![Тиімділікті арттыратын құжат](/media/2019/07/17/caf3356dbfaa9e31fc69bfb7d03bd46d.jpg)
Шараға Қазақстан халқы Ассамблеясы Төрағасының орынбасары – Хатшылық меңгерушісі Жансейіт Түймебаев, Мәдениет және спорт вице-министрі Ерлан Қожағапанов, ҚХА Ғылыми-сарапшылық кеңесі мүшелері, қоғам қайраткерлері, ғалымдар, этномәдени бірлестіктер мен жастар ұйымдарының өкілдері қатысты.
«Бүгін біз Қазақстан халқы Ассамблеясының Ғылыми-сарапшылық кеңесі мен Қазақстан Республикасы Мәдениет және спорт министрлігінің «Қолжазбалар және сирек кездесетін кітаптар ұлттық орталығы» арасындағы ынтымақтастық туралы меморандумға қол қойылуына арналған маңызды іс-шараның куәсі болып отырмыз. Бұл тарихи сәт қоғамдық келісім мен жалпыұлттық халық бірлігін нығайтудағы Қазақстанның ғылыми-сараптама қауымдастығының жұмыстарына жаңа белестер мен перспективалар ашатындығы сөзсіз», деді Жансейіт Түймебаев.
Ынтымақтастық туралы бұл құжат арқылы Қазақстан халқы Ассамблеясы Ғылыми-сарапшылық кеңесінің төрайымы Айгүл Сәдуақасова мен Мәдениет және спорт министрлігінің «Қолжазбалар және сирек кітаптар ұлттық орталығы» РММ директоры Жандос Болдықов жоғары білім, ғылым мен мәдениет аясындағы тікелей және өзара тиімді ынтымақтастықты орнату, ұлттың мәдени және жазба мұрасын сақтау саласында келісімге келді.
Мұндағы мақсат – екі жақтың мүмкіндіктері мен ғылыми-зерттеу қызметтерін тиімді пайдалану, мәдени мұраны сақтау, елдің тарихына, мәдениетіне және тұрмыс жағдайына қатысты қолжазбалар мен сирек кітаптардың құндылығын анықтау, аудару, зерттеу және ғылыми айналымға енгізу, кітап жәдігерлерін қалыпқа келтіру, оларды каталогтандыру, цифрлы жүйеге көшіру, қолжазбалардың цифрлы көшірмелерінен микрофильмдер жасап, сақтау салаларында ғылыми тәжірибе алмасу. Сонымен қатар каталогтандыру, қолжазба баспалары, литография, беттік баспа, цифрлы көшірмелер мен қолжазбаларды қолдану және қайта қалпына келтіру жұмыстарына қатысу мақсатында мамандармен алмасу да көзделеді. Осыған сәйкес, келісімшарт аясында ұзақ және қысқа мерзімді тағылымдамадан, оқу-өндірістік және ғылыми тәжірибеден өту және зерттеушілермен кәсіби (өндірістік, зерттеу) тәжірибелер алмасу көзделген. Сондай-ақ өзара ортақ мүддені көздейтін және тарихи құнды болып табылатын жазба ескерткіштерін сақтау және пайдалану саласында жоғары білікті ғылыми кадрлар мен мамандарды даярлауға қол жеткізілмек.