Соңғы жылдары сапалы жобаларымен көзге түсіп жүрген «Nurtas prodactioun» студиясы жаңажылдық тарту ретінде «Құдалар» атты жаңа комедиясын ұсынады. Фильмде шымкенттік жігіт пен алматылық арудың ғашықтық хикаясы мен бірден тіл табыса алмаған жаңа құдалардың арасындағы кикілжің баяндалады.
«Бұл менің кинодағы дебютім, сондықтан қатты уайымдадым. Түсірілім тобы өте ұйымшыл болып шықты. 18 рет дубль түсірген қиын сахналар да болды», – дейді бас кейіпкер Даниярдың рөлін сомдаған Олжас Рымбаев. Сондай-ақ таспадағы Диананы – Динара Бақтыбаева, қалалық құдаларды – Нұртас Адамбай мен Жан Ізбасар, ауылдан келген құдаларды – Райхан Калиолдина, Дархан Дайырбек сомдады.
Африканың Кения мемлекетінде және Біріккен Араб Әмірліктерінің Дубай қаласында түсірілген «Қазақша бизнес» сериялы фильмі Африкада түсірілген алғашқы қазақ кинотуындысы ретінде тарихта қалатын сыңайлы. Фильм продюсері Нұрлан Қоянбаев көрермендерді күлкіге кенелтіп, алғысын алу үшін аянып қалмадық дейді. Айтуынша, түсірілім бюджетіне бас-аяғы 500 мың АҚШ доллары жұмсалған. Ал актерлер құрамында және кино мазмұнында айтарлықтай өзгеріс жоқ. «Алдағы уақыттағы мақсатымыз – қазақ киносының еңсесін көтеріп, әлемдік кино әлеміндегі алпауыттармен иық тіресіп, отандық кинематографияны Голливуд деңгейіне жеткізу», деген Нұрлан Қоянбаев кино өндірісіндегі ізденісін қарқынды жалғастыра түсетінін байқатты.
Ая ӨМІРТАЙ,
«Егемен Қазақстан»
