың дана жұмыртқа сатылды. 812 нысанда 6 474 адам шағын кәсіпкерлікпен айналысады. Өндірілген өнім мен көрсетілген қызмет көлемі 4 802 млн. теңгені құраса, 118,5 млн. теңге бюджетті толықтырды. Он ай ішінде жұмыспен қамту орталығында 637 адам тіркелсе, соншама адам жұмысқа орналастырылды, сонымен бірге қоғамдық ақылы жұмысқа 123 адам, әлеуметтік салаға 77 адам тартылды. Ауданда жұмыссыздық жоқ десе де болғандай. Экономиканың егіз саласы – өнеркәсіп пен ауыл шаруашылығын қарқынды дамытып отырған аудан Тәуелсіздіктің 20 жылдығына толымды тартулармен келді. Ауылдарда ауыз су мәселесін шешуде, тұрғын үй салуда, ауылдарға баратын жолдарды қалпына келтіруде, әлеуметтік-мәдени сала мекемелерін күрделі жөндеуде бірқатар ілгерілеушілік бар. Сондықтан да халықтың тұрмысы бақуатты, еңсесі биік. Басқа өңірлермен салыстырғанда, өмір сүруге қолайлылық ауданға басқа жерлерден қоныс аударушылар қатарын көбейтіп отыр. Бірлігі берік, ұйымшылдығы мықты әйтекебиліктердің тәуелсіздік шуағымен шырайланған тыныс-тіршілігі кісі қызыққандай. Өңірдегі ертеңгі күнге жасалып жатқан сәтті қадамдар бұл бағыттың баяндылығына сендіре түседі.
Арнайы бетті ұйымдастырған «Егемен Қазақстанның» Ақтөбе облысындағы меншікті тілшісі Сатыбалды СӘУІРБАЙ.
