Көрменің ашылу салтанатында сөз сөйлеген Чехияның Қазақстандағы Төтенше және өкілетті елшісі Рудольф Гикл: «Алдымен бірер ай бұрын біздің ұсынысымызды қабыл алған Ұлттық музейдің басшылығына шын жүректен ризашылығымды жеткізгім келеді, – деп алғысын білдірді, – шыны бұйымдарын өндіру – біздің тарихымызда ежелден бар дәстүр. Заман ағымына сай қарқынды дамып келе жатқан шыны өнері ұлттық мақтанышымыз саналады. Чехтар мен қазақтардың мәдениеті бір-біріне етене жақын, бұған мен Қазақ елінің мәдениетімен жақын танысу арқылы көз жеткіздім. Бұл ұқсастық екі ел арасындағы дипломатиялық қарым-қатынасты нығайта түседі. Сонымен қатар көрме авторы Иржи Пачинектің аз уақыт ішінде шыныдан жасалған көркем дүниелерін ұшақпен алып келгеніне ризашылығымды білдіремін. Мұны Иржи Пачинектің өнерге деген және өзінің Отанына деген адалдығы деп есептеймін».
Есімі әлемге әйгілі шебер Иржи Пачинек те Қазақстанға алғаш рет табан тіреп тұрғанын тілге тиек етті. Ол көрмеге флора мен фауна әлемін бейнелейтін 30 экспонатын ұсынып отыр.
Халықаралық деңгейдегі әсем шыны шығарушы Цвиков маңындағы өзінің Линдава және Кунратице шыны зауытында өндірілген таңғажайып бұйымдарымен әлемге кеңінен танымал. Иржи Пачинектің 12 шеберімен бірге чехтың дәстүрлі әдісі бойынша жасаған бұйымдары көздің жауын алады. Оның айтуынша, әуелі металл ысқырғышпен шыны үрленіп, қолмен жасалған пішіндер отқа қыздырылады. Мұның бәрі арнайы техникамен атқарылып, балқыту пеші пайдаланылады. Ал шыны пеш 1900 градусқа дейін төтеп беретін көрінеді. Оның бұл тәжірибесін үйренуге әлемнің әр түкпірінен келушілер көп, олардың ішінде қазақстандық студенттер де кездесетінін естідік.
Көрмеде сөз сөйлеген Ұлттық музей директорының орынбасары Алмаз Нұразхан да келешекте бұл сала бойынша екі ел мамандары арасында тәжірибе алмасу байланыстары орнатылатынын, көркем туындылар көрмесі 20 қазанға дейін жалғасатынын айтты.
Қаршыға КҮЛЕН
