Тараптар Қазақстан Президенті Нұрсұлтан Назарбаев пен Үндістанның Премьер-Министрі Нарендра Модидің 2017 жылғы маусымда Астанада және осы жылдың маусым айының басында Циндао қаласында өткен ШЫҰ саммитері аясындағы екіжақты кездесулердің барысында қол жеткізілген уағдаластықтардың жүзеге асырылуын талқылады.
– Жақында Қытайдың Циндао қаласында өткен Қазақстан – Үндістан кездесуінен кейін Қазақстан Президенті Үкіметке Үндістанмен инвестиция, энергетика, логистика, ақпараттық технологиялар, ғарыш, фармацевтика, туризм және киноөндіріс саласындағы екіжақты ынтымақтастықты күшейту жөнінде бірқатар нақты тапсырмалар берді. Осының негізінде біз 2019 жылға жоспарланған жоғары деңгейдегі ресми іс-шаралардың мазмұнын дайындаудамыз, – деді Қ. Әбдірахманов.
Қазақстан сыртқы саясат ведомствосының басшысы Үндістан тарапына Астананың 20 жылдық мерейтойына, Астана экономикалық форумының XI сессиясына, сондай-ақ «Астана» Халықаралық қаржы орталығының ресми ашылу салтанатына Үндістан өкілдерінің қызығушылықтары мен белсенді қатысқаны үшін алғысын білдірді.
2017 жылы Қазақстан мен Үндістан арасындағы сауда айналымы 1 миллиард доллар деңгейіне жетті. Тараптар осы көрсеткішті арттыру мақсатында белсенді ынтымақтастықты жалғастыруға келісті. Атап айтқанда, көлік-логистика саласында ынтымақтастықты кеңейту, оның ішінде елімізге Үнді мұхитын жақындата түсетін Қазақстан – Түрікменстан – Иран темір жолының әлеуетін пайдалану бойынша жұмыстар жүргізілуде.
Тараптар Қазақстан – Үндістан Сауда-экономикалық, ғылыми-техникалық, өнеркәсіптік және мәдени ынтымақтастық жөніндегі үкіметаралық комиссиясының және Қазақстанның сауда-өнеркәсіп палатасы мен Үндістанның сауда-өнеркәсіп палаталары федерациясы арасындағы Іскерлік кеңестің жемісті жұмысына қанағаттанушылық білдірді. Бұл жұмыс аясында Үндістанның іскер топтары ірі қазақстандық әуежайларды басқаруға, сондай-ақ «Астана» ХҚО, Жасыл технологиялар және инвестициялық жобалар жөніндегі халықаралық орталығы және «AstanaHub» IT-стартаптар технопаркі шеңберінде ынтымақтастыққа қызығушылық танытты.
Көпжақты ынтымақтастық саласында БҰҰ, ШЫҰ және АӨСШК шеңберіндегі ынтымақтастықтың тиімділігін арттыру бойынша қосымша қадамдар анықталды. Қазақстанның Сыртқы істер министрі Үндістан тарапы БҰҰ-ның Ливандағы уақытша күштері құрамындағы (UNIFIL) үнді батальонына биылғы жылы қазақстандық бітімгершілік контингентін енгізуіне көмектескенін ерекше атап өтті.
Сондай-ақ көпжақты ынтымақтастықтың маңызды жобаларының бірі – Еуразиялық экономикалық одақ пен Үндістанның арасындағы еркін сауда аймағы туралы келісім жасасу туралы келіссөздердің басталуы.
Мәдени-гуманитарлық байланыстар әрдайым тараптардың назарында болады. Қазақстан Үндістанға биылғы жылдың қаңтар айында Сринагар қаласында танымал тарихшы, мемлекет қайраткері Мұхаммед Хайдар Дулатидің қабірінің қалпына келтірілуіне қолдау білдіргені үшін алғысын білдірді. Бұдан басқа, Болливуд киностудияларымен бірлескен фильмдер жасау жолындағы алғашқы қадамдар жасалды.
Аталған кездесуден соң журналистер алдына шыққан Қазақстанның Сыртқы істер министрі Қайрат Әбдірахманов «Елдеріміз арасында саяси даулар жоқ, ал көптеген халықаралық мәселелер бойынша ұстанымдарымыз жақын. Халықаралық ұйымдар мен көпжақты форумдар аясындағы ынтымақтастығымыз конструктивті түрде жүзеге асырылуда», деп өз сөзін нақтылай түсті.
Ал Үндістан Республикасының Сыртқы істер министрі Сушма Сварадж екеуара кездесуде әлемдік, аймақтық өзекті мәселелер кеңінен талқыланғандығын атап өтіп, өзара тиімді келіссөздерге көңіл бөлді.
– Бүгінде Үндістан тез дами бастаған әлемдік алып экономикаға айналды. Оның ішінде өндіріс пен инновацияны терең дамытуға басымдық беріліп келеді. Премьер-министр Модидің басшылығымен бізде «Цифрлы Үндістан», «Таза Үндістан», «Стартап Үндістан», «100 ақылды қала» және басқа да маңызды бағдарламалар жүзеге асырылуда. Міне, осы бағдарламалардың игілігін сіздермен бөлісуге дайынбыз, – деді Үндістанның Сыртқы істер министрі.
Үндістан тарапы, сонымен қатар Қазақстанмен бірлесе отырып нарықты зерделеу, жаңа өнімдер іздеу, сауда, сертификаттау салаларында әріптестікті дамытуға мүдделі екендіктерін білдірді.
Серік ӘБДІБЕК,
«Егемен Қазақстан»
