Ал өңір бойынша «Цифрландыру бағдарламасы» аясында атқарылған жұмыстар «Нұр Отан» партиясы облыстық филиалының бақылауында.
– «Нұр Отан» партиясы аймақтарда ІТ-сынып пен ІТ-орталық ашып, жастарды цифрлы ортаға бейімдеу мен оқыту жұмыстарын назарға алып отыр. Былтыр Талдықорған қаласындағы агротехникалық және политехникалық колледждердің базасында екі ІТ-орталық ашылып, онда ынталы жастар тегін білім алуды бастаған. Оқушылар сарайында да осындай орталық жұмыс істейді. Жалпы Жетісу жерінде балаларға арналған оқу орталығының саны көбейіп, алдағы жылда да 62 ІТ-сынып пен робот техникасына арналған 19 кабинет ашылады, – дейді «Нұр Отан» партиясы облыстық филиалы төрағасының бірінші орынбасары Ғалиасқар Сарыбаев.
Жалпы біз Жетісу мектептерінде ІТ-сынып, coworking-орталықтар мен робот техникасы кабинеттері көптеп ашылып жатқанын үнемі жазып келеміз. Бұл бағыттағы шаралар орталықтан алыста орын тепкен ауыл мектептерінде жүзеге асқаны қуантады. Мысалға, өткенде ғана Кеген ауданындағы мектепте coworking-орталық ашылған еді. Қазір ауыл оқушылары 3D-модельдеу, анимациялар жасау, бейнемонтаждау бағыты бойынша дәріс үйреніп, жаңа технологияларға бейімделуде. Олар аз уақыттың ішінде робот та құрастырыпты. Негізі Кеген ауданы бойынша ашылатын IT-сыныптар саны биыл тағы көбейіп, жалпы саны беске жетпекші.
Дәл сондай жаңа үлгідегі ІТ-сынып жақында Іле ауданының Нұрғиса Тілендиев ауылындағы №26 орта мектепте де пайдалануға берілді. Мектептегі ерекше орын ретінде балалардың қызығушылығын оятқан сыныпта балалар цифрлы технология әлеміне қадам басып, робот құрастыруға талаптанады. Олар ІТ-сыныптың ашылуына келген қонақтарға өздері құрастырған алғашқы роботтарын да көрсетіп үлгерді.
– Бүгінде қазіргі заманғы ІТ технологияларды қолданумен қатар бағдарламалау негіздерін оқыту мектептерде кеңінен жүріп жатыр. Әсіресе, ауыл мектептеріне бетбұрыс жасап жатырмыз. Нұрғиса Тілендиев ауылында ашылған ІТ сыныпта оқушылар роботтехниканы тереңдеп меңгеріп, қарапайым алгоритмдерді жасау, бағдарламалар мен WEB-сайттар, компьютерлік ойындар, анимациялар құру дағдыларын үйрену мақсатында тегін қосымша сабақтарға қатыса алады, – дейді Іле аудандық білім бөлімінің басшысы Ләззат Кәткеева.
Қалмаханбет МҰҚАМЕТҚАЛИ,
«Egemen Qazaqstan»
Алматы облысы
