Сол 90-жылдары ел игілігі үшін жасалған науқанда жерге иелік етуге құқылы әрбір шаруашылықта еңбек еткен азамат егістік-шабындық аумақтарындағы пай бөлінісіне ерікті түрде қатысты. Үлкенді-кішілі жер телімдерін комиссия шешіміне сай қалауынша бөліп те алды. Алайда, уақыт өте келе жер иелері қазыналы байлықтың қадірін бағаламады, құнарлы жер телімдері айлап, жылдап игеруді күтіп жатып қалды. Қазақ мал шаруашылығы ғылыми-зерттеу институтының (Алматы облысы) тәжірибе шаруашылықтарындағы жүздеген гектарды игермей «шөп қорыған иттің» кебін кигендерден жер телімін қайтарып алу да оңайға түспеді. Олар енді игерусіз жатқан алқаптарды «ұялмай-қызармай» қымбат бағаға саудалап, сатуға әрекет етті. Алайда жергілікті билік өкілдері заң талаптарына сүйене отырып, қараусыз жатқан құнарлы жерлерді қамқор қолдарға шама-шарқынша екі жақты келісіммен қайтартып алған-ды. Бірақ осы күнге дейін жерге не кетпен шаппай, дән сеппей, не шөбін ормай, не мемлекет игілігіне қайтармай сылтау айтып, табандап отырып алғандары қаншама? Президентіміз Қасым-Жомарт Тоқаевтың халыққа Жолдауында атап өтілгендей, «Жер – біздің байлығымыз, оны кім игерсе, игілігін сол азамат көруі керек». Ол, әрине, өз еліміздің азаматы болуы тиіс.
Осы арада төтеннен туындап елдің құлағын көтеріп жүрген тағы бір оқиғаға назар аудармаса және болмайды. Елбасы, Парламент пен Үкімет мүшелері, жалпы қазақтың аузы дуалы азаматтары БАҚ арқылы «Жер шетелдіктерге сатылмайды!» деген кесімді сөзді нығарлап айтқан. Алайда осы бір қауесет әлі күнге дейін еш басылар да емес, бәсеңсіп тыйылар да емес. Сондықтан да Жолдауда айтылған «бұл мəселе бойынша қауесет таратуды доғару керек. Бірақ жерді тиімді пайдалануды қамтамасыз ету – біздің міндетіміз» деген Мемлекет басшысының табанды талабына толықтай қосыламын.
Жұмыс орным, басқаратын шаруашылық жайым ауылды аймақта орналасқандықтан да қазағым қалың жайласқан өңірлердің болмысы маған етене жақын әрі өте жақсы таныс. Елбасының «Ауыл – ел бесігі» арнайы жобасын жалғастыру бағытындағы Президенттің тың бастамасы сондықтан да көңілімізден шығып отыр. Үкіметке осы бағдарламаға сай биыл бөлінген 30 млрд теңгеге қосымша 90 млрд қаражат бөлу тапсырылды. Біле білген кісіге ауылымызға жасалынып отырған бұл да бір шынайы қамқорлық. Мұндай қамқорлықтан ауыл-аймағымыз тек қана өркендеп өседі, қарыштап дамиды деп ойлаймын. Демек, бұл алдымыздағы үш жылда ауылды тағы да көлік, ауыз су жəне газбен қамтамасыз ету сияқты инфрақұрылымдық мəселелер оң шешімін табады, сонымен қатар мектеп, аурухана, спорт алаңдары салынады деген сөз. Алайда қыруар қаржының бір тиынын шашау шығармай, халық игілігі үшін мұқият жұмсауды қатаң бақылауға алу да ауадай қажет.
Отандық агроөнеркəсіп кешенінің сапалы дамуына сонда ғана қол жеткізеріміз анық. Еліміздің аграрлық саласында бел шеше еңбек етіп жүрген кәсіпкерлер Жолдаудағы талаптарды бар ниетімен қолдайды. Жолдау талаптарын орындау барысында халықтың ауызбіршілікпен атқарған іс-әрекетіне береке берсін деп тілеймін. Еліміздің дәулетті болашағына бір кісідей жұмылып еңбек етіп қол жеткізейік!
Жақсылық ҮШКЕМПІРОВ,
кәсіпкер, Қазақстанның Еңбек Ері, грек-рим күресінен Олимпиада және әлем чемпионы
АЛМАТЫ
