Табысты болудың сыры
Лагерьдің алғашқы күні тұлғалық өсу және тайм-менеджмент тақырыбына арналған семинар-тренингтен басталды. «Divergent» кешенді даму академиясы жобасының басшысы, кәсіпкер Вячеслав Поповтың бұл тақырыпқа айтары көп екен. Сондай-ақ дағдыларды қалыптастыруға бағытталған «Мен – брендпін» тренингін өткізген ҚХА мүшесі, Астана қалалық ұйғыр этномәдени бірлестігінің жетекшісі Рустам Абдусаламовтың жастар имиджін көтеруге арналған сөздері көңілге қонымды болды. «Қазақстанның 100 жаңа есімі» жобасының жеңімпаздары – спортшы Серік Есматов, қолға арналған бионикалық протездің авторы Мәулен Бектұрғанов және қазақстандық ұлттық электрондық кітапхананы жасаған Нұржан Жолдыбалинов өз өмірлері мен табысқа жету жолдары туралы әңгімелеп берді.
Слеттің екінші күнінде Мәжіліс депутаты Ахмед Мурадов жастарға арнаған сөзінде еліміздің қоғамдық-саяси кеңістігінде жетекші позицияда тұрған Қазақстан халқы Ассамблеясының рөліне ерекше тоқталып өтті. «Қазақстандағы татулық пен бірлік біздің Көшбасшымыз Нұрсұлтан Назарбаевтың көреген, мақсатты, дәйекті саясатының арқасында орнықты. Ассамблея идеясы – бұл біздің идеологиямыз, ал Ассамблея қызметі келісім мен тұрақтылықты, елдің бүтіндігі мен халықтың бірлігіне бағытталған конституциялық қағидаларды қамтамасыз етеді», деді ол.
Жас көшбасшылармен екінші кездесуде өздерінің табыстарының тарихы мен өмірлері жайында айтқан «Қазақстанның 100 жаңа есімі» жобасының жеңімпаздары: режиссер-сценарист Азиз Заиров, «Әдемі-ай Plus» компаниясының президенті Бахаргүл Төлеген, Қ.И.Сәтбаев атындағы Қазақ ұлттық техникалық университеті мен Қазақ-Британ техникалық университетінің сениор-лекторы Хадичахан Рафиков және физика, информатика, математика саласында 28 патент пен авторлық құқыққа ие болған жас өнертапқыш Тимур Рыспековтің әңгімелері ерекше қызығушылық тудырды.
Жаздық лагерь шеңберінде республиканың әр өңірі мен көршілес елдер жастары ынтымақтастықты әрі қарай дамыту, «Жаңғыру жолы» жастар қозғалысы мен өздерінің этномәдени бірлестіктері шеңберінде тәжірибе алмасу шараларын өткізуге мүмкіндік алды. Айталық, «Жаңғыру жолы» республикалық жастар қозғалысының Астана қаласындағы штабы төрағасының орынбасары Анастасия Тимощенко-Боровикова Қазақстан халқы Ассамблеясының жастар қозғалысы туралы әңгімеледі. Сөз арасында қозғалыстың «Сакральды мұра – Ұлы дала елі» атты ірі жобасы туралы айта кетті. Қозғалыстың Алматы, Солтүстік Қазақстан, Қостанай, Ақтөбе, Жамбыл облыстарынан келген өкілдері де осы жоба бойынша өз өңірлерінде атқарылған жұмыстар туралы баяндады. Сонымен қатар жастар қозғалысы аясында басқа да акциялар ұйымдастыру туралы ұсыныстарын жарыса айтып жатты.
Қазақы қонақжайлық
Халықаралық жастар лагерінің үшінші күні Қазақстан Конституциясының күнімен тұспа-тұс келді. Барша қазақстандыққа ерекше мерекені қонақтарға таныту үшін «Қазақы қонақжайлық» атты ақпараттық-танымдық бағдарлама бастау алды. Бағдарламаның өзегі Қазақстанның барша этностарының арасында қазақ мәдениетін, тарихы мен философиясын дәріптеуге бағдарланған ғылыми-ағартушылық «Қазақтану» жобасына арналған іс-шаралар болды.
«Әжелер алқасы» ұйымының төрайымы Әлия Бекбаева жастарға киіз үй тігудің ерекшеліктері туралы әңгімелеп берді. Өздеріне бейтаныс тақырыпты қызыға тыңдаған жастар киіз үй тігу барысында шеберлік сабағынан алған мәліметтерді бойларына жақсы сіңіргенін көрсетті. Бір сағат ішінде сегіз қанатты үй бой көтеріп, әрі қарай шеберлік сабақтары киіз үй ішінде жалғасты.
Жастар басқосуының кейбір қонақтары қазақтың ұлттық үйінің жабдықтары, олардың атқарар міндеті, сәндік-безендіру жабдықтары туралы бірінші рет естігенін жасырған жоқ.
Бұйымдарды қазақтың ұлттық стилінде теріден, киіз бен ағаштан қолдан жасау әдістерін көрсету үшін қолөнер шеберлері шеберлік сабақтарын өткізді. Материалдармен жұмыс істеу, түрлі бұйымдарды жасау ерекшеліктеріне зер салған қатысушылар жұмыс соңында шеберлердің қолдарынан шыққан және солардың көмегімен өздері жасаған бұйымдарды қуана алып кетіп жатты.
Бағдарламаның жастарды жалықтырып алмай, қатысушыларға танымдық ақпаратты мол беруді ойластырып жасалғаны байқалып тұрды. Шеберлер ауылындағы сабақтан кейін Алматы облыстық ҚХА хатшылығының бас маманы Сәуле Сұрабалдинова «Бұрыштары жоқ дөңгелек: философиялық аспект» деген тақырыпта шара өткізді. Бұл спикер мен аудитория арасындағы диалог форматында ұйымдастырылып, киіз үйді құру мен оның элементтерін тереңірек білуге арналды.
«Қазақ халқының мәдениетінде киіз үйдің маңызы аса зор. Бұл – ұлттық мәдени кодты көрсететін ошақ. Көшпенді халықтың негізгі тұрағы болған киіз үй қазақ халқының ұлттық санасының аса маңызды параметрлерінің көрінісі ретінде көрсетіледі... Қазақ халқының «Мәңгілік Ел» идеясын тұжырып шығаруы кездейсоқ емес, ол біздің өткенімізден, қазіргі күнімізден және болашағымыздан құралған», деді бас маман.
«Ұлттық ерекшелікті қалыптастырудағы тілдің рөлі» дәрісі барысында жастар «Ахуалдық қазақ тілі» кітабының авторы Қанат Тәсібековтен қазақ тілін үйренудің жаңа әдісімен танысты.
Қорыта айтқанда, шараға Қазақстанның түкпір-түкпірінен ғана емес, Өзбекстан, Қырғызстан, Ресей мемлекеттерінен делегациялар келіп қатысуы қазақстандық жастар үшін ғана емес, тұтастай алғанда Қазақстан халқы Ассамблеясы үшін де халықаралық ынтымақтастықты дамыту жолындағы игі іс болды.
Дайындаған
Жолдыбай БАЗАР,
«Егемен Қазақстан»
