«Kazakh Tourism» Ұлттық компаниясына өр Алтайдың айбарлы шыңын бағындыру оңай болмапты. Қатал табиғаты осалдардың мысын басып, бетін қайтарып тастайтын Мұзтауға шығу әркімнің қолынан келе бермейтіні түсінікті. Қиын сапардан қажыған экспедиция мүшелері аман-есен етекке түскен бетте оларды Шығыс Қазақстан облысының әкімі Даниал Ахметов арнайы күтіп алды.
Қазақстан мен Ресейдің шекара тұсында орналасқан, қол созым жерде Моңғолия мен Қытай қол бұлғап тұрған Мұзтау – қойнауы аңыз бен тарихқа тұнған қастерлі мекен. Облыс әкімі айтқандай, Алтайдың тау жоталарын аралауға альпинистер мен қарапайым туристер ғана емес, Тибет монахтары сынды түрлі дін өкілдері де құмар көрінеді.
– Алтай өңірі – Шамбаланың қақпасы деген түсінік бар. Ежелгі діни жазбаларда, соның ішінде Калачакра тантра жазбаларында айтылған мифтік елге жол ашатын қақпа осы төңіректе екеніне сенетін дін өкілдері көп. Қалай десек те, Алтай әлемнің бесігі ғой. Оған осы маңда табылып жатқан аса құнды тарихи жәдігерлер де айғақ,– деді әкім.
Астананың 20 жылдығына сый жасауды көздеген экспедиция құрамында альпинизм спортынан Қазақстан құрама командасының мүшесі, туристік көпсайыстан халықаралық жарыстардың жүлдегері Елдар Ғаббасов, альпинист, білікті бапкер Артем Скопин және басқа да кәсіби альпинистер мен тәжірибелі саяхатшылар, танымал журналистер мен блогерлер бар. Мақсаттары – Қазақстанның таулы өңірлерінде белсенді туризмді дамытуға қолайлы жағдайдың бар екеніне отандастарымыздың және шетелдіктердің көзін жеткізу.
– Экспедицияның жоспарын жасау барысында «Kazakh Tourism»-мен кеңесіп, еліміздің үш өңіріндегі 20 шыңға таңдау жасаған болатынбыз. Бұл өңірлерде экстремалды туризм мен экологиялық туризмді дамытуға мүмкіндік мол. Экспедиция жүріп өткен бағыттарын терең зерттеп келеді, шара аяқталғаннан кейін осы маршрут бойынша инфрақұрылымды дамытудың жолдарын ұсынамыз,– дейді Спорттық туризм қауымдастығының президенті Арман Хасенов.
100 адамнан жасақталған топтың маршруты Алматы, Түркістан, Шығыс Қазақстан облыстарын, Тянь-Шаньның батыс және солтүстік беткейіндегі сілемдерін қамтиды. Сапар соңында Түркістан облысының Сайран-Өгем ұлттық саябағындағы шыңды бағындырған экспедиция осы шыңды «Астананың 20 жылдығы» деп атауды жоспарлап отыр.
Арнұр АСҚАР,
«Егемен Қазақстан»
