Ресейдің «Лукойл» мұнай компаниясы соңғы 5 жылдан бері Қазақстанда «Арай» әлеуметтік жобасын жүзеге асырып келеді. Бұл жоба ең жоғарғы баға – Қазақстан Президенті Нұрсұлтан Назарбаевтың 2008 жылғы ең үздік әлеуметтік жоба сыйлығын, сондай-ақ 2009 жылы өткен Қазақстан Азаматтық форумының «Таным» сыйлығын алып та үлгерді. Оның есесіне Маңғыстау және Ақтөбе облыстарының жүздеген тұрғындары өз істерін бастауға мүмкіндік берген гранттарға ие болды.
«Арай» бағдарламасы әдетте жер қойнауын пайдаланушылар төлейтін салық төлемдерінсіз және келісімнен тыс негізде Қазақстан үшін әзірленген арнайы жоба болып табылады. Тек қана ауылдықтарға арналған бұл жоба «Лукойл» компаниясы арқылы тікелей Мәскеуден қаржыландырылады.
2010 жылғы қанатқақты жоба Ақтөбе облысындағы Мұғалжар ауданын қамтыды. «Осының нәтижесінде өтініш берген 453 адамның 57-сі тегін грантқа ие болды. Сөйтіп, ауданда тігін және ұста шеберханалары, наубайханалар, шаштараз, автосервис салондары, жылыжайлар мен шағын фермалар, ауылдарда қызмет көрсету орталықтары ашылды», дейді Мұғалжар ауданы экономика, бюджеттік жоспарлау және кәсіпкерлік бөлім бастығының орынбасары Талғат Өтемұратов.
Осындай грантқа ие болған көп балалы ана Гүлмира Алтыбаева «Арайдың» арқасында Ақкемір ауылында өз ісін бастағандығын айтады. «Мен бала өсіріп отырған үй шаруасындағы әйел едім. «Арайдың» 530 мың теңге грантын ұтып алып, оған балапан өсіретін өнеркәсіптік инкубатор сатып алдым. Сөйтіп, менің өз кәсіпорным пайда болды. Ақшаның бір бөлігін қыс кезінде тауықтар тұратын орын салуға және жазда құстар жайылатын алаң орнатуға жұмсадым», дейді ол.
Гүлмираның тағы бір ауылдасы Сәли Айқожаев табиғатынан бағбан екен. «Бұл – менің ісім, – дейді ол. – Сондықтан өткен жылы «Арайдың» гранты 800 мың теңгеге ұзыны 20, көлденеңі 15 метрлік жылыжай орнаттым. Онда қияр, қызанақ, бұрыш, қырыққабат, баклажан өсіремін. Сергу үшін гүл де отырғызамын. Әрине, осының бәрі аз шаруа емес. Бірақ пайдасы да зор. Сондықтан бастапқы капиталға қолымды жеткізген «Арайға» шын жүрегімнен алғысымды білдіремін».
Биылғы жылы конкурсқа келіп түскен 386 өтінімнің 35-і мақұлданды. Басымдық негізінен неғұрлым халықтың әлеуметтік жағдайы күрделі бөлігіне қарата жасалынды. «Өз бизнестерін дамыту үшін қосымша қаржыға көбінесе көп балалы аналардың, жұмыссыздардың, мүгедектердің, оралман отбасылардың неғұрлым мүдделі келетіндігі түсінікті. Өйткені, мұндай жандар өздерінде кепілдік зат бола бермейтіндіктен, банк кредиттеріне қол жеткізе алмайды. Осындай жандарға «Арайдың» көмекке келуі мемлекет пен әлеуметтік жауапкершілігі зор бизнес ынтымақтастығының жарқын мысалы болып табылады», дейді Ақтөбе облысы әкімінің орынбасары Роза Кемалова.
Мұның сыртында, жергілікті билік өкілдері «Даму» кәсіпкерлікті дамыту қоры өңірлік филиалының мамандарымен бірлесе отырып, Ақтөбе облысында бизнес жүргізуді оқыту ісін ұйымдастырды. Жыл ішінде кәсіпкерліктің теориясы мен практикасы жөніндегі шеберлік сыныптарын белгілі бизнесмендер және жаттықтырушылар жүргізді. «Менің жерлестерім оқу арқылы тегіс байып кетеді деп айта алмаймын. Дегенмен, олар осы арқылы өздерін тексеріп, өз күштерін байқап көрді. Әрбір кездері жаңа бір дүниені ашу, бұрынғыны қайта қайталамау ауыл бизнесінің бір ерекшелігі болып табылады. Сондай жағдайда ғана жақсы тиімділікке жете аламыз», дейді Мұғалжар ауданының әкімі Серік Шанғұтов.
2010 жылы «Арай» бағдарламасының аясында бөлінген 47 миллион теңге тегіс игерілді. Жобаға деген қызығушылықтың үлкен екенін ескере отырып, «Лукойл» компаниясы «Арайдың» аясын тағы да екі ауданға кеңітіп, осы тізімге Байғанин және Темір аудандарын қосты. Ал қаржыландыру көлемін 58 миллион теңгеге дейін арттырды. «Бұл бағдарлама ауылдық аудандар тұрғындарының жағдайын жақсартып, олардың іскерлік және шығармашылық белсенділігін ынталандыруға, жаңа жұмыс орындарын ашуға, шағын кәсіпкерлікті дамытуға, әлеуметтік инфрақұрылымдарды қалыптастыруға қызмет етуде», деп атап көрсетті Роза Кемалова.
Жобаның ауыл үшін қажет екендігін Астанадағы «Лукойл Оверсиз Сервис Б.В.» филиалы бас директорының орынбасары Владислав Михайлов та айтады. «Бізге 1080 өтініш түсті. Яғни, 1 грантқа 11 өтініштен айналды. Сөйтіп, конкурс үшін тартыс күшейіп келеді. Әрине, ол өтініштердің барлығы қаржыландырылуға лайықты. Бірақ бағдарлама ресурстары да шексіз емес. Сондықтан 95 адам ғана жеңімпаз деп танылды. Біздің мақсатымыз адамдарға балық беру емес, сол балықты ұстайтын қармақ беріп, оны пайдалану жолдарын үйрету», дейді ол.
Қазіргі уақытта «Арай» гранттарына ие болған адамдар өз армандарын шын мәнінде іске асыру үстінде. Олардың жоғары экономикалық белсенділігі тіпті тәжірибелі кәсіпкерлердің өзін тәнті етуде. Өйткені, ауылда бір сәттің өзінде мал шаруашылығы бойынша 15 жоба, 14 шаштараз, 13 тігін цехы, 7 аяқ киім жөндеу шеберханасы, 4 нан-тоқаш және кондитерлік цех, осыншама құс шаруашылығы мен компьютерлік орталық, 2 шағын диірмен, дәріхана және малдәрігерлік емдеу орны ашылып жұмысқа кірісті. «Арай» бағдарламасын үйлестіруші Гаухар Борашеваның айтуы бойынша, кейбір ауылдарда сол өңірге тән емес жалюздер, пластикалық және көмір күлінен блок дайындау өндірістері, массаж кабинеті, ағылшын тілін оқыту орталықтары, тіпті қуыршақ театры да ашылыпты.
Осылайша, «Арай» бағдарламасы ауылдағы тірліктің нығайып, жаңа істердің басталуына игі әсерін тигізуде.
Ләззат ЕГІБАЕВА.
Ақтөбе.